(১১) ১. ফাসুৰিহারৰগ্গো

১. সারজ্জসুত্তং

১০১. ‘‘পঞ্চিমে, ভিক্খৰে, সেখৰেসারজ্জকরণা ধম্মা. কতমে পঞ্চ? ইধ, ভিক্খৰে, ভিক্খু সদ্ধো হোতি, সীলৰা হোতি, বহুস্সুতো হোতি, আরদ্ধৰীরিযো হোতি, পঞ্ঞৰা হোতি.

‘‘যং, ভিক্খৰে, অস্সদ্ধস্স সারজ্জং হোতি, সদ্ধস্স তং সারজ্জং ন হোতি. তস্মাযং ধম্মো সেখৰেসারজ্জকরণো.

‘‘যং, ভিক্খৰে, দুস্সীলস্স সারজ্জং হোতি, সীলৰতো তং সারজ্জং ন হোতি. তস্মাযং ধম্মো সেখৰেসারজ্জকরণো.

‘‘যং, ভিক্খৰে, অপ্পস্সুতস্স সারজ্জং হোতি, বহুস্সুতস্স তং সারজ্জং ন হোতি. তস্মাযং ধম্মো সেখৰেসারজ্জকরণো.

‘‘যং, ভিক্খৰে, কুসীতস্স সারজ্জং হোতি, আরদ্ধৰীরিযস্স তং সারজ্জং ন হোতি. তস্মাযং ধম্মো সেখৰেসারজ্জকরণো.

‘‘যং, ভিক্খৰে, দুপ্পঞ্ঞস্স সারজ্জং হোতি, পঞ্ঞৰতো তং সারজ্জং ন হোতি. তস্মাযং ধম্মো সেখৰেসারজ্জকরণো. ইমে খো, ভিক্খৰে, পঞ্চ সেখৰেসারজ্জকরণা ধম্মা’’তি. পঠমং.

২. উস্সঙ্কিতসুত্তং

১০২. ‘‘পঞ্চহি, ভিক্খৰে, ধম্মেহি সমন্নাগতো ভিক্খু উস্সঙ্কিতপরিসঙ্কিতো হোতি পাপভিক্খূতি অপি অকুপ্পধম্মোপি [অপি অকুপ্পধম্মো (সী. স্যা. কং.)].

কতমেহি পঞ্চহি? ইধ, ভিক্খৰে, ভিক্খু ৰেসিযাগোচরো ৰা হোতি, ৰিধৰাগোচরো ৰা হোতি, থুল্লকুমারিকাগোচরো ৰা হোতি, পণ্ডকগোচরো ৰা হোতি, ভিক্খুনীগোচরো ৰা হোতি.

‘‘ইমেহি খো, ভিক্খৰে, পঞ্চহি ধম্মেহি সমন্নাগতো ভিক্খু উস্সঙ্কিতপরিসঙ্কিতো হোতি পাপভিক্খূতি অপি অকুপ্পধম্মোপী’’তি. দুতিযং.

৩. মহাচোরসুত্তং

১০৩. ‘‘পঞ্চহি, ভিক্খৰে, অঙ্গেহি সমন্নাগতো মহাচোরো সন্ধিম্পি ছিন্দতি, নিল্লোপম্পি হরতি, একাগারিকম্পি করোতি, পরিপন্থেপি তিট্ঠতি. কতমেহি পঞ্চহি? ইধ, ভিক্খৰে, মহাচোরো ৰিসমনিস্সিতো চ হোতি, গহননিস্সিতো চ, বলৰনিস্সিতো চ, ভোগচাগী চ, একচারী চ.

‘‘কথঞ্চ, ভিক্খৰে, মহাচোরো ৰিসমনিস্সিতো হোতি? ইধ, ভিক্খৰে, মহাচোরো নদীৰিদুগ্গং ৰা নিস্সিতো হোতি পব্বতৰিসমং ৰা. এৰং খো, ভিক্খৰে, মহাচোরো ৰিসমনিস্সিতো হোতি.

‘‘কথঞ্চ, ভিক্খৰে, মহাচোরো গহননিস্সিতো হোতি? ইধ, ভিক্খৰে, মহাচোরো তিণগহনং ৰা নিস্সিতো হোতি রুক্খগহনং ৰা রোধং [গেধং (সী.) অ. নি. ৩.৫১] ৰা মহাৰনসণ্ডং ৰা. এৰং খো, ভিক্খৰে, মহাচোরো গহননিস্সিতো হোতি.

