১. ৰাহনসুত্তং

৮১. একং সমযং ভগৰা চম্পাযং ৰিহরতি গগ্গরায পোক্খরণিযা তীরে. অথ খো আযস্মা ৰাহনো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা ৰাহনো ভগৰন্তং এতদৰোচ – ‘‘কতিহি নু খো, ভন্তে, ধম্মেহি তথাগতো নিস্সটো ৰিসংযুত্তো ৰিপ্পমুত্তো ৰিমরিযাদীকতেন চেতসা ৰিহরতী’’তি?

‘‘দসহি খো, ৰাহন, ধম্মেহি তথাগতো নিস্সটো ৰিসংযুত্তো ৰিপ্পমুত্তো ৰিমরিযাদীকতেন চেতসা ৰিহরতি. কতমেহি দসহি? রূপেন খো, ৰাহন, তথাগতো নিস্সটো ৰিসংযুত্তো ৰিপ্পমুত্তো ৰিমরিযাদীকতেন চেতসা ৰিহরতি, ৰেদনায খো, ৰাহন…পে… সঞ্ঞায খো, ৰাহন… সঙ্খারেহি খো, ৰাহন… ৰিঞ্ঞাণেন খো, ৰাহন… জাতিযা খো, ৰাহন… জরায খো, ৰাহন… মরণেন খো, ৰাহন… দুক্খেহি খো, ৰাহন… কিলেসেহি খো, ৰাহন, তথাগতো নিস্সটো ৰিসংযুত্তো ৰিপ্পমুত্তো ৰিমরিযাদীকতেন চেতসা ৰিহরতি. সেয্যথাপি, ৰাহন, উপ্পলং ৰা পদুমং ৰা পুণ্ডরীকং ৰা উদকে জাতং উদকে সংৰড্ঢং উদকা পচ্চুগ্গম্ম ঠিতং অনুপলিত্তং উদকেন; এৰমেৰং খো, ৰাহন, ইমেহি দসহি ধম্মেহি তথাগতো নিস্সটো ৰিসংযুত্তো ৰিপ্পমুত্তো ৰিমরিযাদীকতেন চেতসা ৰিহরতী’’তি. পঠমং.