১০. উপক্কিলেসসুত্তং

৫০. ‘‘চত্তারোমে, ভিক্খৰে [চূল়ৰ. ৪৪৭], চন্দিমসূরিযানং উপক্কিলেসা, যেহি উপক্কিলেসেহি উপক্কিলিট্ঠা চন্দিমসূরিযা ন তপন্তি ন ভাসন্তি ন ৰিরোচন্তি. কতমে চত্তারো? অব্ভা, ভিক্খৰে, চন্দিমসূরিযানং উপক্কিলেসা, যেন উপক্কিলেসেন উপক্কিলিট্ঠা চন্দিমসূরিযা ন তপন্তি ন ভাসন্তি ন ৰিরোচন্তি.

‘‘মহিকা, ভিক্খৰে, চন্দিমসূরিযানং উপক্কিলেসা, যেন উপক্কিলেসেন উপক্কিলিট্ঠা চন্দিমসূরিযা ন তপন্তি ন ভাসন্তি ন ৰিরোচন্তি.

‘‘ধূমো রজো, ভিক্খৰে, চন্দিমসূরিযানং উপক্কিলেসো, যেন উপক্কিলেসেন উপক্কিলিট্ঠা চন্দিমসূরিযা ন তপন্তি ন ভাসন্তি ন ৰিরোচন্তি.

‘‘রাহু, ভিক্খৰে, অসুরিন্দো চন্দিমসূরিযানং উপক্কিলেসো, যেন উপক্কিলেসেন উপক্কিলিট্ঠা চন্দিমসূরিযা ন তপন্তি ন ভাসন্তি ন ৰিরোচন্তি. ইমে খো, ভিক্খৰে, চত্তারো চন্দিমসূরিযানং উপক্কিলেসা, যেহি উপক্কিলেসেহি উপক্কিলিট্ঠা চন্দিমসূরিযা ন তপন্তি ন ভাসন্তি ন ৰিরোচন্তি.

‘‘এৰমেৰং খো, ভিক্খৰে, চত্তারোমে সমণব্রাহ্মণানং উপক্কিলেসা, যেহি উপক্কিলেসেহি উপক্কিলিট্ঠা একে সমণব্রাহ্মণা ন তপন্তি ন ভাসন্তি ন ৰিরোচন্তি. কতমে চত্তারো? সন্তি, ভিক্খৰে, একে সমণব্রাহ্মণা সুরং পিৰন্তি মেরযং, সুরামেরযপানা অপ্পটিৰিরতা. অযং, ভিক্খৰে, পঠমো সমণব্রাহ্মণানং উপক্কিলেসো, যেন উপক্কিলেসেন উপক্কিলিট্ঠা একে সমণব্রাহ্মণা ন তপন্তি ন ভাসন্তি ন ৰিরোচন্তি.

‘‘সন্তি, ভিক্খৰে, একে সমণব্রাহ্মণা মেথুনং ধম্মং পটিসেৰন্তি, মেথুনস্মা ধম্মা অপ্পটিৰিরতা. অযং, ভিক্খৰে, দুতিযো সমণব্রাহ্মণানং উপক্কিলেসো, যেন উপক্কিলেসেন উপক্কিলিট্ঠা একে সমণব্রাহ্মণা ন তপন্তি ন ভাসন্তি ন ৰিরোচন্তি.

‘‘সন্তি, ভিক্খৰে, একে সমণব্রাহ্মণা জাতরূপরজতং সাদিযন্তি, জাতরূপরজতপটিগ্গহণা অপ্পটিৰিরতা. অযং, ভিক্খৰে, ততিযো সমণব্রাহ্মণানং উপক্কিলেসো, যেন উপক্কিলেসেন উপক্কিলিট্ঠা একে সমণব্রাহ্মণা ন তপন্তি ন ভাসন্তি ন ৰিরোচন্তি.

‘‘সন্তি, ভিক্খৰে, একে সমণব্রাহ্মণা মিচ্ছাজীৰেন জীৰন্তি, মিচ্ছাজীৰা অপ্পটিৰিরতা. অযং, ভিক্খৰে, চতুত্থো সমণব্রাহ্মণানং উপক্কিলেসো, যেন উপক্কিলেসেন উপক্কিলিট্ঠা একে সমণব্রাহ্মণা ন তপন্তি ন ভাসন্তি ন ৰিরোচন্তি. ইমে খো, ভিক্খৰে, চত্তারো সমণব্রাহ্মণানং উপক্কিলেসা, যেহি উপক্কিলেসেহি উপক্কিলিট্ঠা একে সমণব্রাহ্মণা ন তপন্তি ন ভাসন্তি ন ৰিরোচন্তী’’তি.

‘‘রাগদোসপরিক্কিট্ঠা, একে সমণব্রাহ্মণা;

অৰিজ্জানিৰুতা পোসা, পিযরূপাভিনন্দিনো.

‘‘সুরং পিৰন্তি মেরযং, পটিসেৰন্তি মেথুনং;

রজতং জাতরূপঞ্চ, সাদিযন্তি অৰিদ্দসূ;

মিচ্ছাজীৰেন জীৰন্তি, একে সমণব্রাহ্মণা.

‘‘এতে উপক্কিলেসা ৰুত্তা, বুদ্ধেনাদিচ্চবন্ধুনা;

যেহি উপক্কিলেসেহি [উপক্কিলিট্ঠা (সী. পী.)], একে সমণব্রাহ্মণা;

ন তপন্তি ন ভাসন্তি, অসুদ্ধা সরজা মগা.

‘‘অন্ধকারেন ওনদ্ধা, তণ্হাদাসা সনেত্তিকা;

ৰড্ঢেন্তি কটসিং ঘোরং, আদিযন্তি পুনব্ভৰ’’ন্তি. দসমং;

রোহিতস্সৰগ্গো পঞ্চমো.