৫. কেসমুত্তিসুত্তং

৬৬. এৰং মে সুতং – একং সমযং ভগৰা কোসলেসু চারিকং চরমানো মহতা ভিক্খুসঙ্ঘেন সদ্ধিং যেন কেসমুত্তং [কেসপুত্তং (সী. স্যা. কং. পী.)] নাম কালামানং নিগমো তদৰসরি. অস্সোসুং খো কেসমুত্তিযা কালামা – ‘‘সমণো খলু, ভো, গোতমো সক্যপুত্তো সক্যকুলা পব্বজিতো কেসমুত্তং অনুপ্পত্তো. তং খো পন ভৰন্তং গোতমং এৰং কল্যাণো কিত্তিসদ্দো অব্ভুগ্গতো – ‘ইতিপি সো ভগৰা…পে… সাধু খো পন তথারূপানং অরহতং দস্সনং হোতী’’’তি.

অথ খো কেসমুত্তিযা কালামা যেন ভগৰা তেনুপসঙ্কমিংসু; উপসঙ্কমিত্ৰা অপ্পেকচ্চে ভগৰন্তং অভিৰাদেত্ৰা একমন্তং নিসীদিংসু, অপ্পেকচ্চে ভগৰতা সদ্ধিং সম্মোদিংসু, সম্মোদনীযং কথং সারণীযং ৰীতিসারেত্ৰা একমন্তং নিসীদিংসু, অপ্পেকচ্চে যেন ভগৰা তেনঞ্জলিং পণামেত্ৰা একমন্তং নিসীদিংসু, অপ্পেকচ্চে নামগোত্তং সাৰেত্ৰা একমন্তং নিসীদিংসু, অপ্পেকচ্চে তুণ্হীভূতা একমন্তং নিসীদিংসু. একমন্তং নিসিন্না খো তে কেসমুত্তিযা কালামা ভগৰন্তং এতদৰোচুং –

‘‘সন্তি, ভন্তে, একে সমণব্রাহ্মণা কেসমুত্তং আগচ্ছন্তি. তে সকংযেৰ ৰাদং দীপেন্তি জোতেন্তি, পরপ্পৰাদং পন খুংসেন্তি ৰম্ভেন্তি পরিভৰন্তি ওমক্খিং [ওপপক্খিং (সী. স্যা. কং. পী.), ওমক্খিকং (ক.)] করোন্তি. অপরেপি, ভন্তে, একে সমণব্রাহ্মণা কেসমুত্তং আগচ্ছন্তি. তেপি সকংযেৰ ৰাদং দীপেন্তি জোতেন্তি, পরপ্পৰাদং পন খুংসেন্তি ৰম্ভেন্তি পরিভৰন্তি ওমক্খিং করোন্তি. তেসং নো, ভন্তে, অম্হাকং হোতেৰ কঙ্খা হোতি ৰিচিকিচ্ছা – ‘কো সু নাম ইমেসং ভৰতং সমণব্রাহ্মণানং সচ্চং আহ, কো মুসা’’’তি? ‘‘অলঞ্হি ৰো, কালামা, কঙ্খিতুং অলং ৰিচিকিচ্ছিতুং. কঙ্খনীযেৰ পন [কঙ্খনীযেৰ চ পন (সংযুত্তনিকাযে)] ৰো ঠানে ৰিচিকিচ্ছা উপ্পন্না’’.

‘‘এথ তুম্হে, কালামা, মা অনুস্সৰেন, মা পরম্পরায, মা ইতিকিরায, মা পিটকসম্পদানেন, মা তক্কহেতু, মা নযহেতু, মা আকারপরিৰিতক্কেন, মা দিট্ঠিনিজ্ঝানক্খন্তিযা, মা ভব্বরূপতায, মা সমণো নো গরূতি. যদা তুম্হে, কালামা, অত্তনাৰ জানেয্যাথ – ‘ইমে ধম্মা অকুসলা, ইমে ধম্মা সাৰজ্জা, ইমে ধম্মা ৰিঞ্ঞুগরহিতা, ইমে ধম্মা সমত্তা সমাদিন্না [সমাদিণ্ণা (ক.)] অহিতায দুক্খায সংৰত্তন্তী’’’তি, অথ তুম্হে, কালামা, পজহেয্যাথ.

‘‘তং কিং মঞ্ঞথ, কালামা, লোভো পুরিসস্স অজ্ঝত্তং উপ্পজ্জমানো উপ্পজ্জতি হিতায ৰা অহিতায ৰা’’তি?

‘‘অহিতায, ভন্তে’’.

