৩. নগরোপমসুত্তং

৬৭. ‘‘যতো খো, ভিক্খৰে, রঞ্ঞো পচ্চন্তিমং নগরং সত্তহি নগরপরিক্খারেহি সুপরিক্খতং [সুপরিক্খিত্তং (ক.)] হোতি, চতুন্নঞ্চ আহারানং নিকামলাভী হোতি অকিচ্ছলাভী অকসিরলাভী. ইদং ৰুচ্চতি, ভিক্খৰে, রঞ্ঞো পচ্চন্তিমং নগরং অকরণীযং বাহিরেহি পচ্চত্থিকেহি পচ্চামিত্তেহি.

‘‘কতমেহি সত্তহি নগরপরিক্খারেহি সুপরিক্খতং হোতি? ইধ, ভিক্খৰে, রঞ্ঞো পচ্চন্তিমে নগরে এসিকা হোতি গম্ভীরনেমা [গম্ভীরনেমি (ক.)] সুনিখাতা অচলা অসম্পৰেধী [অসম্পৰেধি (সী. স্যা.)]. ইমিনা পঠমেন নগরপরিক্খারেন সুপরিক্খতং হোতি রঞ্ঞো পচ্চন্তিমং নগরং অব্ভন্তরানং গুত্তিযা বাহিরানং পটিঘাতায.

‘‘পুন চপরং, ভিক্খৰে, রঞ্ঞো পচ্চন্তিমে নগরে পরিখা হোতি গম্ভীরা চেৰ ৰিত্থতা চ. ইমিনা দুতিযেন নগরপরিক্খারেন সুপরিক্খতং হোতি রঞ্ঞো পচ্চন্তিমং নগরং অব্ভন্তরানং গুত্তিযা বাহিরানং পটিঘাতায.

‘‘পুন চপরং, ভিক্খৰে, রঞ্ঞো পচ্চন্তিমে নগরে অনুপরিযাযপথো হোতি উচ্চো চেৰ ৰিত্থতো চ. ইমিনা ততিযেন নগরপরিক্খারেন সুপরিক্খতং হোতি রঞ্ঞো পচ্চন্তিমং নগরং অব্ভন্তরানং গুত্তিযা বাহিরানং পটিঘাতায.

‘‘পুন চপরং, ভিক্খৰে, রঞ্ঞো পচ্চন্তিমে নগরে বহুং আৰুধং সন্নিচিতং হোতি সলাকঞ্চেৰ জেৰনিকঞ্চ [জেৰনিযঞ্চ (সী. অট্ঠ.)]. ইমিনা চতুত্থেন নগরপরিক্খারেন সুপরিক্খতং হোতি রঞ্ঞো পচ্চন্তিমং নগরং অব্ভন্তরানং গুত্তিযা বাহিরানং পটিঘাতায.

‘‘পুন চপরং, ভিক্খৰে, রঞ্ঞো পচ্চন্তিমে নগরে বহুবলকাযো পটিৰসতি, সেয্যথিদং – হত্থারোহা অস্সারোহা রথিকা ধনুগ্গহা চেলকা চলকা পিণ্ডদাযকা উগ্গা রাজপুত্তা পক্খন্দিনো মহানাগা সূরা চম্মযোধিনো দাসকপুত্তা. ইমিনা পঞ্চমেন নগরপরিক্খারেন সুপরিক্খতং হোতি রঞ্ঞো পচ্চন্তিমং নগরং অব্ভন্তরানং গুত্তিযা বাহিরানং পটিঘাতায.

‘‘পুন চপরং, ভিক্খৰে, রঞ্ঞো পচ্চন্তিমে নগরে দোৰারিকো হোতি পণ্ডিতো ব্যত্তো মেধাৰী অঞ্ঞাতানং নিৰারেতা ঞাতানং পৰেসেতা. ইমিনা ছট্ঠেন নগরপরিক্খারেন সুপরিক্খতং হোতি রঞ্ঞো পচ্চন্তিমং নগরং অব্ভন্তরানং গুত্তিযা বাহিরানং পটিঘাতায.

‘‘পুন চপরং, ভিক্খৰে, রঞ্ঞো পচ্চন্তিমে নগরে পাকারো হোতি উচ্চো চেৰ ৰিত্থতো চ ৰাসনলেপনসম্পন্নো চ. ইমিনা সত্তমেন নগরপরিক্খারেন সুপরিক্খতং হোতি রঞ্ঞো পচ্চন্তিমং নগরং অব্ভন্তরানং গুত্তিযা বাহিরানং পটিঘাতায. ইমেহি সত্তহি নগরপরিক্খারেহি সুপরিক্খতং হোতি.

