৭. পঠমঅনাগতভযসুত্তং

৭৭. ‘‘পঞ্চিমানি, ভিক্খৰে, অনাগতভযানি সম্পস্সমানেন অলমেৰ আরঞ্ঞিকেন [আরঞ্ঞকেন (সব্বত্থ অ. নি. ৫.১৮১; পরি. ৪৪৩)] ভিক্খুনা অপ্পমত্তেন আতাপিনা পহিতত্তেন ৰিহরিতুং অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায.

‘‘কতমানি পঞ্চ? ইধ, ভিক্খৰে, আরঞ্ঞিকো ভিক্খু ইতি পটিসঞ্চিক্খতি – ‘অহং খো এতরহি এককো অরঞ্ঞে ৰিহরামি. এককং খো পন মং [এককং খো পন (স্যা. কং.)] অরঞ্ঞে ৰিহরন্তং অহি ৰা মং ডংসেয্য, ৰিচ্ছিকো [ৰিচ্ছিকা (স্যা.)] ৰা মং ডংসেয্য, সতপদী ৰা মং ডংসেয্য, তেন মে অস্স কালঙ্কিরিযা, সো মমস্স অন্তরাযো; হন্দাহং ৰীরিযং আরভামি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযাযা’তি. ইদং, ভিক্খৰে, পঠমং অনাগতভযং সম্পস্সমানেন অলমেৰ আরঞ্ঞিকেন ভিক্খুনা অপ্পমত্তেন আতাপিনা পহিতত্তেন ৰিহরিতুং অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায.

‘‘পুন চপরং, ভিক্খৰে, আরঞ্ঞিকো ভিক্খু ইতি পটিসঞ্চিক্খতি – ‘অহং খো এতরহি এককো অরঞ্ঞে ৰিহরামি. এককো খো পনাহং অরঞ্ঞে ৰিহরন্তো উপক্খলিত্ৰা ৰা পপতেয্যং, ভত্তং ৰা ভুত্তং মে ব্যাপজ্জেয্য, পিত্তং ৰা মে কুপ্পেয্য, সেম্হং ৰা মে কুপ্পেয্য, সত্থকা ৰা মে ৰাতা কুপ্পেয্যুং, তেন মে অস্স কালঙ্কিরিযা, সো মমস্স অন্তরাযো; হন্দাহং ৰীরিযং আরভামি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযাযা’তি. ইদং, ভিক্খৰে, দুতিযং অনাগতভযং সম্পস্সমানেন অলমেৰ আরঞ্ঞিকেন ভিক্খুনা অপ্পমত্তেন আতাপিনা পহিতত্তেন ৰিহরিতুং অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায.

‘‘পুন চপরং, ভিক্খৰে, আরঞ্ঞিকো ভিক্খু ইতি পটিসঞ্চিক্খতি – ‘অহং খো এতরহি এককো অরঞ্ঞে ৰিহরামি. এককো খো পনাহং অরঞ্ঞে ৰিহরন্তো ৰাল়েহি সমাগচ্ছেয্যং, সীহেন ৰা ব্যগ্ঘেন ৰা দীপিনা ৰা অচ্ছেন ৰা তরচ্ছেন ৰা, তে মং জীৰিতা ৰোরোপেয্যুং, তেন মে অস্স কালঙ্কিরিযা, সো মমস্স অন্তরাযো; হন্দাহং ৰীরিযং আরভামি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযাযা’তি. ইদং, ভিক্খৰে, ততিযং অনাগতভযং সম্পস্সমানেন অলমেৰ আরঞ্ঞিকেন ভিক্খুনা অপ্পমত্তেন আতাপিনা পহিতত্তেন ৰিহরিতুং অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায.

‘‘পুন চপরং, ভিক্খৰে, আরঞ্ঞিকো ভিক্খু ইতি পটিসঞ্চিক্খতি – ‘অহং খো এতরহি এককো অরঞ্ঞে ৰিহরামি. এককো খো পনাহং অরঞ্ঞে ৰিহরন্তো মাণৰেহি সমাগচ্ছেয্যং কতকম্মেহি ৰা অকতকম্মেহি ৰা, তে মং জীৰিতা ৰোরোপেয্যুং, তেন মে অস্স কালঙ্কিরিযা, সো মমস্স অন্তরাযো; হন্দাহং ৰীরিযং আরভামি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযাযা’তি. ইদং, ভিক্খৰে, চতুত্থং অনাগতভযং সম্পস্সমানেন অলমেৰ আরঞ্ঞিকেন ভিক্খুনা অপ্পমত্তেন আতাপিনা পহিতত্তেন ৰিহরিতুং অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায.

‘‘পুন চপরং, ভিক্খৰে, আরঞ্ঞিকো ভিক্খু ইতি পটিসঞ্চিক্খতি – ‘অহং খো এতরহি এককো অরঞ্ঞে ৰিহরামি. সন্তি খো পনারঞ্ঞে ৰাল়া অমনুস্সা, তে মং জীৰিতা ৰোরোপেয্যুং, তেন মে অস্স কালঙ্কিরিযা, সো মমস্স অন্তরাযো; হন্দাহং ৰীরিযং আরভামি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযাযা’তি. ইদং, ভিক্খৰে, পঞ্চমং অনাগতভযং সম্পস্সমানেন অলমেৰ আরঞ্ঞিকেন ভিক্খুনা অপ্পমত্তেন আতাপিনা পহিতত্তেন ৰিহরিতুং অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায.

‘‘ইমানি খো, ভিক্খৰে, পঞ্চ অনাগতভযানি সম্পস্সমানেন অলমেৰ আরঞ্ঞিকেন ভিক্খুনা অপ্পমত্তেন আতাপিনা পহিতত্তেন ৰিহরিতুং অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযাযা’’তি. সত্তমং.