১. সারজ্জসুত্তং

১০১. ‘‘পঞ্চিমে, ভিক্খৰে, সেখৰেসারজ্জকরণা ধম্মা. কতমে পঞ্চ? ইধ, ভিক্খৰে, ভিক্খু সদ্ধো হোতি, সীলৰা হোতি, বহুস্সুতো হোতি, আরদ্ধৰীরিযো হোতি, পঞ্ঞৰা হোতি.

‘‘যং, ভিক্খৰে, অস্সদ্ধস্স সারজ্জং হোতি, সদ্ধস্স তং সারজ্জং ন হোতি. তস্মাযং ধম্মো সেখৰেসারজ্জকরণো.

‘‘যং, ভিক্খৰে, দুস্সীলস্স সারজ্জং হোতি, সীলৰতো তং সারজ্জং ন হোতি. তস্মাযং ধম্মো সেখৰেসারজ্জকরণো.

‘‘যং, ভিক্খৰে, অপ্পস্সুতস্স সারজ্জং হোতি, বহুস্সুতস্স তং সারজ্জং ন হোতি. তস্মাযং ধম্মো সেখৰেসারজ্জকরণো.

‘‘যং, ভিক্খৰে, কুসীতস্স সারজ্জং হোতি, আরদ্ধৰীরিযস্স তং সারজ্জং ন হোতি. তস্মাযং ধম্মো সেখৰেসারজ্জকরণো.

‘‘যং, ভিক্খৰে, দুপ্পঞ্ঞস্স সারজ্জং হোতি, পঞ্ঞৰতো তং সারজ্জং ন হোতি. তস্মাযং ধম্মো সেখৰেসারজ্জকরণো. ইমে খো, ভিক্খৰে, পঞ্চ সেখৰেসারজ্জকরণা ধম্মা’’তি. পঠমং.