৬. দুতিযযোধাজীৰসুত্তং

৭৬. ‘‘পঞ্চিমে, ভিক্খৰে, যোধাজীৰা সন্তো সংৰিজ্জমানা লোকস্মিং. কতমে পঞ্চ? ইধ, ভিক্খৰে, একচ্চো যোধাজীৰো অসিচম্মং গহেত্ৰা ধনুকলাপং সন্নয্হিত্ৰা ৰিযূল়্হং সঙ্গামং ওতরতি. সো তস্মিং সঙ্গামে উস্সহতি ৰাযমতি. তমেনং উস্সহন্তং ৰাযমন্তং পরে হনন্তি পরিযাপাদেন্তি. এৰরূপোপি, ভিক্খৰে, ইধেকচ্চো যোধাজীৰো হোতি. অযং, ভিক্খৰে, পঠমো যোধাজীৰো সন্তো সংৰিজ্জমানো লোকস্মিং.

‘‘পুন চপরং, ভিক্খৰে, ইধেকচ্চো যোধাজীৰো অসিচম্মং গহেত্ৰা ধনুকলাপং সন্নয্হিত্ৰা ৰিযূল়্হং সঙ্গামং ওতরতি. সো তস্মিং সঙ্গামে উস্সহতি ৰাযমতি. তমেনং উস্সহন্তং ৰাযমন্তং পরে উপলিক্খন্তি [উপলিখন্তি (ক.)], তমেনং অপনেন্তি; অপনেত্ৰা ঞাতকানং নেন্তি. সো ঞাতকেহি নীযমানো অপ্পত্ৰাৰ ঞাতকে অন্তরামগ্গে কালং করোতি. এৰরূপোপি, ভিক্খৰে, ইধেকচ্চো যোধাজীৰো হোতি. অযং, ভিক্খৰে, দুতিযো যোধাজীৰো সন্তো সংৰিজ্জমানো লোকস্মিং.

‘‘পুন চপরং, ভিক্খৰে, ইধেকচ্চো যোধাজীৰো অসিচম্মং গহেত্ৰা ধনুকলাপং সন্নয্হিত্ৰা ৰিযূল়্হং সঙ্গামং ওতরতি. সো তস্মিং সঙ্গামে উস্সহতি ৰাযমতি. তমেনং উস্সহন্তং ৰাযমন্তং পরে উপলিক্খন্তি, তমেনং অপনেন্তি; অপনেত্ৰা ঞাতকানং নেন্তি. তমেনং ঞাতকা উপট্ঠহন্তি পরিচরন্তি. সো ঞাতকেহি উপট্ঠহিযমানো পরিচরিযমানো তেনেৰ আবাধেন কালং করোতি. এৰরূপোপি, ভিক্খৰে, ইধেকচ্চো যোধাজীৰো হোতি. অযং, ভিক্খৰে, ততিযো যোধাজীৰো সন্তো সংৰিজ্জমানো লোকস্মিং.

‘‘পুন চপরং, ভিক্খৰে, ইধেকচ্চো যোধাজীৰো অসিচম্মং গহেত্ৰা ধনুকলাপং সন্নয্হিত্ৰা ৰিযূল়্হং সঙ্গামং ওতরতি. সো তস্মিং সঙ্গামে উস্সহতি ৰাযমতি. তমেনং উস্সহন্তং ৰাযমন্তং পরে উপলিক্খন্তি, তমেনং অপনেন্তি; অপনেত্ৰা ঞাতকানং নেন্তি. তমেনং ঞাতকা উপট্ঠহন্তি পরিচরন্তি. সো ঞাতকেহি উপট্ঠহিযমানো পরিচরিযমানো ৰুট্ঠাতি তম্হা আবাধা. এৰরূপোপি, ভিক্খৰে, ইধেকচ্চো যোধাজীৰো হোতি. অযং, ভিক্খৰে, চতুত্থো যোধাজীৰো সন্তো সংৰিজ্জমানো লোকস্মিং.

