৬. দুতিযসুখসুত্তং

৬৬. একং সমযং আযস্মা সারিপুত্তো মগধেসু ৰিহরতি নালকগামকে. অথ খো সামণ্ডকানি পরিব্বাজকো যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো সামণ্ডকানি পরিব্বাজকো আযস্মন্তং সারিপুত্তং এতদৰোচ –

‘‘কিং নু খো, আৰুসো, সারিপুত্ত, ইমস্মিং ধম্মৰিনযে সুখং, কিং দুক্খ’’ন্তি? ‘‘অনভিরতি খো, আৰুসো, ইমস্মিং ধম্মৰিনযে দুক্খা, অভিরতি সুখা. অনভিরতিযা, আৰুসো, সতি ইদং দুক্খং পাটিকঙ্খং – গচ্ছন্তোপি সুখং সাতং নাধিগচ্ছতি, ঠিতোপি… নিসিন্নোপি… সযানোপি… গামগতোপি… অরঞ্ঞগতোপি… রুক্খমূলগতোপি… সুঞ্ঞাগারগতোপি… অব্ভোকাসগতোপি… ভিক্খুমজ্ঝগতোপি সুখং সাতং নাধিগচ্ছতি. অনভিরতিযা, আৰুসো, সতি ইদং দুক্খং পাটিকঙ্খং.

‘‘অভিরতিযা, আৰুসো, সতি ইদং সুখং পাটিকঙ্খং – গচ্ছন্তোপি সুখং সাতং অধিগচ্ছতি, ঠিতোপি… নিসিন্নোপি… সযানোপি… গামগতোপি… অরঞ্ঞগতোপি… রুক্খমূলগতোপি… সুঞ্ঞাগারগতোপি… অব্ভোকাসগতোপি… ভিক্খুমজ্ঝগতোপি সুখং সাতং অধিগচ্ছতি. অভিরতিযা, আৰুসো, সতি ইদং সুখং পাটিকঙ্খ’’ন্তি. ছট্ঠং.