‘‘লুদ্ধো পনাযং, কালামা, পুরিসপুগ্গলো লোভেন অভিভূতো পরিযাদিন্নচিত্তো পাণম্পি হনতি, অদিন্নম্পি আদিযতি, পরদারম্পি গচ্ছতি, মুসাপি ভণতি, পরম্পি তথত্তায [তদত্থায (ক.)] সমাদপেতি, যং স [যং তস্স (ক.) অনন্তরসুত্তে পন ‘‘যং’ স’’ ইত্ৰেৰ সব্বত্থপি দিস্সতি] হোতি দীঘরত্তং অহিতায দুক্খাযা’’তি.

‘‘এৰং, ভন্তে’’.

‘‘তং কিং মঞ্ঞথ, কালামা, দোসো পুরিসস্স অজ্ঝত্তং উপ্পজ্জমানো উপ্পজ্জতি হিতায ৰা অহিতায ৰা’’তি?

‘‘অহিতায, ভন্তে’’.

‘‘দুট্ঠো পনাযং, কালামা, পুরিসপুগ্গলো দোসেন অভিভূতো পরিযাদিন্নচিত্তো পাণম্পি হনতি [হন্তি (সী. পী.)], অদিন্নম্পি আদিযতি, পরদারম্পি গচ্ছতি, মুসাপি ভণতি, পরম্পি তথত্তায সমাদপেতি, যং স হোতি দীঘরত্তং অহিতায দুক্খাযা’’তি.

‘‘এৰং, ভন্তে’’.

‘‘তং কিং মঞ্ঞথ, কালামা, মোহো পুরিসস্স অজ্ঝত্তং উপ্পজ্জমানো উপ্পজ্জতি হিতায ৰা অহিতায ৰা’’তি?

‘‘অহিতায, ভন্তে’’.

‘‘মূল়্হো পনাযং, কালামা, পুরিসপুগ্গলো মোহেন অভিভূতো পরিযাদিন্নচিত্তো পাণম্পি হনতি, অদিন্নম্পি আদিযতি, পরদারম্পি গচ্ছতি, মুসাপি ভণতি, পরম্পি তথত্তায সমাদপেতি, যং স হোতি দীঘরত্তং অহিতায দুক্খাযা’’তি.

‘‘এৰং, ভন্তে’’.

‘‘তং কিং মঞ্ঞথ, কালামা, ইমে ধম্মা কুসলা ৰা অকুসলা ৰা’’তি?

‘‘অকুসলা, ভন্তে’’.

‘‘সাৰজ্জা ৰা অনৰজ্জা ৰা’’তি?

‘‘সাৰজ্জা, ভন্তে’’.

‘‘ৰিঞ্ঞুগরহিতা ৰা ৰিঞ্ঞুপ্পসত্থা ৰা’’তি?

‘‘ৰিঞ্ঞুগরহিতা, ভন্তে’’.

‘‘সমত্তা সমাদিন্না অহিতায দুক্খায সংৰত্তন্তি, নো ৰা? কথং ৰা [কথং ৰা ৰো (?)] এত্থ হোতী’’তি?

‘‘সমত্তা, ভন্তে, সমাদিন্না অহিতায দুক্খায সংৰত্তন্তীতি. এৰং নো এত্থ হোতী’’তি.

‘‘ইতি খো, কালামা, যং তং অৰোচুম্হা [অৰোচুম্হ (সী. স্যা. কং. পী.) অ. নি. ৪.১৯৩] – ‘এথ তুম্হে, কালামা! মা অনুস্সৰেন, মা পরম্পরায, মা ইতিকিরায, মা পিটকসম্পদানেন, মা তক্কহেতু, মা নযহেতু, মা আকারপরিৰিতক্কেন, মা দিট্ঠিনিজ্ঝানক্খন্তিযা, মা ভব্বরূপতায, মা সমণো নো গরূতি. যদা তুম্হে কালামা অত্তনাৰ জানেয্যাথ – ‘ইমে ধম্মা অকুসলা, ইমে ধম্মা সাৰজ্জা, ইমে ধম্মা ৰিঞ্ঞুগরহিতা, ইমে ধম্মা সমত্তা সমাদিন্না অহিতায দুক্খায সংৰত্তন্তীতি, অথ তুম্হে, কালামা, পজহেয্যাথা’তি, ইতি যং তং ৰুত্তং, ইদমেতং পটিচ্চ ৰুত্তং.