‘‘পুন চপরং, ভিক্খৰে, ইধেকচ্চো যোধাজীৰো অসিচম্মং গহেত্ৰা ধনুকলাপং সন্নয্হিত্ৰা ৰিযূল়্হং সঙ্গামং ওতরতি. সো তং সঙ্গামং অভিৰিজিনিত্ৰা ৰিজিতসঙ্গামো তমেৰ সঙ্গামসীসং অজ্ঝাৰসতি. এৰরূপোপি, ভিক্খৰে, ইধেকচ্চো যোধাজীৰো হোতি. অযং, ভিক্খৰে, পঞ্চমো যোধাজীৰো সন্তো সংৰিজ্জমানো লোকস্মিং. ইমে খো, ভিক্খৰে, পঞ্চ যোধাজীৰা সন্তো সংৰিজ্জমানা লোকস্মিং.

‘‘এৰমেৰং খো, ভিক্খৰে, পঞ্চিমে যোধাজীৰূপমা পুগ্গলা সন্তো সংৰিজ্জমানা ভিক্খূসু. কতমে পঞ্চ? ইধ, ভিক্খৰে, ভিক্খু অঞ্ঞতরং গামং ৰা নিগমং ৰা উপনিস্সায ৰিহরতি. সো পুব্বণ্হসমযং নিৰাসেত্ৰা পত্তচীৰরমাদায তমেৰ গামং ৰা নিগমং ৰা পিণ্ডায পৰিসতি অরক্খিতেনেৰ কাযেন অরক্খিতায ৰাচায অরক্খিতেন চিত্তেন অনুপট্ঠিতায সতিযা অসংৰুতেহি ইন্দ্রিযেহি. সো তত্থ পস্সতি মাতুগামং দুন্নিৰত্থং ৰা দুপ্পারুতং ৰা. তস্স তং মাতুগামং দিস্ৰা দুন্নিৰত্থং ৰা দুপ্পারুতং ৰা রাগো চিত্তং অনুদ্ধংসেতি. সো রাগানুদ্ধংসিতেন চিত্তেন সিক্খং অপচ্চক্খায দুব্বল্যং অনাৰিকত্ৰা মেথুনং ধম্মং পটিসেৰতি.

‘‘সেয্যথাপি সো, ভিক্খৰে, যোধাজীৰো অসিচম্মং গহেত্ৰা ধনুকলাপং সন্নয্হিত্ৰা ৰিযূল়্হং সঙ্গামং ওতরতি, সো তস্মিং সঙ্গামে উস্সহতি ৰাযমতি, তমেনং উস্সহন্তং ৰাযমন্তং পরে হনন্তি পরিযাপাদেন্তি; তথূপমাহং, ভিক্খৰে, ইমং পুগ্গলং ৰদামি. এৰরূপোপি, ভিক্খৰে, ইধেকচ্চো পুগ্গলো হোতি. অযং, ভিক্খৰে, পঠমো যোধাজীৰূপমো পুগ্গলো সন্তো সংৰিজ্জমানো ভিক্খূসু.

‘‘পুন চপরং, ভিক্খৰে, ভিক্খু অঞ্ঞতরং গামং ৰা নিগমং ৰা উপনিস্সায ৰিহরতি. সো পুব্বণ্হসমযং নিৰাসেত্ৰা পত্তচীৰরমাদায তমেৰ গামং ৰা নিগমং ৰা পিণ্ডায পৰিসতি অরক্খিতেনেৰ কাযেন অরক্খিতায ৰাচায অরক্খিতেন চিত্তেন অনুপট্ঠিতায সতিযা অসংৰুতেহি ইন্দ্রিযেহি. সো তত্থ পস্সতি মাতুগামং দুন্নিৰত্থং ৰা দুপ্পারুতং ৰা. তস্স তং মাতুগামং দিস্ৰা দুন্নিৰত্থং ৰা দুপ্পারুতং ৰা রাগো চিত্তং অনুদ্ধংসেতি. সো রাগানুদ্ধংসিতেন চিত্তেন পরিডয্হতেৰ কাযেন পরিডয্হতি চেতসা. তস্স এৰং হোতি – ‘যংনূনাহং আরামং গন্ত্ৰা ভিক্খূনং আরোচেয্যং – রাগপরিযুট্ঠিতোম্হি [রাগাযিতোম্হি (সী. স্যা. কং)], আৰুসো, রাগপরেতো, ন সক্কোমি ব্রহ্মচরিযং সন্ধারেতুং; সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্তিস্সামী’তি. সো আরামং গচ্ছন্তো অপ্পত্ৰাৰ আরামং অন্তরামগ্গে সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্ততি.

