৯. ততিযঅনাগতভযসুত্তং

৭৯. ‘‘পঞ্চিমানি, ভিক্খৰে, অনাগতভযানি এতরহি অসমুপ্পন্নানি আযতিং সমুপ্পজ্জিস্সন্তি. তানি ৰো [খো (কত্থচি)] পটিবুজ্ঝিতব্বানি; পটিবুজ্ঝিত্ৰা চ তেসং পহানায ৰাযমিতব্বং.

‘‘কতমানি পঞ্চ? ভৰিস্সন্তি, ভিক্খৰে, ভিক্খূ অনাগতমদ্ধানং অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা. তে অভাৰিতকাযা সমানা অভাৰিতসীলা অভাৰিতচিত্তা অভাৰিতপঞ্ঞা অঞ্ঞে উপসম্পাদেস্সন্তি. তেপি [তে (সী.)] ন সক্খিস্সন্তি ৰিনেতুং অধিসীলে অধিচিত্তে অধিপঞ্ঞায. তেপি ভৰিস্সন্তি অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা. তে অভাৰিতকাযা সমানা অভাৰিতসীলা অভাৰিতচিত্তা অভাৰিতপঞ্ঞা অঞ্ঞে উপসম্পাদেস্সন্তি. তেপি [তে (?)] ন সক্খিস্সন্তি ৰিনেতুং অধিসীলে অধিচিত্তে অধিপঞ্ঞায. তেপি ভৰিস্সন্তি অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা. ইতি খো, ভিক্খৰে, ধম্মসন্দোসা ৰিনযসন্দোসো; ৰিনযসন্দোসা ধম্মসন্দোসো. ইদং, ভিক্খৰে, পঠমং অনাগতভযং এতরহি অসমুপ্পন্নং আযতিং সমুপ্পজ্জিস্সতি. তং ৰো পটিবুজ্ঝিতব্বং; পটিবুজ্ঝিত্ৰা চ তস্স পহানায ৰাযমিতব্বং.

‘‘পুন চপরং, ভিক্খৰে, ভৰিস্সন্তি ভিক্খূ অনাগতমদ্ধানং অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা. তে অভাৰিতকাযা সমানা অভাৰিতসীলা অভাৰিতচিত্তা অভাৰিতপঞ্ঞা অঞ্ঞেসং নিস্সযং দস্সন্তি. তেপি ন সক্খিস্সন্তি ৰিনেতুং অধিসীলে অধিচিত্তে অধিপঞ্ঞায. তেপি ভৰিস্সন্তি অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা. তে অভাৰিতকাযা সমানা অভাৰিতসীলা অভাৰিতচিত্তা অভাৰিতপঞ্ঞা অঞ্ঞেসং নিস্সযং দস্সন্তি. তেপি ন সক্খিস্সন্তি ৰিনেতুং অধিসীলে অধিচিত্তে অধিপঞ্ঞায. তেপি ভৰিস্সন্তি অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা. ইতি খো, ভিক্খৰে, ধম্মসন্দোসা ৰিনযসন্দোসো; ৰিনযসন্দোসা ধম্মসন্দোসো. ইদং, ভিক্খৰে, দুতিযং অনাগতভযং এতরহি অসমুপ্পন্নং আযতিং সমুপ্পজ্জিস্সতি. তং ৰো পটিবুজ্ঝিতব্বং; পটিবুজ্ঝিত্ৰা চ তস্স পহানায ৰাযমিতব্বং.

‘‘পুন চপরং, ভিক্খৰে, ভৰিস্সন্তি ভিক্খূ অনাগতমদ্ধানং অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা. তে অভাৰিতকাযা সমানা অভাৰিতসীলা অভাৰিতচিত্তা অভাৰিতপঞ্ঞা অভিধম্মকথং ৰেদল্লকথং কথেন্তা কণ্হধম্মং ওক্কমমানা ন বুজ্ঝিস্সন্তি. ইতি খো, ভিক্খৰে, ধম্মসন্দোসা ৰিনযসন্দোসো; ৰিনযসন্দোসা ধম্মসন্দোসো. ইদং, ভিক্খৰে, ততিযং অনাগতভযং এতরহি অসমুপ্পন্নং আযতিং সমুপ্পজ্জিস্সতি. তং ৰো পটিবুজ্ঝিতব্বং; পটিবুজ্ঝিত্ৰা চ তস্স পহানায ৰাযমিতব্বং.