‘‘এথ তুম্হে, কালামা, মা অনুস্সৰেন, মা পরম্পরায, মা ইতিকিরায, মা পিটকসম্পদানেন, মা তক্কহেতু, মা নযহেতু, মা আকারপরিৰিতক্কেন, মা দিট্ঠিনিজ্ঝানক্খন্তিযা, মা ভব্বরূপতায, মা সমণো নো গরূতি. যদা তুম্হে, কালামা, অত্তনাৰ জানেয্যাথ – ‘ইমে ধম্মা কুসলা, ইমে ধম্মা অনৰজ্জা, ইমে ধম্মা ৰিঞ্ঞুপ্পসত্থা, ইমে ধম্মা সমত্তা সমাদিন্না হিতায সুখায সংৰত্তন্তী’তি, অথ তুম্হে, কালামা, উপসম্পজ্জ ৰিহরেয্যাথ.

‘‘তং কিং মঞ্ঞথ, কালামা, অলোভো পুরিসস্স অজ্ঝত্তং উপ্পজ্জমানো উপ্পজ্জতি হিতায ৰা অহিতায ৰা’’তি?

‘‘হিতায, ভন্তে’’.

‘‘অলুদ্ধো পনাযং, কালামা, পুরিসপুগ্গলো লোভেন অনভিভূতো অপরিযাদিন্নচিত্তো নেৰ পাণং হনতি, ন অদিন্নং আদিযতি, ন পরদারং গচ্ছতি, ন মুসা ভণতি, ন পরম্পি তথত্তায সমাদপেতি, যং স হোতি দীঘরত্তং হিতায সুখাযা’’তি.

‘‘এৰং, ভন্তে’’.

‘‘তং কিং মঞ্ঞথ, কালামা, অদোসো পুরিসস্স অজ্ঝত্তং উপ্পজ্জমানো উপ্পজ্জতি…পে… অমোহো পুরিসস্স অজ্ঝত্তং উপ্পজ্জমানো উপ্পজ্জতি…পে… হিতায সুখাযা’’তি.

‘‘এৰং ভন্তে’’.

‘‘তং কিং মঞ্ঞথ, কালামা, ইমে ধম্মা কুসলা ৰা অকুসলা ৰা’’তি?

‘‘কুসলা, ভন্তে’’.

‘‘সাৰজ্জা ৰা অনৰজ্জা ৰা’’তি?

‘‘অনৰজ্জা, ভন্তে’’.

‘‘ৰিঞ্ঞুগরহিতা ৰা ৰিঞ্ঞুপ্পসত্থা ৰা’’তি?

‘‘ৰিঞ্ঞুপ্পসত্থা, ভন্তে’’.

‘‘সমত্তা সমাদিন্না হিতায সুখায সংৰত্তন্তি নো ৰা? কথং ৰা এত্থ হোতী’’তি?

‘‘সমত্তা, ভন্তে, সমাদিন্না হিতায সুখায সংৰত্তন্তি. এৰং নো এত্থ হোতী’’তি.

‘‘ইতি খো, কালামা, যং তং অৰোচুম্হা – ‘এথ তুম্হে, কালামা! মা অনুস্সৰেন, মা পরম্পরায, মা ইতিকিরায, মা পিটকসম্পদানেন, মা তক্কহেতু, মা নযহেতু, মা আকারপরিৰিতক্কেন, মা দিট্ঠিনিজ্ঝানক্খন্তিযা, মা ভব্বরূপতায, মা সমণো নো গরূতি. যদা তুম্হে, কালামা, অত্তনাৰ জানেয্যাথ – ইমে ধম্মা কুসলা, ইমে ধম্মা অনৰজ্জা, ইমে ধম্মা ৰিঞ্ঞুপ্পসত্থা, ইমে ধম্মা সমত্তা সমাদিন্না হিতায সুখায সংৰত্তন্তীতি, অথ তুম্হে, কালামা, উপসম্পজ্জ ৰিহরেয্যাথা’তি, ইতি যং তং ৰুত্তং ইদমেতং পটিচ্চ ৰুত্তং.

‘‘স খো সো [যো খো (ক.)], কালামা, অরিযসাৰকো এৰং ৰিগতাভিজ্ঝো ৰিগতব্যাপাদো অসম্মূল়্হো সম্পজানো পতিস্সতো [সতো (ক.)] মেত্তাসহগতেন চেতসা একং দিসং ফরিত্ৰা ৰিহরতি, তথা দুতিযং, তথা ততিযং, তথা চতুত্থং, ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্ঝেন ফরিত্ৰা ৰিহরতি. করুণাসহগতেন চেতসা…পে… মুদিতাসহগতেন চেতসা…পে… উপেক্খাসহগতেন চেতসা একং দিসং ফরিত্ৰা ৰিহরতি, তথা দুতিযং, তথা ততিযং, তথা চতুত্থং, ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্ঝেন ফরিত্ৰা ৰিহরতি.

