৫. পঠমযোধাজীৰসুত্তং

৭৫. ‘‘পঞ্চিমে, ভিক্খৰে, যোধাজীৰা সন্তো সংৰিজ্জমানা লোকস্মিং. কতমে পঞ্চ? ইধ, ভিক্খৰে, একচ্চো যোধাজীৰো রজগ্গঞ্ঞেৰ দিস্ৰা সংসীদতি ৰিসীদতি ন সন্থম্ভতি ন সক্কোতি সঙ্গামং ওতরিতুং. এৰরূপোপি [এৰরূপো (সী.) পু. প. ১৯৩], ভিক্খৰে, ইধেকচ্চো [একচ্চো (সী.)] যোধাজীৰো হোতি. অযং, ভিক্খৰে, পঠমো যোধাজীৰো সন্তো সংৰিজ্জমানো লোকস্মিং.

‘‘পুন চপরং, ভিক্খৰে, ইধেকচ্চো যোধাজীৰো সহতি রজগ্গং; অপি চ খো ধজগ্গঞ্ঞেৰ দিস্ৰা সংসীদতি ৰিসীদতি, ন সন্থম্ভতি, ন সক্কোতি সঙ্গামং ওতরিতুং. এৰরূপোপি, ভিক্খৰে, ইধেকচ্চো যোধাজীৰো হোতি. অযং, ভিক্খৰে, দুতিযো যোধাজীৰো সন্তো সংৰিজ্জমানো লোকস্মিং.

‘‘পুন চপরং, ভিক্খৰে, ইধেকচ্চো যোধাজীৰো সহতি রজগ্গং সহতি ধজগ্গং; অপি চ খো উস্সারণঞ্ঞেৰ [উস্সাদনংযেৰ (সী. পী.)] সুত্ৰা সংসীদতি ৰিসীদতি, ন সন্থম্ভতি, ন সক্কোতি সঙ্গামং ওতরিতুং. এৰরূপোপি, ভিক্খৰে, ইধেকচ্চো যোধাজীৰো হোতি. অযং, ভিক্খৰে, ততিযো যোধাজীৰো সন্তো সংৰিজ্জমানো লোকস্মিং.

‘‘পুন চপরং, ভিক্খৰে, ইধেকচ্চো যোধাজীৰো সহতি রজগ্গং, সহতি ধজগ্গং, সহতি উস্সারণং; অপি চ খো সম্পহারে হঞ্ঞতি [আহঞ্ঞতি (সী.)] ব্যাপজ্জতি. এৰরূপোপি, ভিক্খৰে, ইধেকচ্চো যোধাজীৰো হোতি. অযং, ভিক্খৰে, চতুত্থো যোধাজীৰো সন্তো সংৰিজ্জমানো লোকস্মিং.

‘‘পুন চপরং, ভিক্খৰে, ইধেকচ্চো যোধাজীৰো সহতি রজগ্গং, সহতি ধজগ্গং, সহতি উস্সারণং, সহতি সম্পহারং. সো তং সঙ্গামং অভিৰিজিনিত্ৰা ৰিজিতসঙ্গামো তমেৰ সঙ্গামসীসং অজ্ঝাৰসতি. এৰরূপোপি, ভিক্খৰে, ইধেকচ্চো যোধাজীৰো হোতি. অযং, ভিক্খৰে, পঞ্চমো যোধাজীৰো সন্তো সংৰিজ্জমানো লোকস্মিং. ইমে খো, ভিক্খৰে, পঞ্চ যোধাজীৰা সন্তো সংৰিজ্জমানা লোকস্মিং.