‘‘কথঞ্চ, ভিক্খৰে, মহাচোরো বলৰনিস্সিতো হোতি? ইধ, ভিক্খৰে, মহাচোরো রাজানং ৰা রাজমহামত্তানং ৰা নিস্সিতো হোতি. তস্স এৰং হোতি – ‘সচে মং কোচি কিঞ্চি ৰক্খতি, ইমে মে রাজানো ৰা রাজমহামত্তা ৰা পরিযোধায অত্থং ভণিস্সন্তী’তি. সচে নং কোচি কিঞ্চি আহ, ত্যস্স রাজানো ৰা রাজমহামত্তা ৰা পরিযোধায অত্থং ভণন্তি. এৰং খো, ভিক্খৰে, মহাচোরো বলৰনিস্সিতো হোতি.

‘‘কথঞ্চ, ভিক্খৰে, মহাচোরো ভোগচাগী হোতি? ইধ, ভিক্খৰে, মহাচোরো অড্ঢো হোতি মহদ্ধনো মহাভোগো. তস্স এৰং হোতি – ‘সচে মং কোচি কিঞ্চি ৰক্খতি, ইতো ভোগেন পটিসন্থরিস্সামী’তি. সচে নং কোচি কিঞ্চি আহ, ততো ভোগেন পটিসন্থরতি. এৰং খো, ভিক্খৰে, মহাচোরো ভোগচাগী হোতি.

‘‘কথঞ্চ, ভিক্খৰে, মহাচোরো একচারী হোতি? ইধ, ভিক্খৰে, মহাচোরো এককোৰ গহণানি [নিগ্গহণানি (সী. স্যা. কং. পী.)] কত্তা হোতি. তং কিস্স হেতু? ‘মা মে গুয্হমন্তা বহিদ্ধা সম্ভেদং অগমংসূ’তি. এৰং খো, ভিক্খৰে, মহাচোরো একচারী হোতি.

‘‘ইমেহি খো, ভিক্খৰে, পঞ্চহঙ্গেহি সমন্নাগতো মহাচোরো সন্ধিম্পি ছিন্দতি নিল্লোপম্পি হরতি একাগারিকম্পি করোতি পরিপন্থেপি তিট্ঠতি.

‘‘এৰমেৰং খো, ভিক্খৰে, পঞ্চহি ধম্মেহি সমন্নাগতো পাপভিক্খু খতং উপহতং অত্তানং পরিহরতি, সাৰজ্জো চ হোতি সানুৰজ্জো ৰিঞ্ঞূনং, বহুঞ্চ অপুঞ্ঞং পসৰতি. কতমেহি পঞ্চহি? ইধ, ভিক্খৰে, পাপভিক্খু ৰিসমনিস্সিতো চ হোতি, গহননিস্সিতো চ, বলৰনিস্সিতো চ, ভোগচাগী চ, একচারী চ.

‘‘কথঞ্চ, ভিক্খৰে, পাপভিক্খু ৰিসমনিস্সিতো হোতি? ইধ, ভিক্খৰে, পাপভিক্খু ৰিসমেন কাযকম্মেন সমন্নাগতো হোতি, ৰিসমেন ৰচীকম্মেন সমন্নাগতো হোতি, ৰিসমেন মনোকম্মেন সমন্নাগতো হোতি. এৰং খো, ভিক্খৰে, পাপভিক্খু ৰিসমনিস্সিতো হোতি.

‘‘কথঞ্চ, ভিক্খৰে, পাপভিক্খু গহননিস্সিতো হোতি? ইধ, ভিক্খৰে, পাপভিক্খু মিচ্ছাদিট্ঠিকো হোতি অন্তগ্গাহিকায দিট্ঠিযা সমন্নাগতো. এৰং খো, ভিক্খৰে, পাপভিক্খু গহননিস্সিতো হোতি.

‘‘কথঞ্চ, ভিক্খৰে, পাপভিক্খু বলৰনিস্সিতো হোতি? ইধ, ভিক্খৰে, পাপভিক্খু রাজানং ৰা রাজমহামত্তানং ৰা নিস্সিতো হোতি. তস্স এৰং হোতি – ‘সচে মং কোচি কিঞ্চি ৰক্খতি, ইমে মে রাজানো ৰা রাজমহামত্তা ৰা পরিযোধায অত্থং ভণিস্সন্তী’তি. সচে নং কোচি কিঞ্চি আহ, ত্যস্স রাজানো ৰা রাজমহামত্তা ৰা পরিযোধায অত্থং ভণন্তি. এৰং খো, ভিক্খৰে, পাপভিক্খু বলৰনিস্সিতো হোতি.

