৩. ৰেনাগপুরসুত্তং

৬৪. একং সমযং ভগৰা কোসলেসু চারিকং চরমানো মহতা ভিক্খুসঙ্ঘেন সদ্ধিং যেন ৰেনাগপুরং নাম কোসলানং ব্রাহ্মণগামো তদৰসরি. অস্সোসুং খো ৰেনাগপুরিকা ব্রাহ্মণগহপতিকা – ‘‘সমণো খলু, ভো, গোতমো সক্যপুত্তো সক্যকুলা পব্বজিতো ৰেনাগপুরং অনুপ্পত্তো. তং খো পন ভৰন্তং গোতমং এৰং কল্যাণো কিত্তিসদ্দো অব্ভুগ্গতো – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা’তি [ভগৰা (সী. স্যা কং. পী.) ইদং সুত্তৰণ্ণনায অট্ঠকথায সংসন্দেতব্বং পারা. ১; দী. নি. ১.২৫৫ পস্সিতব্বং]. সো ইমং লোকং সদেৰকং সমারকং সব্রহ্মকং সস্সমণব্রাহ্মণিং পজং সদেৰমনুস্সং সযং অভিঞ্ঞা সচ্ছিকত্ৰা পৰেদেতি. সো ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং, কেৰলপরিপুণ্ণং পরিসুদ্ধং ব্রহ্মচরিযং পকাসেতি. সাধু খো পন তথারূপানং অরহতং দস্সনং হোতী’’তি.

অথ খো ৰেনাগপুরিকা ব্রাহ্মণগহপতিকা যেন ভগৰা তেনুপসঙ্কমিংসু; উপসঙ্কমিত্ৰা অপ্পেকচ্চে ভগৰন্তং অভিৰাদেত্ৰা একমন্তং নিসীদিংসু, অপ্পেকচ্চে ভগৰতা সদ্ধিং সম্মোদিংসু, সম্মোদনীযং কথং সারণীযং ৰীতিসারেত্ৰা একমন্তং নিসীদিংসু, অপ্পেকচ্চে যেন ভগৰা তেনঞ্জলিং পণামেত্ৰা একমন্তং নিসীদিংসু, অপ্পেকচ্চে নামগোত্তং সাৰেত্ৰা একমন্তং নিসীদিংসু, অপ্পেকচ্চে তুণ্হীভূতা একমন্তং নিসীদিংসু. একমন্তং নিসিন্নো খো ৰেনাগপুরিকো ৰচ্ছগোত্তো ব্রাহ্মণো ভগৰন্তং এতদৰোচ –

‘‘অচ্ছরিযং, ভো গোতম, অব্ভুতং, ভো গোতম! যাৰঞ্চিদং ভোতো গোতমস্স ৰিপ্পসন্নানি ইন্দ্রিযানি, পরিসুদ্ধো ছৰিৰণ্ণো পরিযোদাতো. সেয্যথাপি, ভো গোতম, সারদং বদরপণ্ডুং [মণ্ডং (ক.)] পরিসুদ্ধং হোতি পরিযোদাতং; এৰমেৰং ভোতো গোতমস্স ৰিপ্পসন্নানি ইন্দ্রিযানি পরিসুদ্ধো ছৰিৰণ্ণো পরিযোদাতো. সেয্যথাপি, ভো গোতম, তালপক্কং সম্পতি বন্ধনা পমুত্তং [মুত্তং (সী. পী. ক.)] পরিসুদ্ধং হোতি পরিযোদাতং; এৰমেৰং ভোতো গোতমস্স ৰিপ্পসন্নানি ইন্দ্রিযানি পরিসুদ্ধো ছৰিৰণ্ণো পরিযোদাতো. সেয্যথাপি, ভো গোতম, নেক্খং [নিক্খং-ইতিপি (ম. নি. ৩.১৬৮)] জম্বোনদং দক্খকম্মারপুত্তসুপরিকম্মকতং উক্কামুখে সুকুসলসম্পহট্ঠং পণ্ডুকম্বলে নিক্খিত্তং ভাসতে চ তপতে চ ৰিরোচতি চ; এৰমেৰং ভোতো গোতমস্স ৰিপ্পসন্নানি ইন্দ্রিযানি পরিসুদ্ধো ছৰিৰণ্ণো পরিযোদাতো. যানি তানি, ভো গোতম, উচ্চাসযনমহাসযনানি, সেয্যথিদং – আসন্দি পল্লঙ্কো গোনকো চিত্তকো পটিকা পটলিকা তূলিকা ৰিকতিকা উদ্দলোমী একন্তলোমী কট্টিস্সং কোসেয্যং কুত্তকং হত্থত্থরং অস্সত্থরং রথত্থরং অজিনপ্পৰেণী কদলিমিগপৰরপচ্চত্থরণং [কাদলিমিগপৰরপচ্চত্থরণং (সী.)] সউত্তরচ্ছদং উভতোলোহিতকূপধানং, এৰরূপানং নূন ভৰং গোতমো উচ্চাসযনমহাসযনানং নিকামলাভী অকিচ্ছলাভী অকসিরলাভী’’তি.