‘‘কতমেসং চতুন্নং আহারানং নিকামলাভী হোতি অকিচ্ছলাভী অকসিরলাভী? ইধ, ভিক্খৰে, রঞ্ঞো পচ্চন্তিমে নগরে বহুং তিণকট্ঠোদকং সন্নিচিতং হোতি অব্ভন্তরানং রতিযা অপরিতস্সায ফাসুৰিহারায বাহিরানং পটিঘাতায.

‘‘পুন চপরং, ভিক্খৰে, রঞ্ঞো পচ্চন্তিমে নগরে বহুং সালিযৰকং সন্নিচিতং হোতি অব্ভন্তরানং রতিযা অপরিতস্সায ফাসুৰিহারায বাহিরানং পটিঘাতায.

‘‘পুন চপরং, ভিক্খৰে, রঞ্ঞো পচ্চন্তিমে নগরে বহুং তিলমুগ্গমাসাপরণ্ণং সন্নিচিতং হোতি অব্ভন্তরানং রতিযা অপরিতস্সায ফাসুৰিহারায বাহিরানং পটিঘাতায.

‘‘পুন চপরং, ভিক্খৰে, রঞ্ঞো পচ্চন্তিমে নগরে বহুং ভেসজ্জং সন্নিচিতং হোতি, সেয্যথিদং – সপ্পি নৰনীতং তেলং মধু ফাণিতং লোণং অব্ভন্তরানং রতিযা অপরিতস্সায ফাসুৰিহারায বাহিরানং পটিঘাতায. ইমেসং খো, ভিক্খৰে, চতুন্নং আহারানং নিকামলাভী হোতি অকিচ্ছলাভী অকসিরলাভী.

‘‘যতো খো, ভিক্খৰে, রঞ্ঞো পচ্চন্তিমং নগরং ইমেহি সত্তহি নগরপরিক্খারেহি সুপরিক্খতং হোতি, ইমেসঞ্চ চতুন্নং আহারানং নিকামলাভী হোতি অকিচ্ছলাভী অকসিরলাভী. ইদং ৰুচ্চতি, ভিক্খৰে, রঞ্ঞো পচ্চন্তিমং নগরং অকরণীযং বাহিরেহি পচ্চত্থিকেহি পচ্চামিত্তেহি. এৰমেৰং খো, ভিক্খৰে, যতো অরিযসাৰকো সত্তহি সদ্ধম্মেহি সমন্নাগতো হোতি, চতুন্নঞ্চ ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী. অযং ৰুচ্চতি, ভিক্খৰে, অরিযসাৰকো অকরণীযো মারস্স অকরণীযো পাপিমতো. কতমেহি সত্তহি সদ্ধম্মেহি সমন্নাগতো হোতি?

‘‘সেয্যথাপি, ভিক্খৰে, রঞ্ঞো পচ্চন্তিমে নগরে এসিকা হোতি গম্ভীরনেমা সুনিখাতা অচলা অসম্পৰেধী অব্ভন্তরানং গুত্তিযা বাহিরানং পটিঘাতায. এৰমেৰং খো, ভিক্খৰে, অরিযসাৰকো সদ্ধো হোতি, সদ্দহতি তথাগতস্স বোধিং ‘ইতিপি সো…পে… বুদ্ধো ভগৰা’তি. সদ্ধেসিকো, ভিক্খৰে, অরিযসাৰকো অকুসলং পজহতি, কুসলং ভাৰেতি; সাৰজ্জং পজহতি, অনৰজ্জং ভাৰেতি; সুদ্ধং অত্তানং পরিহরতি. ইমিনা পঠমেন সদ্ধম্মেন সমন্নাগতো হোতি.

‘‘সেয্যথাপি, ভিক্খৰে, রঞ্ঞো পচ্চন্তিমে নগরে পরিক্খা হোতি গম্ভীরা চেৰ ৰিত্থতা চ অব্ভন্তরানং গুত্তিযা বাহিরানং পটিঘাতায. এৰমেৰং খো, ভিক্খৰে, অরিযসাৰকো হিরীমা হোতি, হিরীযতি কাযদুচ্চরিতেন ৰচীদুচ্চরিতেন মনোদুচ্চরিতেন, হিরীযতি পাপকানং অকুসলানং ধম্মানং সমাপত্তিযা. হিরীপরিক্খো খো, ভিক্খৰে, অরিযসাৰকো অকুসলং পজহতি, কুসলং ভাৰেতি; সাৰজ্জং পজহতি, অনৰজ্জং ভাৰেতি; সুদ্ধং অত্তানং পরিহরতি. ইমিনা দুতিযেন সদ্ধম্মেন সমন্নাগতো হোতি.

