৩. ব্রহ্মসুত্তং

৬৩. ‘‘সব্রহ্মকানি, ভিক্খৰে [ইতিৰু. ১০৬], তানি কুলানি যেসং পুত্তানং মাতাপিতরো অজ্ঝাগারে পূজিতা হোন্তি. সপুব্বাচরিযকানি, ভিক্খৰে, তানি কুলানি, যেসং পুত্তানং মাতাপিতরো অজ্ঝাগারে পূজিতা হোন্তি. সপুব্বদেৰতানি [সপুব্বদেৰানি (স্যা. কং.)], ভিক্খৰে, তানি কুলানি যেসং পুত্তানং মাতাপিতরো অজ্ঝাগারে পূজিতা হোন্তি. সাহুনেয্যকানি, ভিক্খৰে, তানি কুলানি যেসং পুত্তানং মাতাপিতরো অজ্ঝাগারে পূজিতা হোন্তি.

‘‘ব্রহ্মাতি, ভিক্খৰে, মাতাপিতূনং [মাতাপিতুন্নং (সী. পী.)] এতং অধিৰচনং. পুব্বাচরিযাতি, ভিক্খৰে, মাতাপিতূনং এতং অধিৰচনং. পুব্বদেৰতাতি [পুব্বদেৰাতি (সী. স্যা. কং.)], ভিক্খৰে, মাতাপিতূনং এতং অধিৰচনং. আহুনেয্যাতি, ভিক্খৰে, মাতাপিতূনং এতং অধিৰচনং. তং কিস্স হেতু? বহুকারা, ভিক্খৰে, মাতাপিতরো, পুত্তানং আপাদকা পোসকা ইমস্স লোকস্স দস্সেতারো’’তি.

‘‘ব্রহ্মাতি মাতাপিতরো, পুব্বাচরিযাতি ৰুচ্চরে;

আহুনেয্যা চ পুত্তানং, পজায অনুকম্পকা.

‘‘তস্মা হি নে নমস্সেয্য, সক্করেয্য চ পণ্ডিতো;

অন্নেন অথ পানেন, ৰত্থেন সযনেন চ;

উচ্ছাদনেন ন্হাপনেন, পাদানং ধোৰনেন চ.

‘‘তায নং পারিচরিযায, মাতাপিতূসু পণ্ডিতা;

ইধেৰ নং পসংসন্তি, পেচ্চ সগ্গে পমোদতী’’তি. ততিযং;