‘‘কথঞ্চ, ভিক্খৰে, পাপভিক্খু ভোগচাগী হোতি? ইধ, ভিক্খৰে, পাপভিক্খু লাভী হোতি চীৰরপিণ্ডপাতসেনাসনগিলানপ্পচ্চযভেসজ্জপরিক্খারানং. তস্স এৰং হোতি – ‘সচে মং কোচি কিঞ্চি ৰক্খতি, ইতো লাভেন পটিসন্থরিস্সামী’তি. সচে নং কোচি কিঞ্চি আহ, ততো লাভেন পটিসন্থরতি. এৰং খো, ভিক্খৰে, পাপভিক্খু ভোগচাগী হোতি.

‘‘কথঞ্চ, ভিক্খৰে, পাপভিক্খু একচারী হোতি? ইধ, ভিক্খৰে, পাপভিক্খু এককোৰ পচ্চন্তিমেসু জনপদেসু নিৰাসং কপ্পেতি. সো তত্থ কুলানি উপসঙ্কমন্তো লাভং লভতি. এৰং খো, ভিক্খৰে, পাপভিক্খু একচারী হোতি.

‘‘ইমেহি খো, ভিক্খৰে, পঞ্চহি ধম্মেহি সমন্নাগতো পাপভিক্খু খতং উপহতং অত্তানং পরিহরতি, সাৰজ্জো চ হোতি সানুৰজ্জো ৰিঞ্ঞূনং, বহুঞ্চ অপুঞ্ঞং পসৰতী’’তি. ততিযং.

৪. সমণসুখুমালসুত্তং

১০৪. ‘‘পঞ্চহি, ভিক্খৰে, ধম্মেহি সমন্নাগতো ভিক্খু সমণেসু সমণসুখুমালো হোতি.

‘‘কতমেহি পঞ্চহি? ইধ, ভিক্খৰে, ভিক্খু যাচিতোৰ বহুলং চীৰরং পরিভুঞ্জতি, অপ্পং অযাচিতো; যাচিতোৰ বহুলং পিণ্ডপাতং পরিভুঞ্জতি, অপ্পং অযাচিতো; যাচিতোৰ বহুলং সেনাসনং পরিভুঞ্জতি, অপ্পং অযাচিতো; যাচিতোৰ বহুলং গিলানপ্পচ্চযভেসজ্জপরিক্খারং পরিভুঞ্জতি, অপ্পং অযাচিতো. যেহি খো পন সব্রহ্মচারীহি সদ্ধিং ৰিহরতি, ত্যস্স [ত্যাস্স (ক.) অ. নি. ৪.৮৭] মনাপেনেৰ বহুলং কাযকম্মেন সমুদাচরন্তি, অপ্পং অমনাপেন; মনাপেনেৰ বহুলং ৰচীকম্মেন সমুদাচরন্তি, অপ্পং অমনাপেন; মনাপেনেৰ বহুলং মনোকম্মেন সমুদাচরন্তি, অপ্পং অমনাপেন; মনাপংযেৰ উপহারং উপহরন্তি, অপ্পং অমনাপং. যানি খো পন তানি ৰেদযিতানি পিত্তসমুট্ঠানানি ৰা সেম্হসমুট্ঠানানি ৰা ৰাতসমুট্ঠানানি ৰা সন্নিপাতিকানি ৰা উতুপরিণামজানি ৰা ৰিসমপরিহারজানি ৰা ওপক্কমিকানি ৰা কম্মৰিপাকজানি ৰা, তানিস্স ন বহুদেৰ উপ্পজ্জন্তি. অপ্পাবাধো হোতি, চতুন্নং ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী, আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি. ইমেহি খো, ভিক্খৰে, পঞ্চহি ধম্মেহি সমন্নাগতো ভিক্খু সমণেসু সমণসুখুমালো হোতি.

