৬. নিরোধসুত্তং

১৬৬. তত্র খো আযস্মা সারিপুত্তো ভিক্খূ আমন্তেসি…পে… ‘‘ইধাৰুসো, ভিক্খু সীলসম্পন্নো সমাধিসম্পন্নো পঞ্ঞাসম্পন্নো সঞ্ঞাৰেদযিতনিরোধং সমাপজ্জেয্যাপি ৰুট্ঠহেয্যাপি [সমাপজ্জেয্যপি ৰুট্ঠহেয্যপি (সী. স্যা. কং. পী.)] – অত্থেতং ঠানং. নো চে দিট্ঠেৰ ধম্মে অঞ্ঞং আরাধেয্য, অতিক্কম্মেৰ কবল়ীকারাহারভক্খানং [কবল়িংকারাহারভক্খানং (সী. স্যা. কং. পী.)] দেৰানং সহব্যতং অঞ্ঞতরং মনোমযং কাযং উপপন্নো সঞ্ঞাৰেদযিতনিরোধং সমাপজ্জেয্যাপি ৰুট্ঠহেয্যাপি – অত্থেতং ঠান’’ন্তি.

এৰং ৰুত্তে আযস্মা উদাযী আযস্মন্তং সারিপুত্তং এতদৰোচ – ‘‘অট্ঠানং খো এতং, আৰুসো সারিপুত্ত, অনৰকাসো যং সো ভিক্খু অতিক্কম্মেৰ কবল়ীকারাহারভক্খানং দেৰানং সহব্যতং অঞ্ঞতরং মনোমযং কাযং উপপন্নো সঞ্ঞাৰেদযিতনিরোধং সমাপজ্জেয্যাপি ৰুট্ঠহেয্যাপি – নত্থেতং ঠান’’ন্তি.

দুতিযম্পি খো…পে… ততিযম্পি খো আযস্মা সারিপুত্তো ভিক্খূ আমন্তেসি – ‘‘ইধাৰুসো, ভিক্খু সীলসম্পন্নো সমাধিসম্পন্নো পঞ্ঞাসম্পন্নো সঞ্ঞাৰেদযিতনিরোধং সমাপজ্জেয্যাপি ৰুট্ঠহেয্যাপি – অত্থেতং ঠানং. নো চে দিট্ঠেৰ ধম্মে অঞ্ঞং আরাধেয্য, অতিক্কম্মেৰ কবল়ীকারাহারভক্খানং দেৰানং সহব্যতং অঞ্ঞতরং মনোমযং কাযং উপপন্নো সঞ্ঞাৰেদযিতনিরোধং সমাপজ্জেয্যাপি ৰুট্ঠহেয্যাপি – অত্থেতং ঠান’’ন্তি.

ততিযম্পি খো আযস্মা উদাযী আযস্মন্তং সারিপুত্তং এতদৰোচ – ‘‘অট্ঠানং খো এতং, আৰুসো সারিপুত্ত, অনৰকাসো যং সো ভিক্খু অতিক্কম্মেৰ কবল়ীকারাহারভক্খানং দেৰানং সহব্যতং অঞ্ঞতরং মনোমযং কাযং উপপন্নো সঞ্ঞাৰেদযিতনিরোধং সমাপজ্জেয্যাপি ৰুট্ঠহেয্যাপি – নত্থেতং ঠান’’ন্তি.

অথ খো আযস্মতো সারিপুত্তস্স এতদহোসি – ‘‘যাৰততিযকম্পি [যাৰততিযম্পি (সী. স্যা. পী.)] খো মে আযস্মা উদাযী পটিক্কোসতি, ন চ মে কোচি ভিক্খু অনুমোদতি. যংনূনাহং যেন ভগৰা তেনুপসঙ্কমেয্য’’ন্তি. অথ খো আযস্মা সারিপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা সারিপুত্তো ভিক্খূ আমন্তেসি – ‘‘ইধাৰুসো, ভিক্খু সীলসম্পন্নো সমাধিসম্পন্নো পঞ্ঞাসম্পন্নো সঞ্ঞাৰেদযিতনিরোধং সমাপজ্জেয্যাপি ৰুট্ঠহেয্যাপি – অত্থেতং ঠানং. নো চে দিট্ঠেৰ ধম্মে অঞ্ঞং আরাধেয্য, অতিক্কম্মেৰ কবল়ীকারাহারভক্খানং দেৰানং সহব্যতং অঞ্ঞতরং মনোমযং কাযং উপপন্নো সঞ্ঞাৰেদযিতনিরোধং সমাপজ্জেয্যাপি ৰুট্ঠহেয্যাপি – অত্থেতং ঠান’’ন্তি.

