১. উপালিসুত্তং

৩১. অথ খো আযস্মা উপালি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা উপালি ভগৰন্তং এতদৰোচ – ‘‘কতি নু খো, ভন্তে, অত্থৰসে পটিচ্চ তথাগতেন সাৰকানং সিক্খাপদং পঞ্ঞত্তং, পাতিমোক্খং উদ্দিট্ঠ’’ন্তি?

‘‘দস খো, উপালি, অত্থৰসে পটিচ্চ তথাগতেন সাৰকানং সিক্খাপদং পঞ্ঞত্তং, পাতিমোক্খং উদ্দিট্ঠং. কতমে দস? সঙ্ঘসুট্ঠুতায, সঙ্ঘফাসুতায, দুম্মঙ্কূনং পুগ্গলানং নিগ্গহায, পেসলানং ভিক্খূনং ফাসুৰিহারায, দিট্ঠধম্মিকানং আসৰানং সংৰরায, সম্পরাযিকানং আসৰানং পটিঘাতায, অপ্পসন্নানং পসাদায, পসন্নানং ভিয্যোভাৰায, সদ্ধম্মট্ঠিতিযা, ৰিনযানুগ্গহায – ইমে খো, উপালি, দস অত্থৰসে পটিচ্চ তথাগতেন সাৰকানং সিক্খাপদং পঞ্ঞত্তং, পাতিমোক্খং উদ্দিট্ঠ’’ন্তি. পঠমং.