৫. পঞ্হপুচ্ছাসুত্তং

১৬৫. তত্র খো আযস্মা সারিপুত্তো ভিক্খূ আমন্তেসি…পে… ‘‘যো হি কোচি, আৰুসো, পরং পঞ্হং পুচ্ছতি, সব্বো সো পঞ্চহি ঠানেহি, এতেসং ৰা অঞ্ঞতরেন. কতমেহি পঞ্চহি? মন্দত্তা মোমূহত্তা [মোমুহত্তা (সী.)] পরং পঞ্হং পুচ্ছতি, পাপিচ্ছো ইচ্ছাপকতো পরং পঞ্হং পুচ্ছতি, পরিভৰং পরং পঞ্হং পুচ্ছতি, অঞ্ঞাতুকামো পরং পঞ্হং পুচ্ছতি, অথ ৰা পনেৰংচিত্তো [অথ ৰা পকুপ্পন্তো (সী. পী.)] পরং পঞ্হং পুচ্ছতি – ‘সচে মে পঞ্হং পুট্ঠো সম্মদেৰ ব্যাকরিস্সতি ইচ্চেতং কুসলং, নো চে [নো চ (স্যা.)] মে পঞ্হং পুট্ঠো সম্মদেৰ ব্যাকরিস্সতি অহমস্স সম্মদেৰ ব্যাকরিস্সামী’তি. যো হি কোচি, আৰুসো, পরং পঞ্হং পুচ্ছতি, সব্বো সো ইমেহি পঞ্চহি ঠানেহি, এতেসং ৰা অঞ্ঞতরেন. অহং খো পনাৰুসো, এৰংচিত্তো পরং পঞ্হং পুচ্ছামি – ‘সচে মে পঞ্হং পুট্ঠো সম্মদেৰ ব্যাকরিস্সতি ইচ্চেতং কুসলং, নো চে মে পঞ্হং পুট্ঠো সম্মদেৰ ব্যাকরিস্সতি, অহমস্স সম্মদেৰ ব্যাকরিস্সামী’’তি. পঞ্চমং.