(১৮) ৩. সাধুৰগ্গো

১. সাধুসুত্তং

১৭৮. [অ. নি. ১০.১৩৪] ‘‘সাধুঞ্চ ৰো, ভিক্খৰে, দেসেস্সামি অসাধুঞ্চ. তং সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমঞ্চ, ভিক্খৰে, অসাধু? পাণাতিপাতো, অদিন্নাদানং, কামেসুমিচ্ছাচারো, মুসাৰাদো, পিসুণা ৰাচা, ফরুসা ৰাচা, সম্ফপ্পলাপো, অভিজ্ঝা, ব্যাপাদো, মিচ্ছাদিট্ঠি – ইদং ৰুচ্চতি, ভিক্খৰে, অসাধু.

‘‘কতমঞ্চ, ভিক্খৰে, সাধু? পাণাতিপাতা ৰেরমণী, অদিন্নাদানা ৰেরমণী, কামেসুমিচ্ছাচারা ৰেরমণী, মুসাৰাদা ৰেরমণী, পিসুণায ৰাচায ৰেরমণী, ফরুসায ৰাচায ৰেরমণী, সম্ফপ্পলাপা ৰেরমণী, অনভিজ্ঝা, অব্যাপাদো, সম্মাদিট্ঠি – ইদং ৰুচ্চতি, ভিক্খৰে, সাধূ’’তি. পঠমং.

২. অরিযধম্মসুত্তং

১৭৯. ‘‘অরিযধম্মঞ্চ ৰো, ভিক্খৰে, দেসেস্সামি অনরিযধম্মঞ্চ. তং সুণাথ…পে… কতমো চ, ভিক্খৰে, অনরিযো ধম্মো? পাণাতিপাতো…পে… মিচ্ছাদিট্ঠি – অযং ৰুচ্চতি, ভিক্খৰে, অনরিযো ধম্মো.

‘‘কতমো চ, ভিক্খৰে, অরিযো ধম্মো? পাণাতিপাতা ৰেরমণী…পে… সম্মাদিট্ঠি – অযং ৰুচ্চতি, ভিক্খৰে, অরিযো ধম্মো’’তি. দুতিযং.

৩. কুসলসুত্তং

১৮০. ‘‘কুসলঞ্চ ৰো, ভিক্খৰে, দেসেস্সামি অকুসলঞ্চ. তং সুণাথ…পে… কতমঞ্চ, ভিক্খৰে, অকুসলং? পাণাতিপাতো…পে… মিচ্ছাদিট্ঠি – ইদং ৰুচ্চতি, ভিক্খৰে, অকুসলং.

‘‘কতমঞ্চ, ভিক্খৰে, কুসলং? পাণাতিপাতা ৰেরমণী…পে… সম্মাদিট্ঠি – ইদং ৰুচ্চতি, ভিক্খৰে, কুসল’’ন্তি. ততিযং.

৪. অত্থসুত্তং

১৮১. ‘‘অত্থঞ্চ ৰো, ভিক্খৰে, দেসেস্সামি অনত্থঞ্চ. তং সুণাথ…পে… কতমো চ, ভিক্খৰে, অনত্থো? পাণাতিপাতো…পে… মিচ্ছাদিট্ঠি – অযং ৰুচ্চতি, ভিক্খৰে, অনত্থো.

‘‘কতমো চ, ভিক্খৰে, অত্থো? পাণাতিপাতা ৰেরমণী…পে… সম্মাদিট্ঠি – অযং ৰুচ্চতি, ভিক্খৰে, অত্থো’’তি. চতুত্থং.

৫. ধম্মসুত্তং

১৮২. ‘‘ধম্মঞ্চ ৰো, ভিক্খৰে, দেসেস্সামি অধম্মঞ্চ. তং সুণাথ…পে… কতমো চ, ভিক্খৰে, অধম্মো? পাণাতিপাতো…পে… মিচ্ছাদিট্ঠি – অযং ৰুচ্চতি, ভিক্খৰে, অধম্মো.

‘‘কতমো চ, ভিক্খৰে, ধম্মো? পাণাতিপাতা ৰেরমণী…পে… সম্মাদিট্ঠি – অযং ৰুচ্চতি, ভিক্খৰে, ধম্মো’’তি. পঞ্চমং.

৬. আসৰসুত্তং

১৮৩. ‘‘সাসৰঞ্চ ৰো, ভিক্খৰে, ধম্মং দেসেস্সামি অনাসৰঞ্চ. তং সুণাথ…পে… কতমো চ, ভিক্খৰে, সাসৰো ধম্মো? পাণাতিপাতো…পে… মিচ্ছাদিট্ঠি – অযং ৰুচ্চতি, ভিক্খৰে, সাসৰো ধম্মো.

