(১৩) ৩. গিলানৰগ্গো

১. গিলানসুত্তং

১২১. একং সমযং ভগৰা ৰেসালিযং ৰিহরতি মহাৰনে কূটাগারসালাযং. অথ খো ভগৰা সাযন্হসমযং পটিসল্লানা ৰুট্ঠিতো যেন গিলানসালা তেনুপসঙ্কমি. অদ্দসা খো ভগৰা অঞ্ঞতরং ভিক্খুং দুব্বলং গিলানকং; দিস্ৰা পঞ্ঞত্তে আসনে নিসীদি. নিসজ্জ খো ভগৰা ভিক্খূ আমন্তেসি –

‘‘যং কিঞ্চি [যং কিঞ্চি (স্যা. কং.)], ভিক্খৰে, ভিক্খুং দুব্বলং [ভিক্খৰে দুব্বলং (সী. স্যা. কং. পী.)] গিলানকং পঞ্চ ধম্মা ন ৰিজহন্তি, তস্সেতং পাটিকঙ্খং – ‘নচিরস্সেৰ আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরিস্সতী’’’তি.

‘‘কতমে পঞ্চ? ইধ, ভিক্খৰে, ভিক্খু অসুভানুপস্সী কাযে ৰিহরতি, আহারে পটিকূলসঞ্ঞী, সব্বলোকে অনভিরতসঞ্ঞী [সব্বত্থপি এৰমেৰ দিস্সতি], সব্বসঙ্খারেসু অনিচ্চানুপস্সী, মরণসঞ্ঞা খো পনস্স অজ্ঝত্তং সূপট্ঠিতা হোতি. যং কিঞ্চি, ভিক্খৰে, ভিক্খুং দুব্বলং গিলানকং ইমে পঞ্চ ধম্মা ন ৰিজহন্তি, তস্সেতং পাটিকঙ্খং – ‘নচিরস্সেৰ আসৰানং খযা…পে… সচ্ছিকত্ৰা উপসম্পজ্জ ৰিহরিস্সতী’’’তি. পঠমং.

২. সতিসূপট্ঠিতসুত্তং

১২২. ‘‘যো হি কোচি, ভিক্খৰে, ভিক্খু ৰা ভিক্খুনী ৰা পঞ্চ ধম্মে ভাৰেতি পঞ্চ ধম্মে বহুলীকরোতি, তস্স দ্ৰিন্নং ফলানং অঞ্ঞতরং ফলং পাটিকঙ্খং – দিট্ঠেৰ ধম্মে অঞ্ঞা, সতি ৰা উপাদিসেসে অনাগামিতা.

‘‘কতমে পঞ্চ? ইধ, ভিক্খৰে, ভিক্খুনো অজ্ঝত্তঞ্ঞেৰ সতি সূপট্ঠিতা হোতি ধম্মানং উদযত্থগামিনিযা পঞ্ঞায, অসুভানুপস্সী কাযে ৰিহরতি, আহারে পটিকূলসঞ্ঞী, সব্বলোকে অনভিরতসঞ্ঞী, সব্বসঙ্খারেসু অনিচ্চানুপস্সী. যো হি কোচি, ভিক্খৰে, ভিক্খু ৰা ভিক্খুনী ৰা ইমে পঞ্চ ধম্মে ভাৰেতি ইমে পঞ্চ ধম্মে বহুলীকরোতি, তস্স দ্ৰিন্নং ফলানং অঞ্ঞতরং ফলং পাটিকঙ্খং – দিট্ঠেৰ ধম্মে অঞ্ঞা, সতি ৰা উপাদিসেসে অনাগামিতা’’তি. দুতিযং.