‘‘সেয্যথাপি সো, ভিক্খৰে, যোধাজীৰো অসিচম্মং গহেত্ৰা ধনুকলাপং সন্নয্হিত্ৰা ৰিযূল়্হং সঙ্গামং ওতরতি, সো তস্মিং সঙ্গামে উস্সহতি ৰাযমতি, তমেনং উস্সহন্তং ৰাযমন্তং পরে উপলিক্খন্তি, তমেনং অপনেন্তি; অপনেত্ৰা ঞাতকানং নেন্তি. সো ঞাতকেহি নীযমানো অপ্পত্ৰাৰ ঞাতকে অন্তরামগ্গে কালং করোতি; তথূপমাহং, ভিক্খৰে, ইমং পুগ্গলং ৰদামি. এৰরূপোপি, ভিক্খৰে, ইধেকচ্চো পুগ্গলো হোতি. অযং, ভিক্খৰে, দুতিযো যোধাজীৰূপমো পুগ্গলো সন্তো সংৰিজ্জমানো ভিক্খূসু.

‘‘পুন চপরং, ভিক্খৰে, ভিক্খু অঞ্ঞতরং গামং ৰা নিগমং ৰা উপনিস্সায ৰিহরতি. সো পুব্বণ্হসমযং নিৰাসেত্ৰা পত্তচীৰরমাদায তমেৰ গামং ৰা নিগমং ৰা পিণ্ডায পৰিসতি অরক্খিতেনেৰ কাযেন অরক্খিতায ৰাচায অরক্খিতেন চিত্তেন অনুপট্ঠিতায সতিযা অসংৰুতেহি ইন্দ্রিযেহি. সো তত্থ পস্সতি মাতুগামং দুন্নিৰত্থং ৰা দুপ্পারুতং ৰা. তস্স তং মাতুগামং দিস্ৰা দুন্নিৰত্থং ৰা দুপ্পারুতং ৰা রাগো চিত্তং অনুদ্ধংসেতি. সো রাগানুদ্ধংসিতেন চিত্তেন পরিডয্হতেৰ কাযেন পরিডয্হতি চেতসা. তস্স এৰং হোতি – ‘যংনূনাহং আরামং গন্ত্ৰা ভিক্খূনং আরোচেয্যং – রাগপরিযুট্ঠিতোম্হি, আৰুসো, রাগপরেতো, ন সক্কোমি ব্রহ্মচরিযং সন্ধারেতুং; সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্তিস্সামী’তি. সো আরামং গন্ত্ৰা ভিক্খূনং আরোচেতি – ‘রাগপরিযুট্ঠিতোম্হি, আৰুসো, রাগপরেতো, ন সক্কোমি ব্রহ্মচরিযং সন্ধারেতুং; সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্তিস্সামী’’’তি.

‘‘তমেনং সব্রহ্মচারী ওৰদন্তি অনুসাসন্তি – ‘অপ্পস্সাদা, আৰুসো, কামা ৰুত্তা ভগৰতা বহুদুক্খা বহুপাযাসা [বহূপাযাসা (সী. স্যা. কং. পী.) পাচি. ৪১৭; চূল়ৰ. ৬৫; ম. নি. ১.২৩৪], আদীনৰো এত্থ ভিয্যো. অট্ঠিকঙ্কলূপমা কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো. মংসপেসূপমা কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো. তিণুক্কূপমা কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো. অঙ্গারকাসূপমা কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো. সুপিনকূপমা কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো. যাচিতকূপমা কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো. রুক্খফলূপমা কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো. অসিসূনূপমা কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো. সত্তিসূলূপমা কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো. সপ্পসিরূপমা কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো. অভিরমতাযস্মা ব্রহ্মচরিযে; মাযস্মা সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্তী’’’তি.

‘‘সো সব্রহ্মচারীহি এৰং ওৰদিযমানো এৰং অনুসাসিযমানো এৰমাহ – ‘কিঞ্চাপি, আৰুসো, অপ্পস্সাদা কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো; অথ খো নেৰাহং সক্কোমি ব্রহ্মচরিযং সন্ধারেতুং, সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্তিস্সামী’’’তি. সো সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্ততি.