‘‘যঞ্হি তং, ভিক্খৰে, সম্মা ৰদমানো ৰদেয্য – ‘সমণেসু সমণসুখুমালো’তি, মমেৰ তং, ভিক্খৰে, সম্মা [মমেৰ তং সম্মা (?)] ৰদমানো ৰদেয্য – ‘সমণেসু সমণসুখুমালো’তি. অহঞ্হি, ভিক্খৰে, যাচিতোৰ বহুলং চীৰরং পরিভুঞ্জামি, অপ্পং অযাচিতো; যাচিতোৰ বহুলং পিণ্ডপাতং পরিভুঞ্জামি, অপ্পং অযাচিতো; যাচিতোৰ বহুলং সেনাসনং পরিভুঞ্জামি, অপ্পং অযাচিতো; যাচিতোৰ বহুলং গিলানপ্পচ্চযভেসজ্জপরিক্খারং পরিভুঞ্জামি, অপ্পং অযাচিতো. যেহি খো পন ভিক্খূহি সদ্ধিং ৰিহরামি, তে মং মনাপেনেৰ বহুলং কাযকম্মেন সমুদাচরন্তি, অপ্পং অমনাপেন; মনাপেনেৰ বহুলং ৰচীকম্মেন সমুদাচরন্তি, অপ্পং অমনাপেন; মনাপেনেৰ বহুলং মনোকম্মেন সমুদাচরন্তি, অপ্পং অমনাপেন; মনাপংযেৰ উপহারং উপহরন্তি, অপ্পং অমনাপং. যানি খো পন তানি ৰেদযিতানি – পিত্তসমুট্ঠানানি ৰা সেম্হসমুট্ঠানানি ৰা ৰাতসমুট্ঠানানি ৰা সন্নিপাতিকানি ৰা উতুপরিণামজানি ৰা ৰিসমপরিহারজানি ৰা ওপক্কমিকানি ৰা কম্মৰিপাকজানি ৰা – তানি মে ন বহুদেৰ উপ্পজ্জন্তি. অপ্পাবাধোহমস্মি, চতুন্নং খো পনস্মি [চতুন্নং খো পন (সী.), চতুন্নং (স্যা. পী.)] ঝানানং আভিচেতসিকানং দিট্ঠধম্মসুখৰিহারানং নিকামলাভী [নিকামলাভী হোমি (সী. ক.)] অকিচ্ছলাভী অকসিরলাভী, আসৰানং খযা…পে… সচ্ছিকত্ৰা উপসম্পজ্জ ৰিহরামি.

‘‘যঞ্হি তং, ভিক্খৰে, সম্মা ৰদমানো ৰদেয্য – ‘সমণেসু সমণসুখুমালো’তি, মমেৰ তং, ভিক্খৰে, সম্মা ৰদমানো ৰদেয্য – ‘সমণেসু সমণসুখুমালো’’’তি. চতুত্থং.

৫. ফাসুৰিহারসুত্তং

১০৫. ‘‘পঞ্চিমে, ভিক্খৰে, ফাসুৰিহারা. কতমে পঞ্চ? ইধ, ভিক্খৰে, ভিক্খুনো মেত্তং কাযকম্মং পচ্চুপট্ঠিতং হোতি সব্রহ্মচারীসু আৰি চেৰ রহো চ, মেত্তং ৰচীকম্মং…পে… মেত্তং মনোকম্মং পচ্চুপট্ঠিতং হোতি সব্রহ্মচারীসু আৰি চেৰ রহো চ. যানি তানি সীলানি অখণ্ডানি অচ্ছিদ্দানি অসবলানি অকম্মাসানি ভুজিস্সানি ৰিঞ্ঞুপ্পসত্থানি অপরামট্ঠানি সমাধিসংৰত্তনিকানি, তথারূপেহি সীলেহি সীলসামঞ্ঞগতো ৰিহরতি সব্রহ্মচারীহি আৰি চেৰ রহো চ. যাযং দিট্ঠি অরিযা নিয্যানিকা নিয্যাতি তক্করস্স সম্মা দুক্খক্খযায, তথারূপায দিট্ঠিযা দিট্ঠিসামঞ্ঞগতো ৰিহরতি সব্রহ্মচারীহি আৰি চেৰ রহো চ. ইমে খো, ভিক্খৰে, পঞ্চ ফাসুৰিহারা’’তি. পঞ্চমং.

