২. পাতিমোক্খট্ঠপনাসুত্তং

৩২. ‘‘কতি নু খো, ভন্তে, পাতিমোক্খট্ঠপনা’’তি? ‘‘দস খো, উপালি, পাতিমোক্খট্ঠপনা. কতমে দস? পারাজিকো তস্সং পরিসাযং নিসিন্নো হোতি, পারাজিককথা ৰিপ্পকতা হোতি, অনুপসম্পন্নো তস্সং পরিসাযং নিসিন্নো হোতি, অনুপসম্পন্নকথা ৰিপ্পকতা হোতি, সিক্খং পচ্চক্খাতকো তস্সং পরিসাযং নিসিন্নো হোতি, সিক্খং পচ্চক্খাতককথা ৰিপ্পকতা হোতি, পণ্ডকো তস্সং পরিসাযং নিসিন্নো হোতি, পণ্ডককথা ৰিপ্পকতা হোতি, ভিক্খুনিদূসকো তস্সং পরিসাযং নিসিন্নো হোতি, ভিক্খুনিদূসককথা ৰিপ্পকতা হোতি – ইমে খো, উপালি, দস পাতিমোক্খট্ঠপনা’’তি. দুতিযং.