৩. পঠমউপট্ঠাকসুত্তং

১২৩. ‘‘পঞ্চহি, ভিক্খৰে, ধম্মেহি সমন্নাগতো গিলানো দূপট্ঠাকো [দুপট্ঠাকো (স্যা. কং. পী. ক.) মহাৰ. ৩৬৬] হোতি. কতমেহি পঞ্চহি? অসপ্পাযকারী হোতি, সপ্পাযে মত্তং ন জানাতি, ভেসজ্জং নপ্পটিসেৰিতা হোতি, অত্থকামস্স গিলানুপট্ঠাকস্স ন যথাভূতং আবাধং আৰিকত্তা হোতি অভিক্কমন্তং ৰা অভিক্কমতীতি পটিক্কমন্তং ৰা পটিক্কমতীতি ঠিতং ৰা ঠিতোতি, উপ্পন্নানং সারীরিকানং ৰেদনানং দুক্খানং তিব্বানং [তিপ্পানং (সী.) মহাৰ. ৩৬৬] খরানং কটুকানং অসাতানং অমনাপানং পাণহরানং অনধিৰাসকজাতিকো হোতি. ইমেহি খো, ভিক্খৰে, পঞ্চহি ধম্মেহি সমন্নাগতো গিলানো দূপট্ঠাকো হোতি.

‘‘পঞ্চহি, ভিক্খৰে, ধম্মেহি সমন্নাগতো গিলানো সূপট্ঠাকো হোতি. কতমেহি পঞ্চহি? সপ্পাযকারী হোতি, সপ্পাযে মত্তং জানাতি, ভেসজ্জং পটিসেৰিতা হোতি, অত্থকামস্স গিলানুপট্ঠাকস্স যথাভূতং আবাধং আৰিকত্তা হোতি অভিক্কমন্তং ৰা অভিক্কমতীতি পটিক্কমন্তং ৰা পটিক্কমতীতি ঠিতং ৰা ঠিতোতি, উপ্পন্নানং সারীরিকানং ৰেদনানং দুক্খানং তিব্বানং খরানং কটুকানং অসাতানং অমনাপানং পাণহরানং অধিৰাসকজাতিকো হোতি. ইমেহি খো, ভিক্খৰে, পঞ্চহি ধম্মেহি সমন্নাগতো গিলানো সূপট্ঠাকো হোতী’’তি. ততিযং.

৪. দুতিযউপট্ঠাকসুত্তং

১২৪. ‘‘পঞ্চহি, ভিক্খৰে, ধম্মেহি সমন্নাগতো গিলানুপট্ঠাকো নালং গিলানং উপট্ঠাতুং. কতমেহি পঞ্চহি? নপ্পটিবলো হোতি ভেসজ্জং সংৰিধাতুং; সপ্পাযাসপ্পাযং ন জানাতি, অসপ্পাযং উপনামেতি, সপ্পাযং অপনামেতি; আমিসন্তরো গিলানং উপট্ঠাতি, নো মেত্তচিত্তো; জেগুচ্ছী হোতি উচ্চারং ৰা পস্সাৰং ৰা ৰন্তং ৰা খেল়ং ৰা নীহরিতুং; নপ্পটিবলো হোতি গিলানং কালেন কালং ধম্মিযা কথায সন্দস্সেতুং সমাদপেতুং [সমাদাপেতুং (?) মহাৰ. ৩৬৬] সমুত্তেজেতুং সম্পহংসেতুং. ইমেহি খো, ভিক্খৰে, পঞ্চহি ধম্মেহি সমন্নাগতো গিলানুপট্ঠাকো নালং গিলানং উপট্ঠাতুং.

‘‘পঞ্চহি, ভিক্খৰে, ধম্মেহি সমন্নাগতো গিলানুপট্ঠাকো অলং গিলানং উপট্ঠাতুং. কতমেহি পঞ্চহি? পটিবলো হোতি ভেসজ্জং সংৰিধাতুং; সপ্পাযাসপ্পাযং জানাতি, অসপ্পাযং অপনামেতি, সপ্পাযং উপনামেতি; মেত্তচিত্তো গিলানং উপট্ঠাতি, নো আমিসন্তরো; অজেগুচ্ছী হোতি উচ্চারং ৰা পস্সাৰং ৰা ৰন্তং ৰা খেল়ং ৰা নীহরিতুং; পটিবলো হোতি গিলানং কালেন কালং ধম্মিযা কথায সন্দস্সেতুং সমাদপেতুং সমুত্তেজেতুং সম্পহংসেতুং. ইমেহি খো, ভিক্খৰে, পঞ্চহি ধম্মেহি সমন্নাগতো গিলানুপট্ঠাকো অলং গিলানং উপট্ঠাতু’’ন্তি. চতুত্থং.