‘‘সেয্যথাপি, ভিক্খৰে, রঞ্ঞো পচ্চন্তিমে নগরে অনুপরিযাযপথো হোতি উচ্চো চেৰ ৰিত্থতো চ অব্ভন্তরানং গুত্তিযা বাহিরানং পটিঘাতায. এৰমেৰং খো, ভিক্খৰে, অরিযসাৰকো ওত্তপ্পী হোতি, ওত্তপ্পতি কাযদুচ্চরিতেন ৰচীদুচ্চরিতেন মনোদুচ্চরিতেন, ওত্তপ্পতি পাপকানং অকুসলানং ধম্মানং সমাপত্তিযা. ওত্তপ্পপরিযাযপথো, ভিক্খৰে, অরিযসাৰকো অকুসলং পজহতি, কুসলং ভাৰেতি; সাৰজ্জং পজহতি, অনৰজ্জং ভাৰেতি; সুদ্ধং অত্তানং পরিহরতি. ইমিনা ততিযেন সদ্ধম্মেন সমন্নাগতো হোতি.

‘‘সেয্যথাপি, ভিক্খৰে, রঞ্ঞো পচ্চন্তিমে নগরে বহুং আৰুধং সন্নিচিতং হোতি সলাকঞ্চেৰ জেৰনিকঞ্চ অব্ভন্তরানং গুত্তিযা বাহিরানং পটিঘাতায. এৰমেৰং খো, ভিক্খৰে, অরিযসাৰকো বহুস্সুতো হোতি…পে… দিট্ঠিযা সুপ্পটিৰিদ্ধা. সুতাৰুধো, ভিক্খৰে, অরিযসাৰকো অকুসলং পজহতি, কুসলং ভাৰেতি; সাৰজ্জং পজহতি, অনৰজ্জং ভাৰেতি; সুদ্ধং অত্তানং পরিহরতি. ইমিনা চতুত্থেন সদ্ধম্মেন সমন্নাগতো হোতি.

‘‘সেয্যথাপি, ভিক্খৰে, রঞ্ঞো পচ্চন্তিমে নগরে বহুবলকাযো পটিৰসতি, সেয্যথিদং – হত্থারোহা অস্সারোহা রথিকা ধনুগ্গহা চেলকা চলকা পিণ্ডদাযকা উগ্গা রাজপুত্তা পক্খন্দিনো মহানাগা সূরা চম্মযোধিনো দাসকপুত্তা অব্ভন্তরানং গুত্তিযা বাহিরানং পটিঘাতায. এৰমেৰং খো, ভিক্খৰে, অরিযসাৰকো আরদ্ধৰীরিযো ৰিহরতি অকুসলানং ধম্মানং পহানায, কুসলানং ধম্মানং উপসম্পদায, থামৰা দল়্হপরক্কমো অনিক্খিত্তধুরো কুসলেসু ধম্মেসু. ৰীরিযবলকাযো, ভিক্খৰে, অরিযসাৰকো অকুসলং পজহতি, কুসলং ভাৰেতি; সাৰজ্জং পজহতি, অনৰজ্জং ভাৰেতি; সুদ্ধং অত্তানং পরিহরতি. ইমিনা পঞ্চমেন সদ্ধম্মেন সমন্নাগতো হোতি.

‘‘সেয্যথাপি, ভিক্খৰে, রঞ্ঞো পচ্চন্তিমে নগরে দোৰারিকো হোতি পণ্ডিতো ব্যত্তো মেধাৰী অঞ্ঞাতানং নিৰারেতা ঞাতানং পৰেসেতা অব্ভন্তরানং গুত্তিযা বাহিরানং পটিঘাতায. এৰমেৰং খো, ভিক্খৰে, অরিযসাৰকো সতিমা হোতি পরমেন সতিনেপক্কেন সমন্নাগতো চিরকতম্পি চিরভাসিতম্পি সরিতা অনুস্সরিতা. সতিদোৰারিকো, ভিক্খৰে, অরিযসাৰকো অকুসলং পজহতি, কুসলং ভাৰেতি; সাৰজ্জং পজহতি, অনৰজ্জং ভাৰেতি; সুদ্ধং অত্তানং পরিহরতি. ইমিনা ছট্ঠেন সদ্ধম্মেন সমন্নাগতো হোতি.