‘‘যানি খো পন তানি, ব্রাহ্মণ, উচ্চাসযনমহাসযনানি, সেয্যথিদং – আসন্দি পল্লঙ্কো গোনকো চিত্তকো পটিকা পটলিকা তূলিকা ৰিকতিকা উদ্দলোমী একন্তলোমী কট্টিস্সং কোসেয্যং কুত্তকং হত্থত্থরং অস্সত্থরং রথত্থরং অজিনপ্পৰেণী কদলিমিগপৰরপচ্চত্থরণং সউত্তরচ্ছদং উভতোলোহিতকূপধানং. দুল্লভানি তানি পব্বজিতানং লদ্ধা চ পন [লদ্ধানি চ (সী. স্যা. কং.), লদ্ধা চ (পী.)] ন কপ্পন্তি.

‘‘তীণি খো, ইমানি, ব্রাহ্মণ, উচ্চাসযনমহাসযনানি, যেসাহং এতরহি নিকামলাভী অকিচ্ছলাভী অকসিরলাভী. কতমানি তীণি? দিব্বং উচ্চাসযনমহাসযনং, ব্রহ্মং উচ্চাসযনমহাসযনং, অরিযং উচ্চাসযনমহাসযনং. ইমানি খো, ব্রাহ্মণ, তীণি উচ্চাসযনমহাসযনানি, যেসাহং এতরহি নিকামলাভী অকিচ্ছলাভী অকসিরলাভী’’তি.

‘‘কতমং পন তং, ভো গোতম, দিব্বং উচ্চাসযনমহাসযনং, যস্স ভৰং গোতমো এতরহি নিকামলাভী অকিচ্ছলাভী অকসিরলাভী’’তি? ‘‘ইধাহং, ব্রাহ্মণ, যং গামং ৰা নিগমং ৰা উপনিস্সায ৰিহরামি, সো পুব্বণ্হসমযং নিৰাসেত্ৰা পত্তচীৰরমাদায তমেৰ গামং ৰা নিগমং ৰা পিণ্ডায পৰিসামি. সো পচ্ছাভত্তং পিণ্ডপাতপটিক্কন্তো ৰনন্তঞ্ঞেৰ পৰিসামি [পচারযামি (সী. স্যা. কং.)]. সো যদেৰ তত্থ হোন্তি তিণানি ৰা পণ্ণানি ৰা তানি একজ্ঝং সঙ্ঘরিত্ৰা নিসীদামি পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা. সো ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরামি; ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরামি; পীতিযা চ ৰিরাগা উপেক্খকো চ ৰিহরামি সতো চ সম্পজানো সুখঞ্চ কাযেন পটিসংৰেদেমি, যং তং অরিযা আচিক্খন্তি – ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহরামি; সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরামি. সো চে অহং, ব্রাহ্মণ, এৰংভূতো চঙ্কমামি, দিব্বো মে এসো তস্মিং সমযে চঙ্কমো হোতি. সো চে অহং, ব্রাহ্মণ, এৰংভূতো তিট্ঠামি, দিব্বং মে এতং তস্মিং সমযে ঠানং হোতি. সো চে অহং, ব্রাহ্মণ, এৰংভূতো নিসীদামি, দিব্বং মে এতং তস্মিং সমযে আসনং হোতি. সো চে অহং, ব্রাহ্মণ, এৰংভূতো সেয্যং কপ্পেমি, দিব্বং মে এতং তস্মিং সমযে উচ্চাসযনমহাসযনং হোতি. ইদং খো, ব্রাহ্মণ, দিব্বং উচ্চাসযনমহাসযনং, যস্সাহং এতরহি নিকামলাভী অকিচ্ছলাভী অকসিরলাভী’’তি.

‘‘অচ্ছরিযং, ভো গোতম, অব্ভুতং, ভো গোতম! কো চঞ্ঞো এৰরূপস্স দিব্বস্স উচ্চাসযনমহাসযনস্স নিকামলাভী ভৰিস্সতি অকিচ্ছলাভী অকসিরলাভী, অঞ্ঞত্র ভোতা গোতমেন!