‘‘এৰমেৰং খো, ভিক্খৰে, পঞ্চিমে যোধাজীৰূপমা পুগ্গলা সন্তো সংৰিজ্জমানা ভিক্খূসু. কতমে পঞ্চ? ইধ, ভিক্খৰে, ভিক্খু রজগ্গঞ্ঞেৰ দিস্ৰা সংসীদতি ৰিসীদতি, ন সন্থম্ভতি, ন সক্কোতি ব্রহ্মচরিযং সন্ধারেতুং [সন্তানেতুং (সী. স্যা. কং. পী.)]. সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্ততি. কিমস্স রজগ্গস্মিং? ইধ, ভিক্খৰে, ভিক্খু সুণাতি – ‘অমুকস্মিং নাম গামে ৰা নিগমে ৰা ইত্থী ৰা কুমারী ৰা অভিরূপা দস্সনীযা পাসাদিকা পরমায ৰণ্ণপোক্খরতায সমন্নাগতা’তি. সো তং সুত্ৰা সংসীদতি ৰিসীদতি, ন সন্থম্ভতি, ন সক্কোতি ব্রহ্মচরিযং সন্ধারেতুং. সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্ততি. ইদমস্স রজগ্গস্মিং.

‘‘সেয্যথাপি সো, ভিক্খৰে, যোধাজীৰো রজগ্গঞ্ঞেৰ দিস্ৰা সংসীদতি ৰিসীদতি, ন সন্থম্ভতি, ন সক্কোতি সঙ্গামং ওতরিতুং; তথূপমাহং, ভিক্খৰে, ইমং পুগ্গলং ৰদামি. এৰরূপোপি, ভিক্খৰে, ইধেকচ্চো পুগ্গলো হোতি. অযং, ভিক্খৰে, পঠমো যোধাজীৰূপমো পুগ্গলো সন্তো সংৰিজ্জমানো ভিক্খূসু.

‘‘পুন চপরং, ভিক্খৰে, ভিক্খু সহতি রজগ্গং; অপি চ খো ধজগ্গঞ্ঞেৰ দিস্ৰা সংসীদতি ৰিসীদতি, ন সন্থম্ভতি, ন সক্কোতি ব্রহ্মচরিযং সন্ধারেতুং. সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্ততি. কিমস্স ধজগ্গস্মিং? ইধ, ভিক্খৰে, ভিক্খু ন হেৰ খো সুণাতি – ‘অমুকস্মিং নাম গামে ৰা নিগমে ৰা ইত্থী ৰা কুমারী ৰা অভিরূপা দস্সনীযা পাসাদিকা পরমায ৰণ্ণপোক্খরতায সমন্নাগতা’তি; অপি চ খো সামং পস্সতি ইত্থিং ৰা কুমারিং ৰা অভিরূপং দস্সনীযং পাসাদিকং পরমায ৰণ্ণপোক্খরতায সমন্নাগতং. সো তং দিস্ৰা সংসীদতি ৰিসীদতি, ন সন্থম্ভতি, ন সক্কোতি ব্রহ্মচরিযং সন্ধারেতুং. সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্ততি. ইদমস্স ধজগ্গস্মিং.

‘‘সেয্যথাপি সো, ভিক্খৰে, যোধাজীৰো সহতি রজগ্গং; অপি চ খো ধজগ্গঞ্ঞেৰ দিস্ৰা সংসীদতি ৰিসীদতি, ন সন্থম্ভতি, ন সক্কোতি সঙ্গামং ওতরিতুং; তথূপমাহং, ভিক্খৰে, ইমং পুগ্গলং ৰদামি. এৰরূপোপি, ভিক্খৰে, ইধেকচ্চো পুগ্গলো হোতি. অযং, ভিক্খৰে, দুতিযো যোধাজীৰূপমো পুগ্গলো সন্তো সংৰিজ্জমানো ভিক্খূসু.

‘‘পুন চপরং, ভিক্খৰে, ভিক্খু সহতি রজগ্গং, সহতি ধজগ্গং; অপি চ খো উস্সারণঞ্ঞেৰ সুত্ৰা সংসীদতি ৰিসীদতি, ন সন্থম্ভতি, ন সক্কোতি ব্রহ্মচরিযং সন্ধারেতুং. সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্ততি. কিমস্স উস্সারণায? ইধ, ভিক্খৰে, ভিক্খুং অরঞ্ঞগতং ৰা রুক্খমূলগতং ৰা সুঞ্ঞাগারগতং ৰা মাতুগামো উপসঙ্কমিত্ৰা ঊহসতি [উহসতি (ক.), ওহসতি (স্যা. কং.) পু. প. ১৯৬] উল্লপতি উজ্জগ্ঘতি উপ্পণ্ডেতি. সো মাতুগামেন ঊহসিযমানো উল্লপিযমানো উজ্জগ্ঘিযমানো উপ্পণ্ডিযমানো সংসীদতি ৰিসীদতি, ন সন্থম্ভতি, ন সক্কোতি ব্রহ্মচরিযং সন্ধারেতুং. সিক্খাদুব্বল্যং আৰিকত্ৰা সিক্খং পচ্চক্খায হীনাযাৰত্ততি. ইদমস্স উস্সারণায.

