৮. দুতিযঅনাগতভযসুত্তং

৭৮. ‘‘পঞ্চিমানি, ভিক্খৰে, অনাগতভযানি সম্পস্সমানেন অলমেৰ ভিক্খুনা অপ্পমত্তেন আতাপিনা পহিতত্তেন ৰিহরিতুং অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায. কতমানি পঞ্চ? ইধ, ভিক্খৰে, ভিক্খু ইতি পটিসঞ্চিক্খতি – ‘অহং খো এতরহি দহরো যুৰা সুসুকাল়কেসো ভদ্রেন যোব্বনেন সমন্নাগতো পঠমেন ৰযসা. হোতি খো পন সো সমযো যং ইমং কাযং জরা ফুসতি. জিণ্ণেন খো পন জরায অভিভূতেন ন সুকরং বুদ্ধানং সাসনং মনসি কাতুং, ন সুকরানি অরঞ্ঞৰনপত্থানি পন্তানি সেনাসনানি পটিসেৰিতুং. পুরা মং সো ধম্মো আগচ্ছতি অনিট্ঠো অকন্তো অমনাপো; হন্দাহং পটিকচ্চেৰ [পটিগচ্চেৰ (সী.)] ৰীরিযং আরভামি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায, যেনাহং ধম্মেন সমন্নাগতো জিণ্ণকোপি ফাসুং [ফাসু (পী. ক.)] ৰিহরিস্সামী’তি. ইদং, ভিক্খৰে, পঠমং অনাগতভযং সম্পস্সমানেন অলমেৰ ভিক্খুনা অপ্পমত্তেন আতাপিনা পহিতত্তেন ৰিহরিতুং অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায.

‘‘পুন চপরং, ভিক্খৰে, ভিক্খু ইতি পটিসঞ্চিক্খতি – ‘অহং খো এতরহি অপ্পাবাধো অপ্পাতঙ্কো সমৰেপাকিনিযা গহণিযা সমন্নাগতো নাতিসীতায নাচ্চুণ্হায মজ্ঝিমায পধানক্খমায. হোতি খো পন সো সমযো যং ইমং কাযং ব্যাধি ফুসতি. ব্যাধিতেন খো পন ব্যাধিনা অভিভূতেন [ব্যাধাভিভূতেন (সী. পী. ক.)] ন সুকরং বুদ্ধানং সাসনং মনসি কাতুং, ন সুকরানি অরঞ্ঞৰনপত্থানি পন্তানি সেনাসনানি পটিসেৰিতুং. পুরা মং সো ধম্মো আগচ্ছতি অনিট্ঠো অকন্তো অমনাপো; হন্দাহং পটিকচ্চেৰ ৰীরিযং আরভামি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায, যেনাহং ধম্মেন সমন্নাগতো ব্যাধিতোপি ফাসুং ৰিহরিস্সামী’তি. ইদং, ভিক্খৰে, দুতিযং অনাগতভযং সম্পস্সমানেন অলমেৰ ভিক্খুনা অপ্পমত্তেন আতাপিনা পহিতত্তেন ৰিহরিতুং অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায.

‘‘পুন চপরং, ভিক্খৰে, ভিক্খু ইতি পটিসঞ্চিক্খতি – ‘এতরহি খো সুভিক্খং সুসস্সং সুলভপিণ্ডং, সুকরং উঞ্ছেন পগ্গহেন যাপেতুং. হোতি খো পন সো সমযো যং দুব্ভিক্খং হোতি দুস্সস্সং দুল্লভপিণ্ডং, ন সুকরং উঞ্ছেন পগ্গহেন যাপেতুং. দুব্ভিক্খে খো পন মনুস্সা যেন সুভিক্খং তেন সঙ্কমন্তি [তেনুপসঙ্কমন্তি (ক.)]. তত্থ সঙ্গণিকৰিহারো হোতি আকিণ্ণৰিহারো. সঙ্গণিকৰিহারে খো পন সতি আকিণ্ণৰিহারে ন সুকরং বুদ্ধানং সাসনং মনসি কাতুং, ন সুকরানি অরঞ্ঞৰনপত্থানি পন্তানি সেনাসনানি পটিসেৰিতুং. পুরা মং সো ধম্মো আগচ্ছতি অনিট্ঠো অকন্তো অমনাপো; হন্দাহং পটিকচ্চেৰ ৰীরিযং আরভামি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায, যেনাহং ধম্মেন সমন্নাগতো দুব্ভিক্খেপি ফাসু ৰিহরিস্সামী’তি. ইদং, ভিক্খৰে, ততিযং অনাগতভযং সম্পস্সমানেন অলমেৰ ভিক্খুনা অপ্পমত্তেন আতাপিনা পহিতত্তেন ৰিহরিতুং অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায.

