৩. পঠমউপট্ঠাকসুত্তং

১২৩. ‘‘পঞ্চহি, ভিক্খৰে, ধম্মেহি সমন্নাগতো গিলানো দূপট্ঠাকো [দুপট্ঠাকো (স্যা. কং. পী. ক.) মহাৰ. ৩৬৬] হোতি. কতমেহি পঞ্চহি? অসপ্পাযকারী হোতি, সপ্পাযে মত্তং ন জানাতি, ভেসজ্জং নপ্পটিসেৰিতা হোতি, অত্থকামস্স গিলানুপট্ঠাকস্স ন যথাভূতং আবাধং আৰিকত্তা হোতি অভিক্কমন্তং ৰা অভিক্কমতীতি পটিক্কমন্তং ৰা পটিক্কমতীতি ঠিতং ৰা ঠিতোতি, উপ্পন্নানং সারীরিকানং ৰেদনানং দুক্খানং তিব্বানং [তিপ্পানং (সী.) মহাৰ. ৩৬৬] খরানং কটুকানং অসাতানং অমনাপানং পাণহরানং অনধিৰাসকজাতিকো হোতি. ইমেহি খো, ভিক্খৰে, পঞ্চহি ধম্মেহি সমন্নাগতো গিলানো দূপট্ঠাকো হোতি.

‘‘পঞ্চহি, ভিক্খৰে, ধম্মেহি সমন্নাগতো গিলানো সূপট্ঠাকো হোতি. কতমেহি পঞ্চহি? সপ্পাযকারী হোতি, সপ্পাযে মত্তং জানাতি, ভেসজ্জং পটিসেৰিতা হোতি, অত্থকামস্স গিলানুপট্ঠাকস্স যথাভূতং আবাধং আৰিকত্তা হোতি অভিক্কমন্তং ৰা অভিক্কমতীতি পটিক্কমন্তং ৰা পটিক্কমতীতি ঠিতং ৰা ঠিতোতি, উপ্পন্নানং সারীরিকানং ৰেদনানং দুক্খানং তিব্বানং খরানং কটুকানং অসাতানং অমনাপানং পাণহরানং অধিৰাসকজাতিকো হোতি. ইমেহি খো, ভিক্খৰে, পঞ্চহি ধম্মেহি সমন্নাগতো গিলানো সূপট্ঠাকো হোতী’’তি. ততিযং.