‘‘সেয্যথাপি, ভিক্খৰে, রঞ্ঞো পচ্চন্তিমে নগরে পাকারো হোতি উচ্চো চেৰ ৰিত্থতো চ ৰাসনলেপনসম্পন্নো চ অব্ভন্তরানং গুত্তিযা বাহিরানং পটিঘাতায. এৰমেৰং খো, ভিক্খৰে, অরিযসাৰকো পঞ্ঞৰা হোতি উদযত্থগামিনিযা পঞ্ঞায সমন্নাগতো অরিযায নিব্বেধিকায সম্মা দুক্খক্খযগামিনিযা. পঞ্ঞাৰাসনলেপনসম্পন্নো, ভিক্খৰে, অরিযসাৰকো অকুসলং পজহতি, কুসলং ভাৰেতি; সাৰজ্জং পজহতি, অনৰজ্জং ভাৰেতি; সুদ্ধং অত্তানং পরিহরতি. ইমিনা সত্তমেন সদ্ধম্মেন সমন্নাগতো হোতি. ইমেহি সত্তহি সদ্ধম্মেহি সমন্নাগতো হোতি.

‘‘কতমেসং চতুন্নং ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী? সেয্যথাপি, ভিক্খৰে, রঞ্ঞো পচ্চন্তিমে নগরে বহুং তিণকট্ঠোদকং সন্নিচিতং হোতি অব্ভন্তরানং রতিযা অপরিতস্সায ফাসুৰিহারায বাহিরানং পটিঘাতায. এৰমেৰং খো, ভিক্খৰে, অরিযসাৰকো ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি অত্তনো রতিযা অপরিতস্সায ফাসুৰিহারায ওক্কমনায নিব্বানস্স.

‘‘সেয্যথাপি, ভিক্খৰে, রঞ্ঞো পচ্চন্তিমে নগরে বহুং সালিযৰকং সন্নিচিতং হোতি অব্ভন্তরানং রতিযা অপরিতস্সায ফাসুৰিহারায বাহিরানং পটিঘাতায. এৰমেৰং খো, ভিক্খৰে, অরিযসাৰকো ৰিতক্কৰিচারানং ৰূপসমা…পে… দুতিযং ঝানং উপসম্পজ্জ ৰিহরতি অত্তনো রতিযা অপরিতস্সায ফাসুৰিহারায ওক্কমনায নিব্বানস্স.

‘‘সেয্যথাপি, ভিক্খৰে, রঞ্ঞো পচ্চন্তিমে নগরে বহুং তিলমুগ্গমাসাপরণ্ণং সন্নিচিতং হোতি অব্ভন্তরানং রতিযা অপরিতস্সায ফাসুৰিহারায বাহিরানং পটিঘাতায. এৰমেৰং খো, ভিক্খৰে, অরিযসাৰকো পীতিযা চ ৰিরাগা…পে… ততিযং ঝানং উপসম্পজ্জ ৰিহরতি অত্তনো রতিযা অপরিতস্সায ফাসুৰিহারায ওক্কমনায নিব্বানস্স.

‘‘সেয্যথাপি, ভিক্খৰে, রঞ্ঞো পচ্চন্তিমে নগরে বহুং ভেসজ্জং সন্নিচিতং হোতি, সেয্যথিদং – সপ্পি নৰনীতং তেলং মধু ফাণিতং লোণং অব্ভন্তরানং রতিযা অপরিতস্সায ফাসুৰিহারায বাহিরানং পটিঘাতায. এৰমেৰং খো ভিক্খৰে, অরিযসাৰকো সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি অত্তনো রতিযা অপরিতস্সায ফাসুৰিহারায ওক্কমনায নিব্বানস্স. ইমেসং চতুন্নং ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী.

‘‘যতো খো, ভিক্খৰে, অরিযসাৰকো ইমেহি সত্তহি সদ্ধম্মেহি সমন্নাগতো হোতি, ইমেসঞ্চ চতুন্নং ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী. অযং ৰুচ্চতি, ভিক্খৰে, অরিযসাৰকো অকরণীযো মারস্স অকরণীযো পাপিমতো’’তি. ততিযং.