৩. অতিনিৰাসসুত্তং

২২৩. ‘‘পঞ্চিমে, ভিক্খৰে, আদীনৰা অতিনিৰাসে. কতমে পঞ্চ? বহুভণ্ডো হোতি বহুভণ্ডসন্নিচযো, বহুভেসজ্জো হোতি বহুভেসজ্জসন্নিচযো, বহুকিচ্চো হোতি বহুকরণীযো ব্যত্তো কিংকরণীযেসু, সংসট্ঠো ৰিহরতি গহট্ঠপব্বজিতেহি অননুলোমিকেন গিহিসংসগ্গেন, তম্হা চ আৰাসা পক্কমন্তো সাপেক্খো পক্কমতি. ইমে খো, ভিক্খৰে, পঞ্চ আদীনৰা অতিনিৰাসে.

‘‘পঞ্চিমে, ভিক্খৰে, আনিসংসা সমৰত্থৰাসে. কতমে পঞ্চ? ন বহুভণ্ডো হোতি ন বহুভণ্ডসন্নিচযো, ন বহুভেসজ্জো হোতি ন বহুভেসজ্জসন্নিচযো, ন বহুকিচ্চো হোতি ন বহুকরণীযো ন ব্যত্তো কিংকরণীযেসু, অসংসট্ঠো ৰিহরতি গহট্ঠপব্বজিতেহি অননুলোমিকেন গিহিসংসগ্গেন, তম্হা চ আৰাসা পক্কমন্তো অনপেক্খো পক্কমতি. ইমে খো, ভিক্খৰে, পঞ্চ আনিসংসা সমৰত্থৰাসে’’তি. ততিযং.