৬. আনন্দসুত্তং

১০৬. একং সমযং ভগৰা কোসম্বিযং ৰিহরতি ঘোসিতারামে. অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা আনন্দো ভগৰন্তং এতদৰোচ –

‘‘কিত্তাৰতা নু খো, ভন্তে, ভিক্খু সঙ্ঘে [ভিক্খুংসংঘো (স্যা. পী.)] ৰিহরন্তো ফাসুং ৰিহরেয্যা’’তি? ‘‘যতো খো, আনন্দ, ভিক্খু অত্তনা [অত্তনা চ (পী. ক.)] সীলসম্পন্নো হোতি, নো [নো চ (ক.)] পরং অধিসীলে সম্পৰত্তা [সম্পৰত্তা হোতি (ক.)]; এত্তাৰতাপি খো, আনন্দ, ভিক্খু সঙ্ঘে ৰিহরন্তো ফাসুং ৰিহরেয্যা’’তি.

‘‘সিযা পন, ভন্তে, অঞ্ঞোপি পরিযাযো যথা ভিক্খু সঙ্ঘে ৰিহরন্তো ফাসুং ৰিহরেয্যা’’তি? ‘‘সিযা, আনন্দ [আনন্দাতি ভগৰা আৰোচ (স্যা. পী.)]! যতো খো, আনন্দ, ভিক্খু অত্তনা সীলসম্পন্নো হোতি, নো পরং অধিসীলে সম্পৰত্তা; অত্তানুপেক্খী চ হোতি, নো পরানুপেক্খী; এত্তাৰতাপি খো, আনন্দ, ভিক্খু সঙ্ঘে ৰিহরন্তো ফাসুং ৰিহরেয্যা’’তি.

‘‘সিযা পন, ভন্তে, অঞ্ঞোপি পরিযাযো যথা ভিক্খু সঙ্ঘে ৰিহরন্তো ফাসুং ৰিহরেয্যা’’তি? ‘‘সিযা, আনন্দ! যতো খো, আনন্দ, ভিক্খু অত্তনা সীলসম্পন্নো হোতি, নো পরং অধিসীলে সম্পৰত্তা; অত্তানুপেক্খী চ হোতি, নো পরানুপেক্খী; অপঞ্ঞাতো চ হোতি, তেন চ অপঞ্ঞাতকেন নো পরিতস্সতি; এত্তাৰতাপি খো, আনন্দ, ভিক্খু সঙ্ঘে ৰিহরন্তো ফাসুং ৰিহরেয্যা’’তি.

‘‘সিযা পন, ভন্তে, অঞ্ঞোপি পরিযাযো যথা ভিক্খু সঙ্ঘে ৰিহরন্তো ফাসুং ৰিহরেয্যা’’তি? ‘‘সিযা, আনন্দ! যতো খো, আনন্দ, ভিক্খু অত্তনা সীলসম্পন্নো হোতি, নো পরং অধিসীলে সম্পৰত্তা; অত্তানুপেক্খী চ হোতি, নো পরানুপেক্খী; অপঞ্ঞাতো চ হোতি, তেন চ অপঞ্ঞাতকেন নো পরিতস্সতি; চতুন্নঞ্চ [চতুন্নং (পী. ক.)] ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী; এত্তাৰতাপি খো, আনন্দ, ভিক্খু সঙ্ঘে ৰিহরন্তো ফাসুং ৰিহরেয্যা’’তি.

‘‘সিযা পন, ভন্তে, অঞ্ঞোপি পরিযাযো যথা ভিক্খু সঙ্ঘে ৰিহরন্তো ফাসুং ৰিহরেয্যা’’তি? ‘‘সিযা, আনন্দ! যতো খো, আনন্দ, ভিক্খু অত্তনা সীলসম্পন্নো হোতি, নো পরং অধিসীলে সম্পৰত্তা; অত্তানুপেক্খী চ হোতি, নো পরানুপেক্খী; অপঞ্ঞাতো চ হোতি, তেন চ অপঞ্ঞাতকেন নো পরিতস্সতি; চতুন্নঞ্চ ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী; আসৰানঞ্চ [আসৰানং (সী. পী. ক.)] খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি; এত্তাৰতাপি খো, আনন্দ, ভিক্খু সঙ্ঘে ৰিহরন্তো ফাসুং ৰিহরেয্য.

‘‘ইমম্হা চাহং, আনন্দ, ফাসুৰিহারা অঞ্ঞো ফাসুৰিহারো উত্তরিতরো ৰা পণীততরো ৰা নত্থীতি ৰদামী’’তি. ছট্ঠং.

৭. সীলসুত্তং

১০৭. ‘‘পঞ্চহি, ভিক্খৰে, ধম্মেহি সমন্নাগতো ভিক্খু আহুনেয্যো হোতি পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্স.