‘‘সেয্যথাপি সো, ভিক্খৰে, যোধাজীৰো অসিচম্মং গহেত্ৰা ধনুকলাপং সন্নয্হিত্ৰা ৰিযূল়্হং সঙ্গামং ওতরতি, সো তস্মিং সঙ্গামে উস্সহতি ৰাযমতি, তমেনং উস্সহন্তং ৰাযমন্তং পরে উপলিক্খন্তি, তমেনং অপনেন্তি; অপনেত্ৰা ঞাতকানং নেন্তি, তমেনং ঞাতকা উপট্ঠহন্তি পরিচরন্তি. সো ঞাতকেহি উপট্ঠহিযমানো পরিচরিযমানো তেনেৰ আবাধেন কালং করোতি; তথূপমাহং, ভিক্খৰে, ইমং পুগ্গলং ৰদামি. এৰরূপোপি, ভিক্খৰে, ইধেকচ্চো পুগ্গলো হোতি. অযং, ভিক্খৰে, ততিযো যোধাজীৰূপমো পুগ্গলো সন্তো সংৰিজ্জমানো ভিক্খূসু.

‘‘পুন চপরং, ভিক্খৰে, ভিক্খু অঞ্ঞতরং গামং ৰা নিগমং ৰা উপনিস্সায ৰিহরতি. সো পুব্বণ্হসমযং নিৰাসেত্ৰা পত্তচীৰরমাদায তমেৰ গামং ৰা নিগমং ৰা পিণ্ডায পৰিসতি অরক্খিতেনেৰ কাযেন অরক্খিতায ৰাচায অরক্খিতেন চিত্তেন অনুপট্ঠিতায সতিযা অসংৰুতেহি ইন্দ্রিযেহি. সো তত্থ পস্সতি মাতুগামং দুন্নিৰত্থং ৰা দুপ্পারুতং ৰা. তস্স তং মাতুগামং দিস্ৰা দুন্নিৰত্থং ৰা দুপ্পারুতং ৰা রাগো চিত্তং অনুদ্ধংসেতি. সো রাগানুদ্ধংসিতেন চিত্তেন পরিডয্হতেৰ কাযেন পরিডয্হতি চেতসা. তস্স এৰং হোতি – ‘যংনূনাহং আরামং গন্ত্ৰা ভিক্খূনং আরোচেয্যং – রাগপরিযুট্ঠিতোম্হি, আৰুসো, রাগপরেতো, ন সক্কোমি ব্রহ্মচরিযং সন্ধারেতুং; সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্তিস্সামী’তি. সো আরামং গন্ত্ৰা ভিক্খূনং আরোচেতি – ‘রাগপরিযুট্ঠিতোম্হি, আৰুসো, রাগপরেতো, ন সক্কোমি ব্রহ্মচরিযং সন্ধারেতুং; সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্তিস্সামী’’’তি.

‘‘তমেনং সব্রহ্মচারী ওৰদন্তি অনুসাসন্তি – ‘অপ্পস্সাদা, আৰুসো, কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো. অট্ঠিকঙ্কলূপমা কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো. মংসপেসূপমা কামা ৰুত্তা ভগৰতা…পে… তিণুক্কূপমা কামা ৰুত্তা ভগৰতা… অঙ্গারকাসূপমা কামা ৰুত্তা ভগৰতা… সুপিনকূপমা কামা ৰুত্তা ভগৰতা… যাচিতকূপমা কামা ৰুত্তা ভগৰতা… রুক্খফলূপমা কামা ৰুত্তা ভগৰতা… অসিসূনূপমা কামা ৰুত্তা ভগৰতা… সত্তিসূলূপমা কামা ৰুত্তা ভগৰতা… সপ্পসিরূপমা কামা ৰুত্তা ভগৰতা বহুদুক্খা বহুপাযাসা, আদীনৰো এত্থ ভিয্যো. অভিরমতাযস্মা ব্রহ্মচরিযে; মাযস্মা সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্তী’’’তি.

‘‘সো সব্রহ্মচারীহি এৰং ওৰদিযমানো এৰং অনুসাসিযমানো এৰমাহ – ‘উস্সহিস্সামি, আৰুসো, ৰাযমিস্সামি, আৰুসো, অভিরমিস্সামি, আৰুসো! ন দানাহং, আৰুসো, সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্তিস্সামী’’’তি.