এৰং ৰুত্তে আযস্মা উদাযী আযস্মন্তং সারিপুত্তং এতদৰোচ – ‘‘অট্ঠানং খো এতং, আৰুসো সারিপুত্ত, অনৰকাসো যং সো ভিক্খু অতিক্কম্মেৰ কবল়ীকারাহারভক্খানং দেৰানং সহব্যতং অঞ্ঞতরং মনোমযং কাযং উপপন্নো সঞ্ঞাৰেদযিতনিরোধং সমাপজ্জেয্যাপি ৰুট্ঠহেয্যাপি – নত্থেতং ঠান’’ন্তি.

দুতিযম্পি খো…পে… ততিযম্পি খো আযস্মা সারিপুত্তো ভিক্খূ আমন্তেসি – ‘‘ইধাৰুসো, ভিক্খু সীলসম্পন্নো সমাধিসম্পন্নো পঞ্ঞাসম্পন্নো সঞ্ঞাৰেদযিতনিরোধং সমাপজ্জেয্যাপি ৰুট্ঠহেয্যাপি – অত্থেতং ঠানং. নো চে দিট্ঠেৰ ধম্মে অঞ্ঞং আরাধেয্য, অতিক্কম্মেৰ কবল়ীকারাহারভক্খানং দেৰানং সহব্যতং অঞ্ঞতরং মনোমযং কাযং উপপন্নো সঞ্ঞাৰেদযিতনিরোধং সমাপজ্জেয্যাপি ৰুট্ঠহেয্যাপি – অত্থেতং ঠান’’ন্তি.

ততিযম্পি খো আযস্মা উদাযী আযস্মন্তং সারিপুত্তং এতদৰোচ – ‘‘অট্ঠানং খো এতং, আৰুসো সারিপুত্ত, অনৰকাসো যং সো ভিক্খু অতিক্কম্মেৰ কবল়ীকারাহারভক্খানং দেৰানং সহব্যতং অঞ্ঞতরং মনোমযং কাযং উপপন্নো সঞ্ঞাৰেদযিতনিরোধং সমাপজ্জেয্যাপি ৰুট্ঠহেয্যাপি – নত্থেতং ঠান’’ন্তি.

অথ খো আযস্মতো সারিপুত্তস্স এতদহোসি – ‘‘ভগৰতোপি খো মে সম্মুখা আযস্মা উদাযী যাৰততিযকং পটিক্কোসতি, ন চ মে কোচি ভিক্খু অনুমোদতি. যংনূনাহং তুণ্হী অস্স’’ন্তি. অথ খো আযস্মা সারিপুত্তো তুণ্হী অহোসি.

অথ খো ভগৰা আযস্মন্তং উদাযিং আমন্তেসি – ‘‘কং পন ত্ৰং, উদাযি, মনোমযং কাযং পচ্চেসী’’তি? ‘‘যে তে, ভন্তে, দেৰা অরূপিনো সঞ্ঞামযা’’তি. ‘‘কিং নু খো তুয্হং, উদাযি, বালস্স অব্যত্তস্স ভণিতেন! ত্ৰম্পি নাম ভণিতব্বং মঞ্ঞসী’’তি! অথ খো ভগৰা আযস্মন্তং আনন্দং আমন্তেসি – ‘‘অত্থি নাম, আনন্দ, থেরং ভিক্খুং ৰিহেসিযমানং অজ্ঝুপেক্খিস্সথ. ন হি নাম, আনন্দ, কারুঞ্ঞম্পি ভৰিস্সতি থেরম্হি [ব্যত্তম্হি (স্যা. কং. ক.)] ভিক্খুম্হি ৰিহেসিযমানম্হী’’তি.

