১. পত্তকম্মসুত্তং

৬১. অথ খো অনাথপিণ্ডিকো গহপতি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো অনাথপিণ্ডিকং গহপতিং ভগৰা এতদৰোচ –

‘‘চত্তারোমে, গহপতি, ধম্মা ইট্ঠা কন্তা মনাপা দুল্লভা লোকস্মিং. কতমে চত্তারো? ভোগা মে উপ্পজ্জন্তু সহধম্মেনাতি, অযং পঠমো ধম্মো ইট্ঠো কন্তো মনাপো দুল্লভো লোকস্মিং.

‘‘ভোগে লদ্ধা সহধম্মেন যসো মে আগচ্ছতু সহ ঞাতীহি সহ উপজ্ঝাযেহীতি, অযং দুতিযো ধম্মো ইট্ঠো কন্তো মনাপো দুল্লভো লোকস্মিং.

‘‘ভোগে লদ্ধা সহধম্মেন যসং লদ্ধা সহ ঞাতীহি সহ উপজ্ঝাযেহি চিরং জীৰামি দীঘমাযুং পালেমীতি, অযং ততিযো ধম্মো ইট্ঠো কন্তো মনাপো দুল্লভো লোকস্মিং.

‘‘ভোগে লদ্ধা সহধম্মেন যসং লদ্ধা সহ ঞাতীহি সহ উপজ্ঝাযেহি চিরং জীৰিত্ৰা দীঘমাযুং পালেত্ৰা কাযস্স ভেদা পরং মরণা সুগতিং সগ্গং লোকং উপপজ্জামীতি, অযং চতুত্থো ধম্মো ইট্ঠো কন্তো মনাপো দুল্লভো লোকস্মিং. ইমে খো, গহপতি, চত্তারো ধম্মা ইট্ঠা কন্তা মনাপা দুল্লভা লোকস্মিং.

‘‘ইমেসং খো, গহপতি, চতুন্নং ধম্মানং ইট্ঠানং কন্তানং মনাপানং দুল্লভানং লোকস্মিং চত্তারো ধম্মা পটিলাভায সংৰত্তন্তি. কতমে চত্তারো? সদ্ধাসম্পদা, সীলসম্পদা, চাগসম্পদা, পঞ্ঞাসম্পদা.

‘‘কতমা চ, গহপতি, সদ্ধাসম্পদা? ইধ, গহপতি, অরিযসাৰকো সদ্ধো হোতি, সদ্দহতি তথাগতস্স বোধিং – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি, সত্থা দেৰমনুস্সানং বুদ্ধো ভগৰা’তি. অযং ৰুচ্চতি, গহপতি, সদ্ধাসম্পদা.

‘‘কতমা চ, গহপতি, সীলসম্পদা? ইধ, গহপতি, অরিযসাৰকো পাণাতিপাতা পটিৰিরতো হোতি…পে… সুরামেরযমজ্জপমাদট্ঠানা পটিৰিরতো হোতি. অযং ৰুচ্চতি, গহপতি, সীলসম্পদা.

‘‘কতমা চ, গহপতি, চাগসম্পদা? ইধ, গহপতি, অরিযসাৰকো ৰিগতমলমচ্ছেরেন চেতসা অগারং অজ্ঝাৰসতি মুত্তচাগো পযতপাণি ৰোসগ্গরতো যাচযোগো দানসংৰিভাগরতো. অযং ৰুচ্চতি, গহপতি, চাগসম্পদা.

‘‘কতমা চ, গহপতি, পঞ্ঞাসম্পদা? অভিজ্ঝাৰিসমলোভাভিভূতেন, গহপতি, চেতসা ৰিহরন্তো অকিচ্চং করোতি, কিচ্চং অপরাধেতি. অকিচ্চং করোন্তো কিচ্চং অপরাধেন্তো যসা চ সুখা চ ধংসতি. ব্যাপাদাভিভূতেন, গহপতি, চেতসা ৰিহরন্তো অকিচ্চং করোতি, কিচ্চং অপরাধেতি. অকিচ্চং করোন্তো কিচ্চং অপরাধেন্তো যসা চ সুখা চ ধংসতি. থিনমিদ্ধাভিভূতেন, গহপতি, চেতসা ৰিহরন্তো অকিচ্চং করোতি কিচ্চং অপরাধেতি. অকিচ্চং করোন্তো কিচ্চং অপরাধেন্তো যসা চ সুখা চ ধংসতি. উদ্ধচ্চকুক্কুচ্চাভিভূতেন, গহপতি, চেতসা ৰিহরন্তো অকিচ্চং করোতি, কিচ্চং অপরাধেতি. অকিচ্চং করোন্তো কিচ্চং অপরাধেন্তো যসা চ সুখা চ ধংসতি. ৰিচিকিচ্ছাভিভূতেন, গহপতি, চেতসা ৰিহরন্তো অকিচ্চং করোতি, কিচ্চং অপরাধেতি. অকিচ্চং করোন্তো কিচ্চং অপরাধেন্তো যসা চ সুখা চ ধংসতি.

