১১. জাণুস্সোণিসুত্তং

১৭৭. অথ খো জাণুস্সোণি ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো জাণুস্সোণি ব্রাহ্মণো ভগৰন্তং এতদৰোচ –

‘‘মযমস্সু, ভো গোতম, ব্রাহ্মণা নাম. দানানি দেম, সদ্ধানি করোম – ‘ইদং দানং পেতানং ঞাতিসালোহিতানং উপকপ্পতু, ইদং দানং পেতা ঞাতিসালোহিতা পরিভুঞ্জন্তূ’তি. কচ্চি তং, ভো গোতম, দানং পেতানং ঞাতিসালোহিতানং উপকপ্পতি; কচ্চি তে পেতা ঞাতিসালোহিতা তং দানং পরিভুঞ্জন্তী’’তি? ‘‘ঠানে খো, ব্রাহ্মণ, উপকপ্পতি, নো অট্ঠানে’’তি.

‘‘কতমং পন, ভো [কতমঞ্চ পন ভো (সী. পী.) কতমং (স্যা.)] গোতম, ঠানং, কতমং অট্ঠান’’ন্তি? ‘‘ইধ, ব্রাহ্মণ, একচ্চো পাণাতিপাতী হোতি, অদিন্নাদাযী হোতি, কামেসুমিচ্ছাচারী হোতি, মুসাৰাদী হোতি, পিসুণৰাচো হোতি, ফরুসৰাচো হোতি, সম্ফপ্পলাপী হোতি, অভিজ্ঝালু হোতি, ব্যাপন্নচিত্তো হোতি, মিচ্ছাদিট্ঠিকো হোতি. সো কাযস্স ভেদা পরং মরণা নিরযং উপপজ্জতি. যো নেরযিকানং সত্তানং আহারো, তেন সো তত্থ যাপেতি, তেন সো তত্থ তিট্ঠতি. ইদম্পি [ইদং (স্যা.)] খো, ব্রাহ্মণ, অট্ঠানং যত্থ ঠিতস্স তং দানং ন উপকপ্পতি.

‘‘ইধ পন, ব্রাহ্মণ, একচ্চো পাণাতিপাতী…পে… মিচ্ছাদিট্ঠিকো হোতি. সো কাযস্স ভেদা পরং মরণা তিরচ্ছানযোনিং উপপজ্জতি. যো তিরচ্ছানযোনিকানং সত্তানং আহারো, তেন সো তত্থ যাপেতি, তেন সো তত্থ তিট্ঠতি. ইদম্পি খো, ব্রাহ্মণ, অট্ঠানং যত্থ ঠিতস্স তং দানং ন উপকপ্পতি.

‘‘ইধ পন, ব্রাহ্মণ, একচ্চো পাণাতিপাতা পটিৰিরতো হোতি, অদিন্নাদানা পটিৰিরতো হোতি, কামেসুমিচ্ছাচারা পটিৰিরতো হোতি, মুসাৰাদা পটিৰিরতো হোতি, পিসুণায ৰাচায পটিৰিরতো হোতি, ফরুসায ৰাচায পটিৰিরতো হোতি, সম্ফপ্পলাপা পটিৰিরতো হোতি, অনভিজ্ঝালু হোতি, অব্যাপন্নচিত্তো হোতি, সম্মাদিট্ঠিকো হোতি. সো কাযস্স ভেদা পরং মরণা মনুস্সানং সহব্যতং উপপজ্জতি. যো মনুস্সানং আহারো, তেন সো তত্থ যাপেতি, তেন সো তত্থ তিট্ঠতি. ইদম্পি খো, ব্রাহ্মণ, অট্ঠানং যত্থ ঠিতস্স তং দানং ন উপকপ্পতি.

‘‘ইধ পন, ব্রাহ্মণ, একচ্চো পাণাতিপাতা পটিৰিরতো হোতি…পে… সম্মাদিট্ঠিকো হোতি. সো কাযস্স ভেদা পরং মরণা দেৰানং সহব্যতং উপপজ্জতি. যো দেৰানং আহারো, তেন সো তত্থ যাপেতি, তেন সো তত্থ তিট্ঠতি. ইদম্পি, ব্রাহ্মণ, অট্ঠানং যত্থ ঠিতস্স তং দানং উপকপ্পতি.

