৯. অকুসলমূলসুত্তং

৭০. ‘‘তীণিমানি, ভিক্খৰে, অকুসলমূলানি. কতমানি তীণি? লোভো অকুসলমূলং, দোসো অকুসলমূলং, মোহো অকুসলমূলং.

‘‘যদপি, ভিক্খৰে, লোভো তদপি অকুসলমূলং [অকুসলং (সী. স্যা. কং. পী.)]; যদপি লুদ্ধো অভিসঙ্খরোতি কাযেন ৰাচায মনসা তদপি অকুসলং [অকুসলমূলং (ক.)]; যদপি লুদ্ধো লোভেন অভিভূতো পরিযাদিন্নচিত্তো পরস্স অসতা দুক্খং উপ্পাদযতি [উপদহতি (সী. স্যা. কং. পী.)] ৰধেন ৰা বন্ধনেন ৰা জানিযা ৰা গরহায ৰা পব্বাজনায ৰা বলৰম্হি বলত্থো ইতিপি তদপি অকুসলং [ইদং পন সব্বত্থপি এৰমেৰ দিস্সতি]. ইতিস্সমে লোভজা লোভনিদানা লোভসমুদযা লোভপচ্চযা অনেকে পাপকা অকুসলা ধম্মা সম্ভৰন্তি.

‘‘যদপি, ভিক্খৰে, দোসো তদপি অকুসলমূলং; যদপি দুট্ঠো অভিসঙ্খরোতি কাযেন ৰাচায মনসা তদপি অকুসলং; যদপি দুট্ঠো দোসেন অভিভূতো পরিযাদিন্নচিত্তো পরস্স অসতা দুক্খং উপ্পাদযতি ৰধেন ৰা বন্ধনেন ৰা জানিযা ৰা গরহায ৰা পব্বাজনায ৰা বলৰম্হি বলত্থো ইতিপি তদপি অকুসলং. ইতিস্সমে দোসজা দোসনিদানা দোসসমুদযা দোসপচ্চযা অনেকে পাপকা অকুসলা ধম্মা সম্ভৰন্তি.

‘‘যদপি, ভিক্খৰে, মোহো তদপি অকুসলমূলং; যদপি মূল়্হো অভিসঙ্খরোতি কাযেন ৰাচায মনসা তদপি অকুসলং; যদপি মূল়্হো মোহেন অভিভূতো পরিযাদিন্নচিত্তো পরস্স অসতা দুক্খং উপ্পাদযতি ৰধেন ৰা বন্ধনেন ৰা জানিযা ৰা গরহায ৰা পব্বাজনায ৰা বলৰম্হি বলত্থো ইতিপি তদপি অকুসলং. ইতিস্সমে মোহজা মোহনিদানা মোহসমুদযা মোহপচ্চযা অনেকে পাপকা অকুসলা ধম্মা সম্ভৰন্তি. এৰরূপো চাযং, ভিক্খৰে, পুগ্গলো ৰুচ্চতি অকালৰাদীতিপি, অভূতৰাদীতিপি, অনত্থৰাদীতিপি, অধম্মৰাদীতিপি, অৰিনযৰাদীতিপি.

‘‘কস্মা চাযং, ভিক্খৰে, এৰরূপো পুগ্গলো ৰুচ্চতি অকালৰাদীতিপি, অভূতৰাদীতিপি, অনত্থৰাদীতিপি, অধম্মৰাদীতিপি, অৰিনযৰাদীতিপি? তথাহাযং, ভিক্খৰে, পুগ্গলো পরস্স অসতা দুক্খং উপ্পাদযতি ৰধেন ৰা বন্ধনেন ৰা জানিযা ৰা গরহায ৰা পব্বাজনায ৰা বলৰম্হি বলত্থো ইতিপি. ভূতেন খো পন ৰুচ্চমানো অৰজানাতি, নো পটিজানাতি; অভূতেন ৰুচ্চমানো ন আতপ্পং করোতি, তস্স নিব্বেঠনায ইতিপেতং অতচ্ছং ইতিপেতং অভূতন্তি. তস্মা এৰরূপো পুগ্গলো ৰুচ্চতি অকালৰাদীতিপি, অভূতৰাদীতিপি, অনত্থৰাদীতিপি, অধম্মৰাদীতিপি, অৰিনযৰাদীতিপি.

