১১. চতুত্থঅভব্বট্ঠানসুত্তং

৯৫. ‘‘ছযিমানি, ভিক্খৰে, অভব্বট্ঠানানি. কতমানি ছ? অভব্বো দিট্ঠিসম্পন্নো পুগ্গলো সযংকতং সুখদুক্খং পচ্চাগন্তুং, অভব্বো দিট্ঠিসম্পন্নো পুগ্গলো পরংকতং [পরকতং (সী. স্যা.)] সুখদুক্খং পচ্চাগন্তুং, অভব্বো দিট্ঠিসম্পন্নো পুগ্গলো সযংকতঞ্চ পরংকতঞ্চ সুখদুক্খং পচ্চাগন্তুং, অভব্বো দিট্ঠিসম্পন্নো পুগ্গলো অসযংকারং অধিচ্চসমুপ্পন্নং সুখদুক্খং পচ্চাগন্তুং, অভব্বো দিট্ঠিসম্পন্নো পুগ্গলো অপরংকারং অধিচ্চসমুপ্পন্নং সুখদুক্খং পচ্চাগন্তুং, অভব্বো দিট্ঠিসম্পন্নো পুগ্গলো অসযংকারঞ্চ অপরংকারঞ্চ অধিচ্চসমুপ্পন্নং সুখদুক্খং পচ্চাগন্তুং. তং কিস্স হেতু? তথা হিস্স, ভিক্খৰে, দিট্ঠিসম্পন্নস্স পুগ্গলস্স হেতু চ সুদিট্ঠো হেতুসমুপ্পন্না চ ধম্মা. ইমানি খো, ভিক্খৰে, ছ অভব্বট্ঠানানী’’তি. একাদসমং.

সীতিৰগ্গো নৰমো. [চতুত্থো (স্যা. ক.)]