‘‘ইধ পন, ব্রাহ্মণ, একচ্চো পাণাতিপাতী হোতি…পে… মিচ্ছাদিট্ঠিকো হোতি. সো কাযস্স ভেদা পরং মরণা পেত্তিৰিসযং উপপজ্জতি. যো পেত্তিৰেসযিকানং সত্তানং আহারো, তেন সো তত্থ যাপেতি, তেন সো তত্থ তিট্ঠতি, যং ৰা পনস্স ইতো অনুপ্পৰেচ্ছন্তি মিত্তামচ্চা ৰা ঞাতিসালোহিতা ৰা [মিত্তা ৰা অমচ্চা ৰা ঞাতী ৰা সালোহিতা ৰা (সী. পী.)], তেন সো তত্থ যাপেতি, তেন সো তত্থ তিট্ঠতি. ইদং খো, ব্রাহ্মণ, ঠানং যত্থ ঠিতস্স তং দানং উপকপ্পতী’’তি.

‘‘সচে পন, ভো গোতম, সো পেতো ঞাতিসালোহিতো তং ঠানং অনুপপন্নো হোতি, কো তং দানং পরিভুঞ্জতী’’তি? ‘‘অঞ্ঞেপিস্স, ব্রাহ্মণ, পেতা ঞাতিসালোহিতা তং ঠানং উপপন্না হোন্তি, তে তং দানং পরিভুঞ্জন্তী’’তি.

‘‘সচে পন, ভো গোতম, সো চেৰ পেতো ঞাতিসালোহিতো তং ঠানং অনুপপন্নো হোতি অঞ্ঞেপিস্স ঞাতিসালোহিতা পেতা তং ঠানং অনুপপন্না হোন্তি, কো তং দানং পরিভুঞ্জতী’’তি? ‘‘অট্ঠানং খো এতং, ব্রাহ্মণ, অনৰকাসো যং তং ঠানং ৰিৰিত্তং অস্স ইমিনা দীঘেন অদ্ধুনা যদিদং পেতেহি ঞাতিসালোহিতেহি. অপি চ, ব্রাহ্মণ, দাযকোপি অনিপ্ফলো’’তি.

‘‘অট্ঠানেপি ভৰং গোতমো পরিকপ্পং ৰদতী’’তি? ‘‘অট্ঠানেপি খো অহং, ব্রাহ্মণ, পরিকপ্পং ৰদামি. ইধ, ব্রাহ্মণ, একচ্চো পাণাতিপাতী হোতি, অদিন্নাদাযী হোতি, কামেসুমিচ্ছাচারী হোতি, মুসাৰাদী হোতি, পিসুণৰাচো হোতি, ফরুসৰাচো হোতি, সম্ফপ্পলাপী হোতি, অভিজ্ঝালু হোতি, ব্যাপন্নচিত্তো হোতি, মিচ্ছাদিট্ঠিকো হোতি; সো দাতা হোতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং. সো কাযস্স ভেদা পরং মরণা হত্থীনং সহব্যতং উপপজ্জতি. সো তত্থ লাভী হোতি অন্নস্স পানস্স মালানানালঙ্কারস্স [মালাগন্ধৰিলেপনস্স নানালঙ্কারস্স (ক.)].

‘‘যং খো, ব্রাহ্মণ, ইধ পাণাতিপাতী অদিন্নাদাযী কামেসুমিচ্ছাচারী মুসাৰাদী পিসুণৰাচো ফরুসৰাচো সম্ফপ্পলাপী অভিজ্ঝালু ব্যাপন্নচিত্তো মিচ্ছাদিট্ঠিকো, তেন সো কাযস্স ভেদা পরং মরণা হত্থীনং সহব্যতং উপপজ্জতি. যঞ্চ খো সো দাতা হোতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং, তেন সো তত্থ লাভী হোতি অন্নস্স পানস্স মালানানালঙ্কারস্স.