‘‘এৰরূপো, ভিক্খৰে, পুগ্গলো লোভজেহি পাপকেহি অকুসলেহি ধম্মেহি অভিভূতো পরিযাদিন্নচিত্তো দিট্ঠে চেৰ ধম্মে দুক্খং ৰিহরতি, সৰিঘাতং সউপাযাসং সপরিল়াহং. কাযস্স চ ভেদা পরং মরণা দুগ্গতি পাটিকঙ্খা.

‘‘দোসজেহি…পে… মোহজেহি পাপকেহি অকুসলেহি ধম্মেহি অভিভূতো পরিযাদিন্নচিত্তো দিট্ঠে চেৰ ধম্মে দুক্খং ৰিহরতি, সৰিঘাতং সউপাযাসং সপরিল়াহং. কাযস্স চ ভেদা পরং মরণা দুগ্গতি পাটিকঙ্খা. সেয্যথাপি, ভিক্খৰে, সালো ৰা ধৰো ৰা ফন্দনো ৰা তীহি মালুৰালতাহি উদ্ধস্তো পরিযোনদ্ধো অনযং আপজ্জতি, ব্যসনং আপজ্জতি, অনযব্যসনং আপজ্জতি; এৰমেৰং খো, ভিক্খৰে, এৰরূপো পুগ্গলো লোভজেহি পাপকেহি অকুসলেহি ধম্মেহি অভিভূতো পরিযাদিন্নচিত্তো দিট্ঠে চেৰ ধম্মে দুক্খং ৰিহরতি, সৰিঘাতং সউপাযাসং সপরিল়াহং. কাযস্স চ ভেদা পরং মরণা দুগ্গতি পাটিকঙ্খা.

‘‘দোসজেহি…পে… মোহজেহি পাপকেহি অকুসলেহি ধম্মেহি অভিভূতো পরিযাদিন্নচিত্তো দিট্ঠে চেৰ ধম্মে দুক্খং ৰিহরতি সৰিঘাতং সউপাযাসং সপরিল়াহং. কাযস্স চ ভেদা পরং মরণা দুগ্গতি পাটিকঙ্খা. ইমানি খো, ভিক্খৰে, তীণি অকুসলমূলানীতি.

‘‘তীণিমানি, ভিক্খৰে, কুসলমূলানি. কতমানি তীণি? অলোভো কুসলমূলং, অদোসো কুসলমূলং, অমোহো কুসলমূলং.

‘‘যদপি, ভিক্খৰে, অলোভো তদপি কুসলমূলং [কুসলং (সী. স্যা. কং. পী.)]; যদপি অলুদ্ধো অভিসঙ্খরোতি কাযেন ৰাচায মনসা তদপি কুসলং [কুসলমূলং (ক.)]; যদপি অলুদ্ধো লোভেন অনভিভূতো অপরিযাদিন্নচিত্তো ন পরস্স অসতা দুক্খং উপ্পাদযতি ৰধেন ৰা বন্ধনেন ৰা জানিযা ৰা গরহায ৰা পব্বাজনায ৰা বলৰম্হি বলত্থো ইতিপি তদপি কুসলং. ইতিস্সমে অলোভজা অলোভনিদানা অলোভসমুদযা অলোভপচ্চযা অনেকে কুসলা ধম্মা সম্ভৰন্তি.

‘‘যদপি, ভিক্খৰে, অদোসো তদপি কুসলমূলং; যদপি অদুট্ঠো অভিসঙ্খরোতি কাযেন ৰাচায মনসা তদপি কুসলং; যদপি অদুট্ঠো দোসেন অনভিভূতো অপরিযাদিন্নচিত্তো ন পরস্স অসতা দুক্খং উপ্পাদযতি ৰধেন ৰা বন্ধনেন ৰা জানিযা ৰা গরহায ৰা পব্বাজনায ৰা বলৰম্হি বলত্থো ইতিপি তদপি কুসলং. ইতিস্সমে অদোসজা অদোসনিদানা অদোসসমুদযা অদোসপচ্চযা অনেকে কুসলা ধম্মা সম্ভৰন্তি.

‘‘যদপি, ভিক্খৰে, অমোহো তদপি কুসলমূলং; যদপি অমূল়্হো অভিসঙ্খরোতি কাযেন ৰাচায মনসা তদপি কুসলং; যদপি অমূল়্হো মোহেন অনভিভূতো অপরিযাদিন্নচিত্তো ন পরস্স অসতা দুক্খং উপ্পাদযতি ৰধেন ৰা বন্ধনেন ৰা জানিযা ৰা গরহায ৰা পব্বাজনায ৰা বলৰম্হি বলত্থো ইতিপি তদপি কুসলং. ইতিস্সমে অমোহজা অমোহনিদানা অমোহসমুদযা অমোহপচ্চযা অনেকে কুসলা ধম্মা সম্ভৰন্তি. এৰরূপো চাযং, ভিক্খৰে, পুগ্গলো ৰুচ্চতি কালৰাদীতিপি, ভূতৰাদীতিপি, অত্থৰাদীতিপি, ধম্মৰাদীতিপি, ৰিনযৰাদীতিপি.