‘‘কতমং পন তং, ভো গোতম, ব্রহ্মং উচ্চাসযনমহাসযনং, যস্স ভৰং গোতমো এতরহি নিকামলাভী অকিচ্ছলাভী অকসিরলাভী’’তি? ‘‘ইধাহং, ব্রাহ্মণ, যং গামং ৰা নিগমং ৰা উপনিস্সায ৰিহরামি, সো পুব্বণ্হসমযং নিৰাসেত্ৰা পত্তচীৰরমাদায তমেৰ গামং ৰা নিগমং ৰা পিণ্ডায পৰিসামি. সো পচ্ছাভত্তং পিণ্ডপাতপটিক্কন্তো ৰনন্তঞ্ঞেৰ পৰিসামি. সো যদেৰ তত্থ হোন্তি তিণানি ৰা পণ্ণানি ৰা তানি একজ্ঝং সঙ্ঘরিত্ৰা নিসীদামি পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা. সো মেত্তাসহগতেন চেতসা একং দিসং ফরিত্ৰা ৰিহরামি, তথা দুতিযং, তথা ততিযং, তথা চতুত্থং, ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্ঝেন [অব্যাপজ্ঝেন (সব্বত্থ)] ফরিত্ৰা ৰিহরামি. করুণাসহগতেন চেতসা…পে… মুদিতাসহগতেন চেতসা…পে… উপেক্খাসহগতেন চেতসা একং দিসং ফরিত্ৰা ৰিহরামি, তথা দুতিযং, তথা ততিযং, তথা চতুত্থং [চতুত্থিং (সী.)], ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্ঝেন ফরিত্ৰা ৰিহরামি. সো চে অহং, ব্রাহ্মণ, এৰংভূতো চঙ্কমামি, ব্রহ্মা মে এসো তস্মিং সমযে চঙ্কমো হোতি. সো চে অহং, ব্রাহ্মণ, এৰংভূতো তিট্ঠামি…পে… নিসীদামি…পে… সেয্যং কপ্পেমি, ব্রহ্মং মে এতং তস্মিং সমযে উচ্চাসযনমহাসযনং হোতি. ইদং খো, ব্রাহ্মণ, ব্রহ্মং উচ্চাসযনমহাসযনং, যস্সাহং এতরহি নিকামলাভী অকিচ্ছলাভী অকসিরলাভী’’তি.

‘‘অচ্ছরিযং, ভো গোতম, অব্ভুতং, ভো গোতম! কো চঞ্ঞো এৰরূপস্স ব্রহ্মস্স উচ্চাসযনমহাসযনস্স নিকামলাভী ভৰিস্সতি অকিচ্ছলাভী অকসিরলাভী, অঞ্ঞত্র ভোতা গোতমেন!

‘‘কতমং পন তং, ভো গোতম, অরিযং উচ্চাসযনমহাসযনং, যস্স ভৰং গোতমো এতরহি নিকামলাভী অকিচ্ছলাভী অকসিরলাভী’’তি? ‘‘ইধাহং, ব্রাহ্মণ, যং গামং ৰা নিগমং ৰা উপনিস্সায ৰিহরামি, সো পুব্বণ্হসমযং নিৰাসেত্ৰা পত্তচীৰরমাদায তমেৰ গামং ৰা নিগমং ৰা পিণ্ডায পৰিসামি. সো পচ্ছাভত্তং পিণ্ডপাতপটিক্কন্তো ৰনন্তঞ্ঞেৰ পৰিসামি. সো যদেৰ তত্থ হোন্তি তিণানি ৰা পণ্ণানি ৰা তানি একজ্ঝং সঙ্ঘরিত্ৰা নিসীদামি পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা. সো এৰং জানামি – ‘রাগো মে পহীনো উচ্ছিন্নমূলো তালাৰত্থুকতো অনভাৰংকতো আযতিং অনুপ্পাদধম্মো; দোসো মে পহীনো উচ্ছিন্নমূলো তালাৰত্থুকতো অনভাৰঙ্কতো আযতিং অনুপ্পাদধম্মো; মোহো মে পহীনো উচ্ছিন্নমূলো তালাৰত্থুকতো অনভাৰঙ্কতো আযতিং অনুপ্পাদধম্মো’. সো চে অহং, ব্রাহ্মণ, এৰংভূতো চঙ্কমামি, অরিযো মে এসো তস্মিং সমযে চঙ্কমো হোতি. সো চে অহং, ব্রাহ্মণ, এৰংভূতো তিট্ঠামি…পে… নিসীদামি…পে… সেয্যং কপ্পেমি, অরিযং মে এতং তস্মিং সমযে উচ্চাসযনমহাসযনং হোতি. ইদং খো, ব্রাহ্মণ, অরিযং উচ্চাসযনমহাসযনং, যস্সাহং এতরহি নিকামলাভী অকিচ্ছলাভী অকসিরলাভী’’তি.

‘‘অচ্ছরিযং, ভো গোতম, অব্ভুতং, ভো গোতম! কো চঞ্ঞো এৰরূপস্স অরিযস্স উচ্চাসযনমহাসযনস্স নিকামলামী ভৰিস্সতি অকিচ্ছলাভী অকসিরলাভী, অঞ্ঞত্র ভোতা গোতমেন!

‘‘অভিক্কন্তং, ভো গোতম, অভিক্কন্তং, ভো গোতম! সেয্যথাপি, ভো গোতম, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য – ‘চক্খুমন্তো রূপানি দক্খন্তী’তি; এৰমেৰং খো ভোতা গোতমেন অনেকপরিযাযেন ধম্মো পকাসিতো. এতে মযং ভৰন্তং গোতমং সরণং গচ্ছাম ধম্মঞ্চ ভিক্খুসঙ্ঘঞ্চ. উপাসকে নো ভৰং গোতমো ধারেতু অজ্জতগ্গে পাণুপেতে সরণং গতে’’তি. ততিযং.