‘‘কতমেহি পঞ্চহি? ইধ, ভিক্খৰে, ভিক্খু সীলসম্পন্নো হোতি, সমাধিসম্পন্নো হোতি, পঞ্ঞাসম্পন্নো হোতি, ৰিমুত্তিসম্পন্নো হোতি, ৰিমুত্তিঞাণদস্সনসম্পন্নো হোতি.

‘‘ইমেহি খো, ভিক্খৰে, পঞ্চহি ধম্মেহি সমন্নাগতো ভিক্খু আহুনেয্যো হোতি পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্সা’’তি. সত্তমং.

৮. অসেখসুত্তং

১০৮. ‘‘পঞ্চহি, ভিক্খৰে, ধম্মেহি সমন্নাগতো ভিক্খু আহুনেয্যো হোতি পাহুনেয্যো দক্খিণেয্যো…পে… অনুত্তরং পুঞ্ঞক্খেত্তং লোকস্স.

‘‘কতমেহি, পঞ্চহি? ইধ, ভিক্খৰে, ভিক্খু অসেখেন সীলক্খন্ধেন সমন্নাগতো হোতি, অসেখেন সমাধিক্খন্ধেন সমন্নাগতো হোতি, অসেখেন পঞ্ঞাক্খন্ধেন সমন্নাগতো হোতি, অসেখেন ৰিমুত্তিক্খন্ধেন সমন্নাগতো হোতি, অসেখেন ৰিমুত্তিঞাণদস্সনক্খন্ধেন সমন্নাগতো হোতি. ইমেহি খো, ভিক্খৰে, পঞ্চহি ধম্মেহি সমন্নাগতো ভিক্খু আহুনেয্যো হোতি…পে… অনুত্তরং পুঞ্ঞক্খেত্তং লোকস্সা’’তি. অট্ঠমং.

৯. চাতুদ্দিসসুত্তং

১০৯. ‘‘পঞ্চহি, ভিক্খৰে, ধম্মেহি সমন্নাগতো ভিক্খু চাতুদ্দিসো হোতি. কতমেহি পঞ্চহি? ইধ, ভিক্খৰে, ভিক্খু সীলৰা হোতি, পাতিমোক্খসংৰরসংৰুতো ৰিহরতি আচারগোচরসম্পন্নো অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু; বহুস্সুতো হোতি সুতধরো সুতসন্নিচযো, যে তে ধম্মা আদিকল্যাণা মজ্ঝেকল্যাণা পরিযোসানকল্যাণা সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং অভিৰদন্তি, তথারূপাস্স ধম্মা বহুস্সুতা হোন্তি ধাতা ৰচসা পরিচিতা মনসানুপেক্খিতা দিট্ঠিযা সুপ্পটিৰিদ্ধা; সন্তুট্ঠো হোতি ইতরীতরচীৰরপিণ্ডপাতসেনাসনগিলানপ্পচ্চযভেসজ্জপরিক্খারেন; চতুন্নং ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী; আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি. ইমেহি, খো, ভিক্খৰে, পঞ্চহি ধম্মেহি সমন্নাগতো ভিক্খু চাতুদ্দিসো হোতী’’তি. নৰমং.

১০. অরঞ্ঞসুত্তং

১১০. ‘‘পঞ্চহি, ভিক্খৰে, ধম্মেহি সমন্নাগতো ভিক্খু অলং অরঞ্ঞৰনপত্থানি পন্তানি সেনাসনানি পটিসেৰিতুং. কতমেহি পঞ্চহি? ইধ, ভিক্খৰে, ভিক্খু সীলৰা হোতি…পে… সমাদায সিক্খতি সিক্খাপদেসু; বহুস্সুতো হোতি…পে… দিট্ঠিযা সুপ্পটিৰিদ্ধা; আরদ্ধৰীরিযো ৰিহরতি থামৰা দল়্হপরক্কমো অনিক্খিত্তধুরো কুসলেসু ধম্মেসু; চতুন্নং ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী; আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি. ইমেহি খো, ভিক্খৰে, পঞ্চহি ধম্মেহি সমন্নাগতো ভিক্খু অলং অরঞ্ঞৰনপত্থানি পন্তানি সেনাসনানি পটিসেৰিতু’’ন্তি. দসমং.

ফাসুৰিহারৰগ্গো পঠমো.