‘‘কস্মা চাযং, ভিক্খৰে, এৰরূপো পুগ্গলো ৰুচ্চতি কালৰাদীতিপি, ভূতৰাদীতিপি, অত্থৰাদীতিপি, ধম্মৰাদীতিপি, ৰিনযৰাদীতিপি? তথাহাযং, ভিক্খৰে, পুগ্গলো ন পরস্স অসতা দুক্খং উপ্পাদযতি ৰধেন ৰা বন্ধনেন ৰা জানিযা ৰা গরহায ৰা পব্বাজনায ৰা বলৰম্হি বলত্থো ইতিপি. ভূতেন খো পন ৰুচ্চমানো পটিজানাতি নো অৰজানাতি; অভূতেন ৰুচ্চমানো আতপ্পং করোতি তস্স নিব্বেঠনায – ‘ইতিপেতং অতচ্ছং, ইতিপেতং অভূত’ন্তি. তস্মা এৰরূপো পুগ্গলো ৰুচ্চতি কালৰাদীতিপি, অত্থৰাদীতিপি, ধম্মৰাদীতিপি, ৰিনযৰাদীতিপি.

‘‘এৰরূপস্স, ভিক্খৰে, পুগ্গলস্স লোভজা পাপকা অকুসলা ধম্মা পহীনা উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা. দিট্ঠেৰ ধম্মে সুখং ৰিহরতি অৰিঘাতং অনুপাযাসং অপরিল়াহং. দিট্ঠেৰ ধম্মে পরিনিব্বাযতি.

‘‘দোসজা…পে… পরিনিব্বাযতি. মোহজা…পে… পরিনিব্বাযতি. সেয্যথাপি ভিক্খৰে, সালো ৰা ধৰো ৰা ফন্দনো ৰা তীহি মালুৰালতাহি উদ্ধস্তো পরিযোনদ্ধো. অথ পুরিসো আগচ্ছেয্য কুদ্দাল-পিটকং [কুদ্দালপিটকং (সী. স্যা. কং. পী.)] আদায. সো তং মালুৰালতং মূলে ছিন্দেয্য, মূলে ছেত্ৰা পলিখণেয্য, পলিখণিত্ৰা মূলানি উদ্ধরেয্য, অন্তমসো উসীরনাল়িমত্তানিপি [উসীরনাল়মত্তানিপি (সী. স্যা. কং. পী.)]. সো তং মালুৰালতং খণ্ডাখণ্ডিকং ছিন্দেয্য, খণ্ডাখণ্ডিকং ছেত্ৰা ফালেয্য, ফালেত্ৰা সকলিকং সকলিকং করেয্য, সকলিকং সকলিকং করিত্ৰা ৰাতাতপে ৰিসোসেয্য, ৰাতাতপে ৰিসোসেত্ৰা অগ্গিনা ডহেয্য, অগ্গিনা ডহিত্ৰা মসিং করেয্য, মসিং করিত্ৰা মহাৰাতে ৰা ওফুণেয্য নদিযা ৰা সীঘসোতায পৰাহেয্য. এৰমস্স [এৰমস্সু (সী.), এৰস্সু (ক.)] তা, ভিক্খৰে, মালুৰালতা উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা. এৰমেৰং খো, ভিক্খৰে, এৰরূপস্স পুগ্গলস্স লোভজা পাপকা অকুসলা ধম্মা পহীনা উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা. দিট্ঠেৰ ধম্মে সুখং ৰিহরতি অৰিঘাতং অনুপাযাসং অপরিল়াহং. দিট্ঠেৰ ধম্মে পরিনিব্বাযতি.

‘‘দোসজা …পে… মোহজা পাপকা অকুসলা ধম্মা পহীনা উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা. দিট্ঠেৰ ধম্মে সুখং ৰিহরতি অৰিঘাতং অনুপাযাসং অপরিল়াহং. দিট্ঠেৰ ধম্মে পরিনিব্বাযতি. ইমানি খো, ভিক্খৰে, তীণি কুসলমূলানী’’তি. নৰমং.