‘‘পুন চপরং, ভিক্খৰে, ভৰিস্সন্তি ভিক্খূ অনাগতমদ্ধানং অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা. তে অভাৰিতকাযা সমানা অভাৰিতসীলা অভাৰিতচিত্তা অভাৰিতপঞ্ঞা যে তে সুত্তন্তা তথাগতভাসিতা গম্ভীরা গম্ভীরত্থা লোকুত্তরা সুঞ্ঞতাপ্পটিসংযুত্তা, তেসু ভঞ্ঞমানেসু ন সুস্সূসিস্সন্তি, ন সোতং ওদহিস্সন্তি, ন অঞ্ঞা চিত্তং উপট্ঠপেস্সন্তি, ন চ তে ধম্মে উগ্গহেতব্বং পরিযাপুণিতব্বং মঞ্ঞিস্সন্তি. যে পন তে সুত্তন্তা কৰিতা [কৰিকতা (সী. স্যা. কং. পী., সং. নি. ২.২২৯) টীকা ওলোকেতব্বা] কাৰেয্যা চিত্তক্খরা চিত্তব্যঞ্জনা বাহিরকা সাৰকভাসিতা, তেসু ভঞ্ঞমানেসু সুস্সূসিস্সন্তি, সোতং ওদহিস্সন্তি, অঞ্ঞা চিত্তং উপট্ঠপেস্সন্তি, তে চ ধম্মে উগ্গহেতব্বং পরিযাপুণিতব্বং মঞ্ঞিস্সন্তি. ইতি খো, ভিক্খৰে, ধম্মসন্দোসা ৰিনযসন্দোসো; ৰিনযসন্দোসা ধম্মসন্দোসো. ইদং, ভিক্খৰে, চতুত্থং অনাগতভযং এতরহি অসমুপ্পন্নং আযতিং সমুপ্পজ্জিস্সতি. তং ৰো পটিবুজ্ঝিতব্বং; পটিবুজ্ঝিত্ৰা চ তস্স পহানায ৰাযমিতব্বং.

‘‘পুন চপরং, ভিক্খৰে, ভৰিস্সন্তি ভিক্খূ অনাগতমদ্ধানং অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা. তে অভাৰিতকাযা সমানা অভাৰিতসীলা অভাৰিতচিত্তা অভাৰিতপঞ্ঞা থেরা ভিক্খূ বাহুলিকা [বাহুল্লিকা (স্যা. কং.) অ. নি. ২.৪৯; ৩.৯৬] ভৰিস্সন্তি সাথলিকা ওক্কমনে পুব্বঙ্গমা পৰিৰেকে নিক্খিত্তধুরা, ন ৰীরিযং আরভিস্সন্তি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায. তেসং পচ্ছিমা জনতা দিট্ঠানুগতিং আপজ্জিস্সতি. সাপি ভৰিস্সতি বাহুলিকা সাথলিকা ওক্কমনে পুব্বঙ্গমা পৰিৰেকে নিক্খিত্তধুরা, ন ৰীরিযং আরভিস্সতি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায. ইতি খো, ভিক্খৰে, ধম্মসন্দোসা ৰিনযসন্দোসো; ৰিনযসন্দোসা ধম্মসন্দোসো. ইদং, ভিক্খৰে, পঞ্চমং অনাগতভযং এতরহি অসমুপ্পন্নং আযতিং সমুপ্পজ্জিস্সতি. তং ৰো পটিবুজ্ঝিতব্বং; পটিবুজ্ঝিত্ৰা চ তস্স পহানায ৰাযমিতব্বং. ‘‘ইমানি খো, ভিক্খৰে, পঞ্চ অনাগতভযানি এতরহি অসমুপ্পন্নানি আযতিং সমুপ্পজ্জিস্সন্তি. তানি ৰো পটিবুজ্ঝিতব্বানি; পটিবুজ্ঝিত্ৰা চ তেসং পহানায ৰাযমিতব্ব’’ন্তি. নৰমং.