৫. পঠমঅনাযুস্সাসুত্তং

১২৫. ‘‘পঞ্চিমে, ভিক্খৰে, ধম্মা অনাযুস্সা. কতমে পঞ্চ? অসপ্পাযকারী হোতি, সপ্পাযে মত্তং ন জানাতি, অপরিণতভোজী চ হোতি, অকালচারী চ হোতি, অব্রহ্মচারী চ. ইমে খো, ভিক্খৰে, পঞ্চ ধম্মা অনাযুস্সা.

‘‘পঞ্চিমে, ভিক্খৰে, ধম্মা আযুস্সা. কতমে পঞ্চ? সপ্পাযকারী হোতি, সপ্পাযে মত্তং জানাতি, পরিণতভোজী চ হোতি, কালচারী চ হোতি, ব্রহ্মচারী চ. ইমে খো, ভিক্খৰে, পঞ্চ ধম্মা আযুস্সা’’তি. পঞ্চমং.

৬. দুতিযঅনাযুস্সাসুত্তং

১২৬. ‘‘পঞ্চিমে, ভিক্খৰে, ধম্মা অনাযুস্সা. কতমে পঞ্চ? অসপ্পাযকারী হোতি, সপ্পাযে মত্তং ন জানাতি, অপরিণতভোজী চ হোতি, দুস্সীলো চ, পাপমিত্তো চ. ইমে খো, ভিক্খৰে, পঞ্চ ধম্মা অনাযুস্সা.

‘‘পঞ্চিমে, ভিক্খৰে, ধম্মা আযুস্সা. কতমে পঞ্চ? সপ্পাযকারী হোতি, সপ্পাযে মত্তং জানাতি, পরিণতভোজী চ হোতি, সীলৰা চ, কল্যাণমিত্তো চ. ইমে খো, ভিক্খৰে, পঞ্চ ধম্মা আযুস্সা’’তি. ছট্ঠং.

৭. ৰপকাসসুত্তং

১২৭. ‘‘পঞ্চহি, ভিক্খৰে, ধম্মেহি সমন্নাগতো ভিক্খু নালং সঙ্ঘম্হা ৰপকাসিতুং [ৰি + অপ + কাসিতুং = ৰপকাসিতুং]. কতমেহি পঞ্চহি? ইধ, ভিক্খৰে, ভিক্খু অসন্তুট্ঠো হোতি ইতরীতরেন চীৰরেন, অসন্তুট্ঠো হোতি ইতরীতরেন পিণ্ডপাতেন, অসন্তুট্ঠো হোতি ইতরীতরেন সেনাসনেন, অসন্তুট্ঠো হোতি ইতরীতরেন গিলানপ্পচ্চযভেসজ্জপরিক্খারেন, কামসঙ্কপ্পবহুলো চ ৰিহরতি. ইমেহি খো, ভিক্খৰে, পঞ্চহি ধম্মেহি সমন্নাগতো ভিক্খু নালং সঙ্ঘম্হা ৰপকাসিতুং.

‘‘পঞ্চহি, ভিক্খৰে, ধম্মেহি সমন্নাগতো ভিক্খু অলং সঙ্ঘম্হা ৰপকাসিতুং. কতমেহি পঞ্চহি? ইধ, ভিক্খৰে, ভিক্খু সন্তুট্ঠো হোতি ইতরীতরেন চীৰরেন, সন্তুট্ঠো হোতি ইতরীতরেন পিণ্ডপাতেন, সন্তুট্ঠো হোতি ইতরীতরেন সেনাসনেন, সন্তুট্ঠো হোতি ইতরীতরেন গিলানপ্পচ্চযভেসজ্জপরিক্খারেন, নেক্খম্মসঙ্কপ্পবহুলো [ন কামসঙ্কপ্পবহুলো (ক.)] চ ৰিহরতি. ইমেহি খো, ভিক্খৰে, পঞ্চহি ধম্মেহি সমন্নাগতো ভিক্খু অলং সঙ্ঘম্হা ৰপকাসিতু’’ন্তি. সত্তমং.