‘‘স খো সো, গহপতি, অরিযসাৰকো অভিজ্ঝাৰিসমলোভো চিত্তস্স উপক্কিলেসোতি, ইতি ৰিদিত্ৰা অভিজ্ঝাৰিসমলোভং চিত্তস্স উপক্কিলেসং পজহতি. ব্যাপাদো চিত্তস্স উপক্কিলেসোতি, ইতি ৰিদিত্ৰা ব্যাপাদং চিত্তস্স উপক্কিলেসং পজহতি. থিনমিদ্ধং চিত্তস্স উপক্কিলেসোতি, ইতি ৰিদিত্ৰা থিনমিদ্ধং চিত্তস্স উপক্কিলেসং পজহতি. উদ্ধচ্চকুক্কুচ্চং চিত্তস্স উপক্কিলেসোতি, ইতি ৰিদিত্ৰা উদ্ধচ্চকুক্কুচ্চং চিত্তস্স উপক্কিলেসং পজহতি. ৰিচিকিচ্ছা চিত্তস্স উপক্কিলেসোতি, ইতি ৰিদিত্ৰা ৰিচিকিচ্ছং চিত্তস্স উপক্কিলেসং পজহতি.

‘‘যতো চ খো, গহপতি, অরিযসাৰকস্স অভিজ্ঝাৰিসমলোভো চিত্তস্স উপক্কিলেসোতি, ইতি ৰিদিত্ৰা অভিজ্ঝাৰিসমলোভো চিত্তস্স উপক্কিলেসো পহীনো হোতি. ব্যাপাদো চিত্তস্স উপক্কিলেসোতি, ইতি ৰিদিত্ৰা ব্যাপাদো চিত্তস্স উপক্কিলেসো পহীনো হোতি. থিনমিদ্ধং চিত্তস্স উপক্কিলেসোতি, ইতি ৰিদিত্ৰা থিনমিদ্ধং চিত্তস্স উপক্কিলেসো পহীনো হোতি. উদ্ধচ্চকুক্কুচ্চং চিত্তস্স উপক্কিলেসোতি, ইতি ৰিদিত্ৰা উদ্ধচ্চকুক্কুচ্চং চিত্তস্স উপক্কিলেসো পহীনো হোতি. ৰিচিকিচ্ছা চিত্তস্স উপক্কিলেসোতি, ইতি ৰিদিত্ৰা ৰিচিকিচ্ছা চিত্তস্স উপক্কিলেসো পহীনো হোতি. অযং ৰুচ্চতি, গহপতি, অরিযসাৰকো মহাপঞ্ঞো পুথুপঞ্ঞো আপাতদসো [আপাথদসো (সী. স্যা. কং. পী.)] পঞ্ঞাসম্পন্নো [হাসপঞ্ঞো (ক.)]. অযং ৰুচ্চতি, গহপতি, পঞ্ঞাসম্পদা. ইমেসং খো, গহপতি, চতুন্নং ধম্মানং ইট্ঠানং কন্তানং মনাপানং দুল্লভানং লোকস্মিং ইমে চত্তারো ধম্মা পটিলাভায সংৰত্তন্তি.

‘‘স খো সো, গহপতি, অরিযসাৰকো উট্ঠানৰীরিযাধিগতেহি ভোগেহি বাহাবলপরিচিতেহি সেদাৰক্খিত্তেহি ধম্মিকেহি ধম্মলদ্ধেহি চত্তারি পত্তকম্মানি কত্তা হোতি. কতমানি চত্তারি? ইধ গহপতি, অরিযসাৰকো উট্ঠানৰীরিযাধিগতেহি ভোগেহি বাহাবলপরিচিতেহি সেদাৰক্খিত্তেহি ধম্মিকেহি ধম্মলদ্ধেহি অত্তানং সুখেতি পীণেতি সম্মা সুখং পরিহরতি. মাতাপিতরো সুখেতি পীণেতি সম্মা সুখং পরিহরতি. পুত্তদারদাসকম্মকরপোরিসে সুখেতি পীণেতি সম্মা সুখং পরিহরতি. মিত্তামচ্চে সুখেতি পীণেতি সম্মা সুখং পরিহরতি. ইদমস্স পঠমং ঠানগতং হোতি পত্তগতং আযতনসো পরিভুত্তং.