‘‘কতমো চ, ভিক্খৰে, অনাসৰো ধম্মো? পাণাতিপাতা ৰেরমণী…পে… সম্মাদিট্ঠি – অযং ৰুচ্চতি, ভিক্খৰে, অনাসৰো ধম্মো’’তি. ছট্ঠং.

৭. ৰজ্জসুত্তং

১৮৪. ‘‘সাৰজ্জঞ্চ ৰো, ভিক্খৰে, ধম্মং দেসেস্সামি অনৰজ্জঞ্চ. তং সুণাথ…পে… কতমো চ, ভিক্খৰে, সাৰজ্জো ধম্মো? পাণাতিপাতো…পে… মিচ্ছাদিট্ঠি – অযং ৰুচ্চতি, ভিক্খৰে, সাৰজ্জো ধম্মো.

‘‘কতমো চ, ভিক্খৰে, অনৰজ্জো ধম্মো? পাণাতিপাতা ৰেরমণী…পে… সম্মাদিট্ঠি – অযং ৰুচ্চতি, ভিক্খৰে, অনৰজ্জো ধম্মো’’তি. সত্তমং.

৮. তপনীযসুত্তং

১৮৫. ‘‘তপনীযঞ্চ ৰো, ভিক্খৰে, ধম্মং দেসেস্সামি অতপনীযঞ্চ. তং সুণাথ…পে… কতমো চ, ভিক্খৰে, তপনীযো ধম্মো? পাণাতিপাতো…পে… মিচ্ছাদিট্ঠি – অযং ৰুচ্চতি, ভিক্খৰে, তপনীযো ধম্মো.

‘‘কতমো চ, ভিক্খৰে, অতপনীযো ধম্মো? পাণাতিপাতা ৰেরমণী…পে… সম্মাদিট্ঠি – অযং ৰুচ্চতি, ভিক্খৰে, অতপনীযো ধম্মো’’তি. অট্ঠমং.

৯. আচযগামিসুত্তং

১৮৬. ‘‘আচযগামিঞ্চ ৰো, ভিক্খৰে, ধম্মং দেসেস্সামি অপচযগামিঞ্চ. তং সুণাথ…পে… কতমো চ, ভিক্খৰে, আচযগামী ধম্মো? পাণাতিপাতো…পে… মিচ্ছাদিট্ঠি – অযং ৰুচ্চতি, ভিক্খৰে, আচযগামী ধম্মো.

‘‘কতমো চ, ভিক্খৰে, অপচযগামী ধম্মো? পাণাতিপাতা ৰেরমণী…পে… সম্মাদিট্ঠি – অযং ৰুচ্চতি, ভিক্খৰে, অপচযগামী ধম্মো’’তি. নৰমং.

১০. দুক্খুদ্রযসুত্তং

১৮৭. ‘‘দুক্খুদ্রযঞ্চ ৰো, ভিক্খৰে, ধম্মং দেসেস্সামি সুখুদ্রযঞ্চ. তং সুণাথ…পে… কতমো চ, ভিক্খৰে, দুক্খুদ্রযো ধম্মো? পাণাতিপাতো…পে… মিচ্ছাদিট্ঠি – অযং ৰুচ্চতি, ভিক্খৰে, দুক্খুদ্রযো ধম্মো.

‘‘কতমো চ, ভিক্খৰে, সুখুদ্রযো ধম্মো? পাণাতিপাতা ৰেরমণী…পে… সম্মাদিট্ঠি – অযং ৰুচ্চতি, ভিক্খৰে, সুখুদ্রযো ধম্মো’’তি. দসমং.

১১. ৰিপাকসুত্তং

১৮৮. ‘‘দুক্খৰিপাকঞ্চ ৰো, ভিক্খৰে, ধম্মং দেসেস্সামি সুখৰিপাকঞ্চ. তং সুণাথ…পে… কতমো চ, ভিক্খৰে, দুক্খৰিপাকো ধম্মো? পাণাতিপাতো…পে… মিচ্ছাদিট্ঠি – অযং ৰুচ্চতি, ভিক্খৰে, দুক্খৰিপাকো ধম্মো.

‘‘কতমো চ, ভিক্খৰে, সুখৰিপাকো ধম্মো? পাণাতিপাতা ৰেরমণী…পে… সম্মাদিট্ঠি – অযং ৰুচ্চতি, ভিক্খৰে, সুখৰিপাকো ধম্মো’’তি. একাদসমং.

সাধুৰগ্গো ততিযো.