অথ খো ভগৰা ভিক্খূ আমন্তেসি – ‘‘ইধ, ভিক্খৰে, ভিক্খু সীলসম্পন্নো সমাধিসম্পন্নো পঞ্ঞাসম্পন্নো সঞ্ঞাৰেদযিতনিরোধং সমাপজ্জেয্যাপি ৰুট্ঠহেয্যাপি – অত্থেতং ঠানং. নো চে দিট্ঠেৰ ধম্মে অঞ্ঞং আরাধেয্য, অতিক্কম্মেৰ কবল়ীকারাহারভক্খানং দেৰানং সহব্যতং অঞ্ঞতরং মনোমযং কাযং উপপন্নো সঞ্ঞাৰেদযিতনিরোধং সমাপজ্জেয্যাপি ৰুট্ঠহেয্যাপি – অত্থেতং ঠান’’ন্তি. ইদমৰোচ ভগৰা. ইদং ৰত্ৰান সুগতো উট্ঠাযাসনা ৰিহারং পাৰিসি.

অথ খো আযস্মা আনন্দো অচিরপক্কন্তস্স ভগৰতো যেনাযস্মা উপৰাণো তেনুপসঙ্কমি; উপসঙ্কমিত্ৰা আযস্মন্তং উপৰাণং এতদৰোচ – ‘‘ইধাৰুসো উপৰাণ, অঞ্ঞে থেরে ভিক্খূ ৰিহেসেন্তি. মযং তেন ন মুচ্চাম. অনচ্ছরিযং খো, পনেতং আৰুসো উপৰাণ, যং ভগৰা সাযন্হসমযং পটিসল্লানা ৰুট্ঠিতো এতদেৰ আরব্ভ উদাহরেয্য যথা আযস্মন্তংযেৰেত্থ উপৰাণং পটিভাসেয্য. ইদানেৰ অম্হাকং সারজ্জং ওক্কন্ত’’ন্তি. অথ খো ভগৰা সাযন্হসমযং পটিসল্লানা ৰুট্ঠিতো যেন উপট্ঠানসালা তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. নিসজ্জ খো ভগৰা আযস্মন্তং উপৰাণং এতদৰোচ –

‘‘কতীহি নু খো, উপৰাণ, ধম্মেহি সমন্নাগতো থেরো ভিক্খু সব্রহ্মচারীনং পিযো চ হোতি মনাপো চ গরু চ ভাৰনীযো চা’’তি? ‘‘পঞ্চহি, ভন্তে, ধম্মেহি সমন্নাগতো থেরো ভিক্খু সব্রহ্মচারীনং পিযো চ হোতি মনাপো চ গরু চ ভাৰনীযো চ. কতমেহি পঞ্চহি? ইধ, ভন্তে, থেরো ভিক্খু সীলৰা হোতি…পে… সমাদায সিক্খতি সিক্খাপদেসু; বহুস্সুতো হোতি…পে… দিট্ঠিযা সুপ্পটিৰিদ্ধা; কল্যাণৰাচো হোতি কল্যাণৰাক্করণো পোরিযা ৰাচায সমন্নাগতো ৰিস্সট্ঠায অনেলগলায [অনেলগল়ায (স্যা. কং.)] অত্থস্স ৰিঞ্ঞাপনিযা; চতুন্নং ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী; আসৰানং খযা…পে… সচ্ছিকত্ৰা উপসম্পজ্জ ৰিহরতি. ইমেহি খো, ভন্তে, পঞ্চহি ধম্মেহি সমন্নাগতো থেরো ভিক্খু সব্রহ্মচারীনং পিযো চ হোতি মনাপো চ গরু চ ভাৰনীযো চা’’তি.

‘‘সাধু সাধু, উপৰাণ! ইমেহি খো, উপৰাণ, পঞ্চহি ধম্মেহি সমন্নাগতো থেরো ভিক্খু সব্রহ্মচারীনং পিযো চ হোতি মনাপো চ গরু চ ভাৰনীযো চ. ইমে চে, উপৰাণ, পঞ্চ ধম্মা থেরস্স ভিক্খুনো ন সংৰিজ্জেয্যুং, তং সব্রহ্মচারী ন সক্করেয্যুং ন গরুং করেয্যুং ন মানেয্যুং ন পূজেয্যুং খণ্ডিচ্চেন পালিচ্চেন ৰলিত্তচতায. যস্মা চ খো, উপৰাণ, ইমে পঞ্চ ধম্মা থেরস্স ভিক্খুনো সংৰিজ্জন্তি, তস্মা তং সব্রহ্মচারী সক্করোন্তি গরুং করোন্তি মানেন্তি পূজেন্তী’’তি. ছট্ঠং.