‘‘পুন চপরং, গহপতি, অরিযসাৰকো উট্ঠানৰীরিযাধিগতেহি ভোগেহি বাহাবলপরিচিতেহি সেদাৰক্খিত্তেহি ধম্মিকেহি ধম্মলদ্ধেহি যা তা হোন্তি আপদা অগ্গিতো ৰা উদকতো ৰা রাজতো ৰা চোরতো ৰা অপ্পিযতো ৰা দাযাদতো [অ. নি. ৫.৪১], তথারূপাসু আপদাসু পরিযোধায সংৰত্ততি. সোত্থিং অত্তানং করোতি. ইদমস্স দুতিযং ঠানগতং হোতি পত্তগতং আযতনসো পরিভুত্তং.

‘‘পুন চপরং, গহপতি, অরিযসাৰকো উট্ঠানৰীরিযাধিগতেহি ভোগেহি বাহাবলপরিচিতেহি সেদাৰক্খিত্তেহি ধম্মিকেহি ধম্মলদ্ধেহি পঞ্চবলিং কত্তা হোতি – ঞাতিবলিং, অতিথিবলিং, পুব্বপেতবলিং, রাজবলিং, দেৰতাবলিং. ইদমস্স ততিযং ঠানগতং হোতি পত্তগতং আযতনসো পরিভুত্তং.

‘‘পুন চপরং, গহপতি, অরিযসাৰকো উট্ঠানৰীরিযাধিগতেহি ভোগেহি বাহাবলপরিচিতেহি সেদাৰক্খিত্তেহি ধম্মিকেহি ধম্মলদ্ধেহি যে তে সমণব্রাহ্মণা মদপ্পমাদা পটিৰিরতা খন্তিসোরচ্চে নিৰিট্ঠা একমত্তানং দমেন্তি, একমত্তানং সমেন্তি, একমত্তানং পরিনিব্বাপেন্তি, তথারূপেসু সমণব্রাহ্মণেসু উদ্ধগ্গিকং দক্খিণং পতিট্ঠাপেতি সোৰগ্গিকং সুখৰিপাকং সগ্গসংৰত্তনিকং. ইদমস্স চতুত্থং ঠানগতং হোতি পত্তগতং আযতনসো পরিভুত্তং.

‘‘স খো সো, গহপতি, অরিযসাৰকো উট্ঠানৰীরিযাধিগতেহি ভোগেহি বাহাবলপরিচিতেহি সেদাৰক্খিত্তেহি ধম্মিকেহি ধম্মলদ্ধেহি ইমানি চত্তারি পত্তকম্মানি কত্তা হোতি. যস্স কস্সচি, গহপতি, অঞ্ঞত্র ইমেহি চতূহি পত্তকম্মেহি ভোগা পরিক্খযং গচ্ছন্তি, ইমে ৰুচ্চন্তি, গহপতি, ভোগা অট্ঠানগতা অপত্তগতা অনাযতনসো পরিভুত্তা. যস্স কস্সচি, গহপতি, ইমেহি চতূহি পত্তকম্মেহি ভোগা পরিক্খযং গচ্ছন্তি, ইমে ৰুচ্চন্তি, গহপতি, ভোগা ঠানগতা পত্তগতা আযতনসো পরিভুত্তা’’তি.

‘‘ভুত্তা ভোগা ভতা ভচ্চা [গতা ভূতা (ক.) ভটা ভচ্চা (স্যা. কং.)], ৰিতিণ্ণা আপদাসু মে;

উদ্ধগ্গা দক্খিণা দিন্না, অথো পঞ্চবলী কতা;

উপট্ঠিতা সীলৰন্তো, সঞ্ঞতা ব্রহ্মচারযো.

‘‘যদত্থং ভোগং ইচ্ছেয্য, পণ্ডিতো ঘরমাৰসং;

সো মে অত্থো অনুপ্পত্তো, কতং অননুতাপিযং.

‘‘এতং [এৰং (ক.)] অনুস্সরং মচ্চো, অরিযধম্মে ঠিতো নরো;

ইধেৰ নং পসংসন্তি, পেচ্চ সগ্গে পমোদতী’’তি. পঠমং;