৭. ভোগসুত্তং

২২৭. ‘‘পঞ্চিমে, ভিক্খৰে, আদীনৰা ভোগেসু. কতমে পঞ্চ? অগ্গিসাধারণা ভোগা, উদকসাধারণা ভোগা, রাজসাধারণা ভোগা, চোরসাধারণা ভোগা, অপ্পিযেহি দাযাদেহি সাধারণা ভোগা. ইমে খো, ভিক্খৰে, পঞ্চ আদীনৰা ভোগেসু.

‘‘পঞ্চিমে, ভিক্খৰে, আনিসংসা ভোগেসু. কতমে পঞ্চ? ভোগে নিস্সায অত্তানং সুখেতি পীণেতি সম্মা সুখং পরিহরতি, মাতাপিতরো সুখেতি পীণেতি সম্মা সুখং পরিহরতি, পুত্তদারদাসকম্মকরপোরিসে সুখেতি পীণেতি সম্মা সুখং পরিহরতি, মিত্তামচ্চে সুখেতি পীণেতি সম্মা সুখং পরিহরতি, সমণব্রাহ্মণেসু উদ্ধগ্গিকং দক্খিণং পতিট্ঠাপেতি সোৰগ্গিকং সুখৰিপাকং সগ্গসংৰত্তনিকং. ইমে খো, ভিক্খৰে, পঞ্চ আনিসংসা ভোগেসূ’’তি. সত্তমং.