৪. ব্যাকরণসুত্তং

৮৪. তত্র খো আযস্মা মহামোগ্গল্লানো ভিক্খূ আমন্তেসি – ‘‘আৰুসো ভিক্খৰে’’তি. ‘‘আৰুসো’’তি খো তে ভিক্খূ আযস্মতো মহামোগ্গল্লানস্স পচ্চস্সোসুং. আযস্মা মহামোগ্গল্লানো এতদৰোচ –

‘‘ইধাৰুসো, ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি. তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো সমনুযুঞ্জতি সমনুগ্গাহতি সমনুভাসতি. সো তথাগতেন ৰা তথাগতসাৰকেন ৰা ঝাযিনা সমাপত্তিকুসলেন পরচিত্তকুসলেন পরচিত্তপরিযাযকুসলেন সমনুযুঞ্জিযমানো সমনুগ্গাহিযমানো সমনুভাসিযমানো ইরীণং আপজ্জতি ৰিচিনং [ৰিসিনং (সী. অট্ঠ.)] আপজ্জতি অনযং আপজ্জতি ব্যসনং আপজ্জতি অনযব্যসনং আপজ্জতি.

‘‘তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো এৰং চেতসা চেতো পরিচ্চ মনসি করোতি – ‘কিং নু খো অযমাযস্মা অঞ্ঞং ব্যাকরোতি – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি?

‘‘তমেনং তথাগতো ৰা তথাগতসাৰকো ৰা ঝাযী সমাপত্তিকুসলো পরচিত্তকুসলো পরচিত্তপরিযাযকুসলো এৰং চেতসা চেতো পরিচ্চ পজানাতি –

‘কোধনো খো অযমাযস্মা; কোধপরিযুট্ঠিতেন চেতসা বহুলং ৰিহরতি. কোধপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘উপনাহী খো পন অযমাযস্মা; উপনাহপরিযুট্ঠিতেন চেতসা বহুলং ৰিহরতি. উপনাহপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘মক্খী খো পন অযমাযস্মা; মক্খপরিযুট্ঠিতেন চেতসা বহুলং ৰিহরতি. মক্খপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘পল়াসী খো পন অযমাযস্মা; পল়াসপরিযুট্ঠিতেন চেতসা বহুলং ৰিহরতি. পল়াসপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘ইস্সুকী খো পন অযমাযস্মা; ইস্সাপরিযুট্ঠিতেন চেতসা বহুলং ৰিহরতি. ইস্সাপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘মচ্ছরী খো পন অযমাযস্মা; মচ্ছেরপরিযুট্ঠিতেন চেতসা বহুলং ৰিহরতি. মচ্ছেরপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘সঠো খো পন অযমাযস্মা; সাঠেয্যপরিযুট্ঠিতেন চেতসা বহুলং ৰিহরতি. সাঠেয্যপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘মাযাৰী খো পন অযমাযস্মা; মাযাপরিযুট্ঠিতেন চেতসা বহুলং ৰিহরতি. মাযাপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘পাপিচ্ছো খো পন অযমাযস্মা; ইচ্ছাপরিযুট্ঠিতেন চেতসা বহুলং ৰিহরতি. ইচ্ছাপরিযুট্ঠানং খো পন তথাগতপ্পৰেদিতে ধম্মৰিনযে পরিহানমেতং.

‘সতি [মুট্ঠস্সতি (সী. স্যা.)] খো পন অযমাযস্মা উত্তরি করণীযে ওরমত্তকেন ৰিসেসাধিগমেন অন্তরা ৰোসানং আপন্নো. অন্তরা ৰোসানগমনং খো পন তথাগতপ্পৰেদিতে ধম্মৰিনযে পরিহানমেতং’.

‘‘সো ৰতাৰুসো, ভিক্খু ‘ইমে দস ধম্মে অপ্পহায ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি নেতং ঠানং ৰিজ্জতি. সো ৰতাৰুসো, ভিক্খু ‘ইমে দস ধম্মে পহায ইমস্মিং ধম্মৰিনযে ৰুদ্ধিং ৰিরূল়্হিং ৰেপুল্লং আপজ্জিস্সতী’তি ঠানমেতং ৰিজ্জতী’’তি. চতুত্থং.