২. দুতিযউরুৰেলসুত্তং

২২. ‘‘একমিদাহং, ভিক্খৰে, সমযং উরুৰেলাযং ৰিহরামি নজ্জা নেরঞ্জরায তীরে অজপালনিগ্রোধে পঠমাভিসম্বুদ্ধো. অথ খো, ভিক্খৰে, সম্বহুলা ব্রাহ্মণা জিণ্ণা ৰুদ্ধা মহল্লকা অদ্ধগতা ৰযোঅনুপ্পত্তা যেনাহং তেনুপসঙ্কমিংসু; উপসঙ্কমিত্ৰা মযা সদ্ধিং সম্মোদিংসু. সম্মোদনীযং কথং সারণীযং ৰীতিসারেত্ৰা একমন্তং নিসীদিংসু. একমন্তং নিসিন্না খো, ভিক্খৰে, তে ব্রাহ্মণা মং এতদৰোচুং – ‘সুতং নেতং [মেতং (সী. স্যা. কং. ক.)], ভো গোতম – ন সমণো গোতমো ব্রাহ্মণে জিণ্ণে ৰুদ্ধে মহল্লকে অদ্ধগতে ৰযোঅনুপ্পত্তে অভিৰাদেতি ৰা পচ্চুট্ঠেতি ৰা আসনেন ৰা নিমন্তেতীতি. তযিদং, ভো গোতম, তথেৰ. ন হি ভৰং গোতমো ব্রাহ্মণে জিণ্ণে ৰুদ্ধে মহল্লকে অদ্ধগতে ৰযোঅনুপ্পত্তে অভিৰাদেতি ৰা পচ্চুট্ঠেতি ৰা আসনেন ৰা নিমন্তেতি. তযিদং, ভো গোতম, ন সম্পন্নমেৰা’’’তি.

‘‘তস্স ময্হং, ভিক্খৰে, এতদহোসি – ‘নযিমে [ন ৰত মে (সী. পী.), ন চযিমে (স্যা. কং.), ন ৰতিমে (?)] আযস্মন্তো জানন্তি থেরং ৰা থেরকরণে ৰা ধম্মে’তি. ৰুদ্ধো চেপি, ভিক্খৰে, হোতি আসীতিকো ৰা নাৰুতিকো ৰা ৰস্সসতিকো ৰা জাতিযা. সো চ হোতি অকালৰাদী অভূতৰাদী অনত্থৰাদী অধম্মৰাদী অৰিনযৰাদী, অনিধানৰতিং ৰাচং ভাসিতা অকালেন অনপদেসং অপরিযন্তৰতিং অনত্থসংহিতং. অথ খো সো ‘বালো থেরো’ত্ৰেৰ [তেৰ (সী. পী.)] সঙ্খং গচ্ছতি.

‘‘দহরো চেপি, ভিক্খৰে, হোতি যুৰা সুসুকাল়কেসো ভদ্রেন যোব্বনেন সমন্নাগতো পঠমেন ৰযসা. সো চ হোতি কালৰাদী ভূতৰাদী অত্থৰাদী ধম্মৰাদী ৰিনযৰাদী নিধানৰতিং ৰাচং ভাসিতা কালেন সাপদেসং পরিযন্তৰতিং অত্থসংহিতং. অথ খো সো ‘পণ্ডিতো থেরো’ত্ৰেৰ সঙ্খং গচ্ছতি.

‘‘চত্তারোমে, ভিক্খৰে, থেরকরণা ধম্মা. কতমে চত্তারো? ইধ, ভিক্খৰে, ভিক্খু সীলৰা হোতি, পাতিমোক্খসংৰরসংৰুতো ৰিহরতি আচারগোচরসম্পন্নো অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু, বহুস্সুতো হোতি সুতধরো সুতসন্নিচযো, যে তে ধম্মা আদিকল্যাণা মজ্ঝেকল্যাণা পরিযোসানকল্যাণা সাত্থং সব্যঞ্জনং [সাত্থা সব্যঞ্জনা (সী. পী.)] কেৰলপরিপুণ্ণং [কেৰলপরিপুণ্ণা (সী.)] পরিসুদ্ধং ব্রহ্মচরিযং অভিৰদন্তি, তথারূপাস্স ধম্মা বহুস্সুতা হোন্তি ধাতা [ধতা (সী. স্যা. কং. পী.)] ৰচসা পরিচিতা মনসানুপেক্খিতা, দিট্ঠিযা সুপ্পটিৰিদ্ধা, চতুন্নং ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী, আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি. ইমে খো, ভিক্খৰে, চত্তারো থেরকরণা ধম্মা’’তি.

‘‘যো উদ্ধতেন চিত্তেন, সম্ফঞ্চ বহু ভাসতি;

অসমাহিতসঙ্কপ্পো, অসদ্ধম্মরতো মগো;

আরা সো থাৰরেয্যম্হা, পাপদিট্ঠি অনাদরো.

‘‘যো চ সীলেন সম্পন্নো, সুতৰা পটিভানৰা;

সঞ্ঞতো ধীরো ধম্মেসু [সঞ্ঞতো ধীরধম্মেসু (সী.), সংযুত্তো থিরধম্মেসু (স্যা. কং.)], পঞ্ঞাযত্থং ৰিপস্সতি.

‘‘পারগূ সব্বধম্মানং, অখিলো পটিভানৰা;

পহীনজাতিমরণো, ব্রহ্মচরিযস্স কেৰলী.

‘‘তমহং ৰদামি থেরোতি, যস্স নো সন্তি আসৰা;

আসৰানং খযা ভিক্খু, সো থেরোতি পৰুচ্চতী’’তি. দুতিযং;