‘‘সেয্যথাপি সো, ভিক্খৰে, যোধাজীৰো অসিচম্মং গহেত্ৰা ধনুকলাপং সন্নয্হিত্ৰা ৰিযূল়্হং সঙ্গামং ওতরতি, সো তস্মিং সঙ্গামে উস্সহতি ৰাযমতি, তমেনং উস্সহন্তং ৰাযমন্তং পরে উপলিক্খন্তি, তমেনং অপনেন্তি; অপনেত্ৰা ঞাতকানং নেন্তি, তমেনং ঞাতকা উপট্ঠহন্তি পরিচরন্তি. সো ঞাতকেহি উপট্ঠহিযমানো পরিচরিযমানো ৰুট্ঠাতি তম্হা আবাধা; তথূপমাহং, ভিক্খৰে, ইমং পুগ্গলং ৰদামি. এৰরূপোপি, ভিক্খৰে, ইধেকচ্চো পুগ্গলো হোতি. অযং, ভিক্খৰে, চতুত্থো যোধাজীৰূপমো পুগ্গলো সন্তো সংৰিজ্জমানো ভিক্খূসু.

‘‘পুন চপরং, ভিক্খৰে, ভিক্খু অঞ্ঞতরং গামং ৰা নিগমং ৰা উপনিস্সায ৰিহরতি. সো পুব্বণ্হসমযং নিৰাসেত্ৰা পত্তচীৰরমাদায তমেৰ গামং ৰা নিগমং ৰা পিণ্ডায পৰিসতি রক্খিতেনেৰ কাযেন রক্খিতায ৰাচায রক্খিতেন চিত্তেন উপট্ঠিতায সতিযা সংৰুতেহি ইন্দ্রিযেহি. সো চক্খুনা রূপং দিস্ৰা ন নিমিত্তগ্গাহী হোতি নানুব্যঞ্জনগ্গাহী. যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জতি; রক্খতি চক্খুন্দ্রিযং; চক্খুন্দ্রিযে সংৰরং আপজ্জতি. সোতেন সদ্দং সুত্ৰা… ঘানেন গন্ধং ঘাযিত্ৰা … জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায ন নিমিত্তগ্গাহী হোতি নানুব্যঞ্জনগ্গাহী. যত্ৰাধিকরণমেনং মনিন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জতি; রক্খতি মনিন্দ্রিযং; মনিন্দ্রিযে সংৰরং আপজ্জতি. সো পচ্ছাভত্তং পিণ্ডপাতপটিক্কন্তো ৰিৰিত্তং সেনাসনং ভজতি অরঞ্ঞং রুক্খমূলং পব্বতং কন্দরং গিরিগুহং সুসানং ৰনপত্থং অব্ভোকাসং পলালপুঞ্জং. সো অরঞ্ঞগতো ৰা রুক্খমূলগতো ৰা সুঞ্ঞাগারগতো ৰা নিসীদতি পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা. সো অভিজ্ঝং লোকে পহায…পে… সো ইমে পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে ৰিৰিচ্চেৰ কামেহি…পে… চতুত্থং ঝানং উপসম্পজ্জ ৰিহরতি.

‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে আসৰানং খযঞাণায চিত্তং অভিনিন্নামেতি. সো ‘ইদং দুক্খ’ন্তি যথাভূতং পজানাতি…পে… নাপরং ইত্থত্তাযাতি পজানাতি’’.

‘‘সেয্যথাপি সো, ভিক্খৰে, যোধাজীৰো অসিচম্মং গহেত্ৰা ধনুকলাপং সন্নয্হিত্ৰা ৰিযূল়্হং সঙ্গামং ওতরতি, সো তং সঙ্গামং অভিৰিজিনিত্ৰা ৰিজিতসঙ্গামো তমেৰ সঙ্গামসীসং অজ্ঝাৰসতি; তথূপমাহং, ভিক্খৰে, ইমং পুগ্গলং ৰদামি. এৰরূপোপি, ভিক্খৰে, ইধেকচ্চো পুগ্গলো হোতি. অযং, ভিক্খৰে, পঞ্চমো যোধাজীৰূপমো পুগ্গলো সন্তো সংৰিজ্জমানো ভিক্খূসু. ইমে খো, ভিক্খৰে, পঞ্চ যোধাজীৰূপমা পুগ্গলা সন্তো সংৰিজ্জমানা ভিক্খূসূ’’তি. ছট্ঠং.