‘‘ইধ পন, ব্রাহ্মণ, একচ্চো পাণাতিপাতী হোতি…পে… মিচ্ছাদিট্ঠিকো হোতি. সো দাতা হোতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং. সো কাযস্স ভেদা পরং মরণা অস্সানং সহব্যতং উপপজ্জতি…পে… গুন্নং সহব্যতং উপপজ্জতি…পে… কুক্কুরানং সহব্যতং উপপজ্জতি [‘‘কুক্কুরানং সহব্যতং উপপজ্জতী’’তি অযং ৰারো কেসুচি সীহল়পোত্থকেসু ন দিস্সতীতি ইঙ্গলিসপোত্থকে অধোলিপি. তং দসৰারগণনায সমেতি]. সো তত্থ লাভী হোতি অন্নস্স পানস্স মালানানালঙ্কারস্স.

‘‘যং খো, ব্রাহ্মণ, ইধ পাণাতিপাতী…পে. … মিচ্ছাদিট্ঠিকো, তেন সো কাযস্স ভেদা পরং মরণা কুক্কুরানং সহব্যতং উপপজ্জতি. যঞ্চ খো সো দাতা হোতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং, তেন সো তত্থ লাভী হোতি অন্নস্স পানস্স মালানানালঙ্কারস্স.

‘‘ইধ পন, ব্রাহ্মণ, একচ্চো পাণাতিপাতা পটিৰিরতো হোতি…পে… সম্মাদিট্ঠিকো হোতি. সো দাতা হোতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং. সো কাযস্স ভেদা পরং মরণা মনুস্সানং সহব্যতং উপপজ্জতি. সো তত্থ লাভী হোতি মানুসকানং পঞ্চন্নং কামগুণানং.

‘‘যং খো, ব্রাহ্মণ, ইধ পাণাতিপাতা পটিৰিরতো হোতি…পে… সম্মাদিট্ঠিকো, তেন সো কাযস্স ভেদা পরং মরণা মনুস্সানং সহব্যতং উপপজ্জতি. যঞ্চ খো সো দাতা হোতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং, তেন সো তত্থ লাভী হোতি মানুসকানং পঞ্চন্নং কামগুণানং.

‘‘ইধ পন, ব্রাহ্মণ, একচ্চো পাণাতিপাতা পটিৰিরতো হোতি…পে… সম্মাদিট্ঠিকো হোতি. সো দাতা হোতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং. সো কাযস্স ভেদা পরং মরণা দেৰানং সহব্যতং উপপজ্জতি. সো তত্থ লাভী হোতি দিব্বানং পঞ্চন্নং কামগুণানং.

‘‘যং খো, ব্রাহ্মণ, ইধ পাণাতিপাতা পটিৰিরতো হোতি…পে… সম্মাদিট্ঠিকো, তেন সো কাযস্স ভেদা পরং মরণা দেৰানং সহব্যতং উপপজ্জতি. যঞ্চ খো সো দাতা হোতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং, তেন সো তত্থ লাভী হোতি দিব্বানং পঞ্চন্নং কামগুণানং. অপি চ, ব্রাহ্মণ, দাযকোপি অনিপ্ফলো’’তি.

‘‘অচ্ছরিযং, ভো গোতম, অব্ভুতং, ভো গোতম! যাৰঞ্চিদং, ভো গোতম, অলমেৰ দানানি দাতুং, অলং সদ্ধানি কাতুং, যত্র হি নাম দাযকোপি অনিপ্ফলো’’তি. ‘‘এৰমেতং, ব্রাহ্মণ [এৰমেতং ব্রাহ্মণ এৰমেতং ব্রাহ্মণ (সী. স্যা.)], দাযকোপি হি, ব্রাহ্মণ, অনিপ্ফলো’’তি.

‘‘অভিক্কন্তং, ভো গোতম, অভিক্কন্তং, ভো গোতম…পে… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি. একাদসমং.

জাণুস্সোণিৰগ্গো [যমকৰগ্গো (ক.)] দুতিযো.