‘‘সেয্যথাপি সো, ভিক্খৰে, যোধাজীৰো সহতি রজগ্গং, সহতি ধজগ্গং; অপি চ খো উস্সারণঞ্ঞেৰ সুত্ৰা সংসীদতি ৰিসীদতি, ন সন্থম্ভতি, ন সক্কোতি সঙ্গামং ওতরিতুং; তথূপমাহং, ভিক্খৰে, ইমং পুগ্গলং ৰদামি. এৰরূপোপি, ভিক্খৰে, ইধেকচ্চো পুগ্গলো হোতি. অযং, ভিক্খৰে, ততিযো যোধাজীৰূপমো পুগ্গলো সন্তো সংৰিজ্জমানো ভিক্খূসু.

‘‘পুন চপরং, ভিক্খৰে, ভিক্খু সহতি রজগ্গং, সহতি ধজগ্গং, সহতি উস্সারণং; অপি চ খো সম্পহারে হঞ্ঞতি ব্যাপজ্জতি. কিমস্স সম্পহারস্মিং? ইধ, ভিক্খৰে, ভিক্খুং অরঞ্ঞগতং ৰা রুক্খমূলগতং ৰা সুঞ্ঞাগারগতং ৰা মাতুগামো উপসঙ্কমিত্ৰা অভিনিসীদতি অভিনিপজ্জতি অজ্ঝোত্থরতি. সো মাতুগামেন অভিনিসীদিযমানো অভিনিপজ্জিযমানো অজ্ঝোত্থরিযমানো সিক্খং অপচ্চক্খায দুব্বল্যং অনাৰিকত্ৰা মেথুনং ধম্মং পটিসেৰতি. ইদমস্স সম্পহারস্মিং.

‘‘সেয্যথাপি সো, ভিক্খৰে, যোধাজীৰো সহতি রজগ্গং, সহতি ধজগ্গং, সহতি উস্সারণং, অপি চ খো সম্পহারে হঞ্ঞতি ব্যাপজ্জতি; তথূপমাহং, ভিক্খৰে, ইমং পুগ্গলং ৰদামি. এৰরূপোপি, ভিক্খৰে, ইধেকচ্চো পুগ্গলো হোতি. অযং, ভিক্খৰে, চতুত্থো যোধাজীৰূপমো পুগ্গলো সন্তো সংৰিজ্জমানো ভিক্খূসু.

‘‘পুন চপরং, ভিক্খৰে, ভিক্খু সহতি রজগ্গং, সহতি ধজগ্গং, সহতি উস্সারণং, সহতি সম্পহারং, সো তং সঙ্গামং অভিৰিজিনিত্ৰা ৰিজিতসঙ্গামো তমেৰ সঙ্গামসীসং অজ্ঝাৰসতি. কিমস্স সঙ্গামৰিজযস্মিং? ইধ, ভিক্খৰে, ভিক্খু অরঞ্ঞগতং ৰা রুক্খমূলগতং ৰা সুঞ্ঞাগারগতং ৰা মাতুগামো উপসঙ্কমিত্ৰা অভিনিসীদতি অভিনিপজ্জতি অজ্ঝোত্থরতি. সো মাতুগামেন অভিনিসীদিযমানো অভিনিপজ্জিযমানো অজ্ঝোত্থরিযমানো ৰিনিৰেঠেত্ৰা ৰিনিমোচেত্ৰা যেন কামং পক্কমতি. সো ৰিৰিত্তং সেনাসনং ভজতি অরঞ্ঞং রুক্খমূলং পব্বতং কন্দরং গিরিগুহং সুসানং ৰনপত্থং অব্ভোকাসং পলালপুঞ্জং.