‘‘পুন চপরং, ভিক্খৰে, ভিক্খু ইতি পটিসঞ্চিক্খতি – ‘এতরহি খো মনুস্সা সমগ্গা সম্মোদমানা অৰিৰদমানা খীরোদকীভূতা অঞ্ঞমঞ্ঞং পিযচক্খূহি সম্পস্সন্তা ৰিহরন্তি. হোতি খো পন সো সমযো যং ভযং হোতি অটৰিসঙ্কোপো, চক্কসমারূল়্হা জানপদা পরিযাযন্তি. ভযে খো পন সতি মনুস্সা যেন খেমং তেন সঙ্কমন্তি. তত্থ সঙ্গণিকৰিহারো হোতি আকিণ্ণৰিহারো. সঙ্গণিকৰিহারে খো পন সতি আকিণ্ণৰিহারে ন সুকরং বুদ্ধানং সাসনং মনসি কাতুং, ন সুকরানি অরঞ্ঞৰনপত্থানি পন্তানি সেনাসনানি পটিসেৰিতুং. পুরা মং সো ধম্মো আগচ্ছতি অনিট্ঠো অকন্তো অমনাপো; হন্দাহং পটিকচ্চেৰ ৰীরিযং আরভামি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায, যেনাহং ধম্মেন সমন্নাগতো ভযেপি ফাসুং ৰিহরিস্সামী’তি. ইদং, ভিক্খৰে, চতুত্থং অনাগতভযং সম্পস্সমানেন অলমেৰ ভিক্খুনা অপ্পমত্তেন আতাপিনা পহিতত্তেন ৰিহরিতুং অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায.

‘‘পুন চপরং, ভিক্খৰে, ভিক্খু ইতি পটিসঞ্চিক্খতি – ‘এতরহি খো সঙ্ঘো সমগ্গো সম্মোদমানো অৰিৰদমানো একুদ্দেসো ফাসু ৰিহরতি. হোতি খো পন সো সমযো যং সঙ্ঘো ভিজ্জতি. সঙ্ঘে খো পন ভিন্নে ন সুকরং বুদ্ধানং সাসনং মনসি কাতুং, ন সুকরানি অরঞ্ঞৰনপত্থানি পন্তানি সেনাসনানি পটিসেৰিতুং. পুরা মং সো ধম্মো আগচ্ছতি অনিট্ঠো অকন্তো অমনাপো; হন্দাহং পটিকচ্চেৰ ৰীরিযং আরভামি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায, যেনাহং ধম্মেন সমন্নাগতো ভিন্নেপি সঙ্ঘে ফাসুং ৰিহরিস্সামী’তি. ইদং, ভিক্খৰে, পঞ্চমং অনাগতভযং সম্পস্সমানেন অলমেৰ ভিক্খুনা অপ্পমত্তেন আতাপিনা পহিতত্তেন ৰিহরিতুং অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায.

‘‘ইমানি খো, ভিক্খৰে, পঞ্চ অনাগতভযানি সম্পস্সমানেন অলমেৰ ভিক্খুনা অপ্পমত্তেন আতাপিনা পহিতত্তেন ৰিহরিতুং অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযাযা’’তি. অট্ঠমং.