৪. দুতিযধম্মৰিহারীসুত্তং

৭৪. অথ খো অঞ্ঞতরো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সো ভিক্খু ভগৰন্তং এতদৰোচ – ‘‘‘ধম্মৰিহারী ধম্মৰিহারী’তি, ভন্তে, ৰুচ্চতি. কিত্তাৰতা নু খো, ভন্তে, ভিক্খু ধম্মৰিহারী হোতী’’তি?

‘‘ইধ, ভিক্খু, ভিক্খু ধম্মং পরিযাপুণাতি – সুত্তং, গেয্যং, ৰেয্যাকরণং, গাথং, উদানং, ইতিৰুত্তকং, জাতকং, অব্ভুতধম্মং, ৰেদল্লং; উত্তরি [উত্তরিং (সী. স্যা. কং. পী.)] চস্স পঞ্ঞায অত্থং নপ্পজানাতি. অযং ৰুচ্চতি, ভিক্খু – ‘ভিক্খু পরিযত্তিবহুলো, নো ধম্মৰিহারী’’’.

‘‘পুন চপরং, ভিক্খু, ভিক্খু যথাসুতং যথাপরিযত্তং ধম্মং ৰিত্থারেন পরেসং দেসেতি, উত্তরি চস্স পঞ্ঞায অত্থং নপ্পজানাতি. অযং ৰুচ্চতি, ভিক্খু – ‘ভিক্খু পঞ্ঞত্তিবহুলো, নো ধম্মৰিহারী’’’.

‘‘পুন চপরং, ভিক্খু, ভিক্খু যথাসুতং যথাপরিযত্তং ধম্মং ৰিত্থারেন সজ্ঝাযং করোতি, উত্তরি চস্স পঞ্ঞায অত্থং নপ্পজানাতি. অযং ৰুচ্চতি, ভিক্খু – ‘ভিক্খু সজ্ঝাযবহুলো, নো ধম্মৰিহারী’’’.

‘‘পুন চপরং, ভিক্খু, ভিক্খু যথাসুতং যথাপরিযত্তং ধম্মং চেতসা অনুৰিতক্কেতি অনুৰিচারেতি মনসানুপেক্খতি, উত্তরি চস্স পঞ্ঞায অত্থং নপ্পজানাতি. অযং ৰুচ্চতি, ভিক্খু – ‘ভিক্খু ৰিতক্কবহুলো, নো ধম্মৰিহারী’’’.

‘‘ইধ, ভিক্খু, ভিক্খু ধম্মং পরিযাপুণাতি – সুত্তং, গেয্যং, ৰেয্যাকরণং, গাথং, উদানং, ইতিৰুত্তকং, জাতকং, অব্ভুতধম্মং, ৰেদল্লং; উত্তরি চস্স পঞ্ঞায অত্থং পজানাতি. এৰং খো, ভিক্খু, ভিক্খু ধম্মৰিহারী হোতি.

‘‘ইতি খো, ভিক্খু, দেসিতো মযা পরিযত্তিবহুলো, দেসিতো পঞ্ঞত্তিবহুলো, দেসিতো সজ্ঝাযবহুলো, দেসিতো ৰিতক্কবহুলো, দেসিতো ধম্মৰিহারী. যং খো, ভিক্খু, সত্থারা করণীযং সাৰকানং হিতেসিনা অনুকম্পকেন অনুকম্পং উপাদায, কতং ৰো তং মযা. এতানি, ভিক্খু, রুক্খমূলানি, এতানি সুঞ্ঞাগারানি. ঝাযথ ভিক্খু, মা পমাদত্থ, মা পচ্ছা ৰিপ্পটিসারিনো অহুৰত্থ. অযং ৰো অম্হাকং অনুসাসনী’’তি. চতুত্থং.