২. আনণ্যসুত্তং

৬২. অথ খো অনাথপিণ্ডিকো গহপতি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো অনাথপিণ্ডিকং গহপতিং ভগৰা এতদৰোচ –

‘‘চত্তারিমানি, গহপতি, সুখানি অধিগমনীযানি গিহিনা কামভোগিনা কালেন কালং সমযেন সমযং উপাদায. কতমানি চত্তারি? অত্থিসুখং, ভোগসুখং, আনণ্যসুখং [অণণসুখং (সী. স্যা. কং. পী.)], অনৰজ্জসুখং.

‘‘কতমঞ্চ, গহপতি, অত্থিসুখং? ইধ, গহপতি, কুলপুত্তস্স ভোগা হোন্তি উট্ঠানৰীরিযাধিগতা বাহাবলপরিচিতা সেদাৰক্খিত্তা ধম্মিকা ধম্মলদ্ধা. সো ‘ভোগা মে অত্থি উট্ঠানৰীরিযাধিগতা বাহাবলপরিচিতা সেদাৰক্খিত্তা ধম্মিকা ধম্মলদ্ধা’তি অধিগচ্ছতি সুখং, অধিগচ্ছতি সোমনস্সং. ইদং ৰুচ্চতি, গহপতি, অত্থিসুখং.

‘‘কতমঞ্চ, গহপতি, ভোগসুখং? ইধ, গহপতি, কুলপুত্তো উট্ঠানৰীরিযাধিগতেহি ভোগেহি বাহাবলপরিচিতেহি সেদাৰক্খিত্তেহি ধম্মিকেহি ধম্মলদ্ধেহি পরিভুঞ্জতি পুঞ্ঞানি চ করোতি. সো ‘উট্ঠানৰীরিযাধিগতেহি ভোগেহি বাহাবলপরিচিতেহি সেদাৰক্খিত্তেহি ধম্মিকেহি ধম্মলদ্ধেহি পরিভুঞ্জামি পুঞ্ঞানি চ করোমী’তি অধিগচ্ছতি সুখং, অধিগচ্ছতি সোমনস্সং. ইদং ৰুচ্চতি, গহপতি, ভোগসুখং.

‘‘কতমঞ্চ, গহপতি, আনণ্যসুখং? ইধ, গহপতি, কুলপুত্তো ন কস্সচি কিঞ্চি ধারেতি অপ্পং ৰা বহুং ৰা. সো ‘ন কস্সচি কিঞ্চি ধারেমি [কিঞ্চি ৰা দেতি (ক.)] অপ্পং ৰা বহুং ৰা’তি অধিগচ্ছতি সুখং, অধিগচ্ছতি সোমনস্সং. ইদং ৰুচ্চতি, গহপতি, আনণ্যসুখং.

‘‘কতমঞ্চ, গহপতি, অনৰজ্জসুখং? ইধ, গহপতি, অরিযসাৰকো অনৰজ্জেন কাযকম্মেন সমন্নাগতো হোতি, অনৰজ্জেন ৰচীকম্মেন সমন্নাগতো হোতি, অনৰজ্জেন মনোকম্মেন সমন্নাগতো হোতি. সো ‘অনৰজ্জেনম্হি কাযকম্মেন সমন্নাগতো, অনৰজ্জেন ৰচীকম্মেন সমন্নাগতো, অনৰজ্জেন মনোকম্মেন সমন্নাগতো’তি অধিগচ্ছতি সুখং, অধিগচ্ছতি সোমনস্সং. ইদং ৰুচ্চতি, গহপতি, অনৰজ্জসুখং. ইমানি খো, গহপতি, চত্তারি সুখানি অধিগমনীযানি গিহিনা কামভোগিনা কালেন কালং সমযেন সমযং উপাদাযা’’তি.

‘‘আনণ্যসুখং ঞত্ৰান, অথো অত্থিসুখং পরং;

ভুঞ্জং ভোগসুখং মচ্চো, ততো পঞ্ঞা ৰিপস্সতি.

‘‘ৰিপস্সমানো জানাতি, উভো ভোগে সুমেধসো;

অনৰজ্জসুখস্সেতং, কলং নাগ্ঘতি সোল়সি’’ন্তি. দুতিযং;