‘‘স [সচে (ক.)] খো সো, কালামা, অরিযসাৰকো এৰং অৰেরচিত্তো এৰং অব্যাপজ্ঝচিত্তো এৰং অসংকিলিট্ঠচিত্তো এৰং ৰিসুদ্ধচিত্তো. তস্স দিট্ঠেৰ ধম্মে চত্তারো অস্সাসা অধিগতা হোন্তি. ‘সচে খো পন অত্থি পরো লোকো, অত্থি সুকতদুক্কটানং [সুকটদুক্কটানং (সী. স্যা. কং. পী.)] কম্মানং ফলং ৰিপাকো, অথাহং [ঠানমহং (সী. পী.), ঠানমেতং যেনাহং (স্যা. কং.)] কাযস্স ভেদা পরং মরণা সুগতিং সগ্গং লোকং উপপজ্জিস্সামী’তি, অযমস্স পঠমো অস্সাসো অধিগতো হোতি.

‘‘‘সচে খো পন নত্থি পরো লোকো, নত্থি সুকতদুক্কটানং কম্মানং ফলং ৰিপাকো, অথাহং [ইধাহং (সী. স্যা. কং. পী.)] দিট্ঠেৰ ধম্মে অৰেরং অব্যাপজ্ঝং অনীঘং সুখিং [সুখং (সী.), সুখী (স্যা. কং.)] অত্তানং পরিহরামী’তি, অযমস্স দুতিযো অস্সাসো অধিগতো হোতি.

‘‘‘সচে খো পন করোতো করীযতি পাপং, ন খো পনাহং কস্সচি পাপং চেতেমি. অকরোন্তং খো পন মং পাপকম্মং কুতো দুক্খং ফুসিস্সতী’তি, অযমস্স ততিযো অস্সাসো অধিগতো হোতি.

‘‘‘সচে খো পন করোতো ন করীযতি পাপং, অথাহং উভযেনেৰ ৰিসুদ্ধং অত্তানং সমনুপস্সামী’তি, অযমস্স চতুত্থো অস্সাসো অধিগতো হোতি.

‘‘স খো সো, কালামা, অরিযসাৰকো এৰং অৰেরচিত্তো এৰং অব্যাপজ্ঝচিত্তো এৰং অসংকিলিট্ঠচিত্তো এৰং ৰিসুদ্ধচিত্তো. তস্স দিট্ঠেৰ ধম্মে ইমে চত্তারো অস্সাসা অধিগতা হোন্তী’’তি.

‘‘এৰমেতং, ভগৰা, এৰমেতং, সুগত! স খো সো, ভন্তে, অরিযসাৰকো এৰং অৰেরচিত্তো এৰং অব্যাপজ্ঝচিত্তো এৰং অসংকিলিট্ঠচিত্তো এৰং ৰিসুদ্ধচিত্তো. তস্স দিট্ঠেৰ ধম্মে চত্তারো অস্সাসা অধিগতা হোন্তি. ‘সচে খো পন অত্থি পরো লোকো, অত্থি সুকতদুক্কটানং কম্মানং ফলং ৰিপাকো, অথাহং কাযস্স ভেদা পরং মরণা সুগতিং সগ্গং লোকং উপপজ্জিস্সামী’তি, অযমস্স পঠমো অস্সাসো অধিগতো হোতি.

‘‘‘সচে খো পন নত্থি পরো লোকো, নত্থি সুকতদুক্কটানং কম্মানং ফলং ৰিপাকো, অথাহং দিট্ঠেৰ ধম্মে অৰেরং অব্যাপজ্ঝং অনীঘং সুখিং অত্তানং পরিহরামী’তি, অযমস্স দুতিযো অস্সাসো অধিগতো হোতি.

‘‘সচে খো পন করোতো করীযতি পাপং, ন খো পনাহং – কস্সচি পাপং চেতেমি, অকরোন্তং খো পন মং পাপকম্মং কুতো দুক্খং ফুসিস্সতী’তি, অযমস্স ততিযো অস্সাসো অধিগতো হোতি.

‘‘স খো সো, ভন্তে, অরিযসাৰকো এৰং অৰেরচিত্তো এৰং অব্যাপজ্ঝচিত্তো এৰং অসংকিলিট্ঠচিত্তো এৰং ৰিসুদ্ধচিত্তো. তস্স দিট্ঠেৰ ধম্মে ইমে চত্তারো অস্সাসা অধিগতা হোন্তি.

‘‘অভিক্কন্তং, ভন্তে…পে… এতে মযং, ভন্তে, ভগৰন্তং সরণং গচ্ছাম ধম্মঞ্চ ভিক্খুসঙ্ঘঞ্চ. উপাসকে নো, ভন্তে, ভগৰা ধারেতু অজ্জতগ্গে পাণুপেতে সরণং গতে’’তি. পঞ্চমং.