‘‘সো অরঞ্ঞগতো ৰা রুক্খমূলগতো ৰা সুঞ্ঞাগারগতো ৰা নিসীদতি পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা. সো অভিজ্ঝং লোকে পহায ৰিগতাভিজ্ঝেন চেতসা ৰিহরতি, অভিজ্ঝায চিত্তং পরিসোধেতি; ব্যাপাদপদোসং পহায অব্যাপন্নচিত্তো ৰিহরতি, সব্বপাণভূতহিতানুকম্পী ব্যাপাদপদোসা চিত্তং পরিসোধেতি; থিনমিদ্ধং পহায ৰিগতথিনমিদ্ধো ৰিহরতি আলোকসঞ্ঞী সতো সম্পজানো, থিনমিদ্ধা চিত্তং পরিসোধেতি; উদ্ধচ্চকুক্কুচ্চং পহায অনুদ্ধতো ৰিহরতি অজ্ঝত্তং ৰূপসন্তচিত্তো, উদ্ধচ্চকুক্কুচ্চা চিত্তং পরিসোধেতি; ৰিচিকিচ্ছং পহায তিণ্ণৰিচিকিচ্ছো ৰিহরতি অকথংকথী কুসলেসু ধম্মেসু, ৰিচিকিচ্ছায চিত্তং পরিসোধেতি. সো ইমে পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে ৰিৰিচ্চেৰ কামেহি…পে… পীতিযা চ ৰিরাগা উপেক্খকো চ ৰিহরতি সতো সম্পজানো, সুখঞ্চ কাযেন পটিসংৰেদেতি যং তং অরিযা আচিক্খন্তি – ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহরতি. সুখস্স চ পহানা দুক্খস্স চ পহানা, পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি.

‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে আসৰানং খযঞাণায চিত্তং অভিনিন্নামেতি. সো ‘ইদং দুক্খ’ন্তি যথাভূতং পজানাতি, ‘অযং দুক্খসমুদযো’তি যথাভূতং পজানাতি, ‘অযং দুক্খনিরোধো’তি যথাভূতং পজানাতি, ‘অযং দুক্খনিরোধগামিনী পটিপদা’তি যথাভূতং পজানাতি, ‘ইমে আসৰা’তি যথাভূতং পজানাতি, ‘অযং আসৰসমুদযো’তি যথাভূতং পজানাতি, ‘অযং আসৰনিরোধো’তি যথাভূতং পজানাতি, ‘অযং আসৰনিরোধগামিনী পটিপদা’তি যথাভূতং পজানাতি. তস্স এৰং জানতো এৰং পস্সতো কামাসৰাপি চিত্তং ৰিমুচ্চতি, ভৰাসৰাপি চিত্তং ৰিমুচ্চতি, অৰিজ্জাসৰাপি চিত্তং ৰিমুচ্চতি, ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি. ইদমস্স সঙ্গামৰিজযস্মিং.

‘‘সেয্যথাপি সো, ভিক্খৰে, যোধাজীৰো সহতি রজগ্গং, সহতি ধজগ্গং, সহতি উস্সারণং, সহতি সম্পহারং, সো তং সঙ্গামং অভিৰিজিনিত্ৰা ৰিজিতসঙ্গামো তমেৰ সঙ্গামসীসং অজ্ঝাৰসতি; তথূপমাহং, ভিক্খৰে, ইমং পুগ্গলং ৰদামি. এৰরূপোপি, ভিক্খৰে, ইধেকচ্চো পুগ্গলো হোতি. অযং, ভিক্খৰে, পঞ্চমো যোধাজীৰূপমো পুগ্গলো সন্তো সংৰিজ্জমানো ভিক্খূসু. ইমে খো, ভিক্খৰে, পঞ্চ যোধাজীৰূপমা পুগ্গলা সন্তো সংৰিজ্জমানা ভিক্খূসূ’’তি. পঞ্চমং.