৮. সমণসুখসুত্তং

১২৮. ‘‘পঞ্চিমানি, ভিক্খৰে, সমণদুক্খানি. কতমানি পঞ্চ? ইধ, ভিক্খৰে, ভিক্খু অসন্তুট্ঠো হোতি ইতরীতরেন চীৰরেন, অসন্তুট্ঠো হোতি ইতরীতরেন পিণ্ডপাতেন, অসন্তুট্ঠো হোতি ইতরীতরেন সেনাসনেন, অসন্তুট্ঠো হোতি ইতরীতরেন গিলানপ্পচ্চযভেসজ্জপরিক্খারেন, অনভিরতো চ ব্রহ্মচরিযং চরতি. ইমানি খো, ভিক্খৰে, পঞ্চ সমণদুক্খানি.

‘‘পঞ্চিমানি, ভিক্খৰে, সমণসুখানি. কতমানি পঞ্চ? ইধ, ভিক্খৰে, ভিক্খু সন্তুট্ঠো হোতি ইতরীতরেন চীৰরেন, সন্তুট্ঠো হোতি ইতরীতরেন পিণ্ডপাতেন, সন্তুট্ঠো হোতি ইতরীতরেন সেনাসনেন, সন্তুট্ঠো হোতি ইতরীতরেন গিলানপ্পচ্চযভেসজ্জপরিক্খারেন, অভিরতো চ ব্রহ্মচরিযং চরতি. ইমানি খো, ভিক্খৰে, পঞ্চ সমণসুখানী’’তি. অট্ঠমং.

৯. পরিকুপ্পসুত্তং

১২৯. ‘‘পঞ্চিমে, ভিক্খৰে, আপাযিকা নেরযিকা পরিকুপ্পা অতেকিচ্ছা. কতমে পঞ্চ? মাতা [মাতরং (ক.)] জীৰিতা ৰোরোপিতা হোতি, পিতা [পিতরং (ক.)] জীৰিতা ৰোরোপিতো [ৰোরোপিতা (ক.)] হোতি, অরহং [অরহন্তং (ক.), অরহা (স্যা.)] জীৰিতা ৰোরোপিতো হোতি, তথাগতস্স দুট্ঠেন চিত্তেন লোহিতং উপ্পাদিতং হোতি, সঙ্ঘো ভিন্নো হোতি. ইমে খো, ভিক্খৰে, পঞ্চ আপাযিকা নেরযিকা পরিকুপ্পা অতেকিচ্ছা’’তি. নৰমং.

১০. ব্যসনসুত্তং

১৩০. ‘‘পঞ্চিমানি, ভিক্খৰে, ব্যসনানি. কতমানি পঞ্চ? ঞাতিব্যসনং, ভোগব্যসনং, রোগব্যসনং, সীলব্যসনং, দিট্ঠিব্যসনং. ন, ভিক্খৰে, সত্তা ঞাতিব্যসনহেতু ৰা ভোগব্যসনহেতু ৰা রোগব্যসনহেতু ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জন্তি. সীলব্যসনহেতু ৰা, ভিক্খৰে, সত্তা দিট্ঠিব্যসনহেতু ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জন্তি. ইমানি খো, ভিক্খৰে, পঞ্চ ব্যসনানি.

‘‘পঞ্চিমা, ভিক্খৰে, সম্পদা. কতমা পঞ্চ? ঞাতিসম্পদা, ভোগসম্পদা, আরোগ্যসম্পদা, সীলসম্পদা, দিট্ঠিসম্পদা. ন, ভিক্খৰে, সত্তা ঞাতিসম্পদাহেতু ৰা ভোগসম্পদাহেতু ৰা আরোগ্যসম্পদাহেতু ৰা কাযস্স ভেদা পরং মরণা সুগতিং সগ্গং লোকং উপপজ্জন্তি. সীলসম্পদাহেতু ৰা, ভিক্খৰে, সত্তা দিট্ঠিসম্পদাহেতু ৰা কাযস্স ভেদা পরং মরণা সুগতিং সগ্গং লোকং উপপজ্জন্তি. ইমা খো, ভিক্খৰে, পঞ্চ সম্পদা’’তি. দসমং.

গিলানৰগ্গো ততিযো.