৪. উপালিৰগ্গো

১. উপালিসুত্তং

৩১. অথ খো আযস্মা উপালি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা উপালি ভগৰন্তং এতদৰোচ – ‘‘কতি নু খো, ভন্তে, অত্থৰসে পটিচ্চ তথাগতেন সাৰকানং সিক্খাপদং পঞ্ঞত্তং, পাতিমোক্খং উদ্দিট্ঠ’’ন্তি?

‘‘দস খো, উপালি, অত্থৰসে পটিচ্চ তথাগতেন সাৰকানং সিক্খাপদং পঞ্ঞত্তং, পাতিমোক্খং উদ্দিট্ঠং. কতমে দস? সঙ্ঘসুট্ঠুতায, সঙ্ঘফাসুতায, দুম্মঙ্কূনং পুগ্গলানং নিগ্গহায, পেসলানং ভিক্খূনং ফাসুৰিহারায, দিট্ঠধম্মিকানং আসৰানং সংৰরায, সম্পরাযিকানং আসৰানং পটিঘাতায, অপ্পসন্নানং পসাদায, পসন্নানং ভিয্যোভাৰায, সদ্ধম্মট্ঠিতিযা, ৰিনযানুগ্গহায – ইমে খো, উপালি, দস অত্থৰসে পটিচ্চ তথাগতেন সাৰকানং সিক্খাপদং পঞ্ঞত্তং, পাতিমোক্খং উদ্দিট্ঠ’’ন্তি. পঠমং.

২. পাতিমোক্খট্ঠপনাসুত্তং

৩২. ‘‘কতি নু খো, ভন্তে, পাতিমোক্খট্ঠপনা’’তি? ‘‘দস খো, উপালি, পাতিমোক্খট্ঠপনা. কতমে দস? পারাজিকো তস্সং পরিসাযং নিসিন্নো হোতি, পারাজিককথা ৰিপ্পকতা হোতি, অনুপসম্পন্নো তস্সং পরিসাযং নিসিন্নো হোতি, অনুপসম্পন্নকথা ৰিপ্পকতা হোতি, সিক্খং পচ্চক্খাতকো তস্সং পরিসাযং নিসিন্নো হোতি, সিক্খং পচ্চক্খাতককথা ৰিপ্পকতা হোতি, পণ্ডকো তস্সং পরিসাযং নিসিন্নো হোতি, পণ্ডককথা ৰিপ্পকতা হোতি, ভিক্খুনিদূসকো তস্সং পরিসাযং নিসিন্নো হোতি, ভিক্খুনিদূসককথা ৰিপ্পকতা হোতি – ইমে খো, উপালি, দস পাতিমোক্খট্ঠপনা’’তি. দুতিযং.

৩. উব্বাহিকাসুত্তং

৩৩. [চূল়ৰ. ২৩১] ‘‘কতিহি নু খো, ভন্তে, ধম্মেহি সমন্নাগতো ভিক্খু উব্বাহিকায সম্মন্নিতব্বো’’তি? ‘‘দসহি খো, উপালি, ধম্মেহি সমন্নাগতো ভিক্খু উব্বাহিকায সম্মন্নিতব্বো. কতমেহি দসহি? ইধুপালি, ভিক্খু সীলৰা হোতি; পাতিমোক্খসংৰরসংৰুতো ৰিহরতি আচারগোচরসম্পন্নো অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু; বহুস্সুতো হোতি সুতধরো সুতসন্নিচযো, যে তে ধম্মা আদিকল্যাণা মজ্ঝেকল্যাণা পরিযোসানকল্যাণা সাত্থং সব্যঞ্জনং [সত্থা সব্যঞ্জনা (সী.) এৰমুপরিপি] কেৰলপরিপুণ্ণং পরিসুদ্ধং ব্রহ্মচরিযং অভিৰদন্তি, তথারূপাস্স ধম্মা বহুস্সুতা হোন্তি ধাতা ৰচসা পরিচিতা মনসানুপেক্খিতা দিট্ঠিযা সুপ্পটিৰিদ্ধা; উভযানি খো পনস্স পাতিমোক্খানি ৰিত্থারেন স্ৰাগতানি হোন্তি সুৰিভত্তানি সুপ্পৰত্তীনি সুৰিনিচ্ছিতানি সুত্তসো অনুব্যঞ্জনসো; ৰিনযে খো পন ঠিতো হোতি অসংহীরো; পটিবলো হোতি উভো অত্থপচ্চত্থিকে সঞ্ঞাপেতুং পঞ্ঞাপেতুং নিজ্ঝাপেতুং পেক্খেতুং পসাদেতুং; অধিকরণসমুপ্পাদৰূপসমকুসলো হোতি – অধিকরণং জানাতি; অধিকরণসমুদযং জানাতি; অধিকরণনিরোধং জানাতি; অধিকরণনিরোধগামিনিং পটিপদং জানাতি. ইমেহি খো, উপালি, দসহি ধম্মেহি সমন্নাগতো ভিক্খু উব্বাহিকায সম্মন্নিতব্বো’’তি. ততিযং.

৪. উপসম্পদাসুত্তং

৩৪. ‘‘কতিহি নু খো, ভন্তে, ধম্মেহি সমন্নাগতেন ভিক্খুনা উপসম্পাদেতব্ব’’ন্তি? ‘‘দসহি খো, উপালি, ধম্মেহি সমন্নাগতেন ভিক্খুনা উপসম্পাদেতব্বং. কতমেহি দসহি? ইধুপালি, ভিক্খু সীলৰা হোতি, পাতিমোক্খসংৰরসংৰুতো ৰিহরতি আচারগোচরসম্পন্নো অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু; বহুস্সুতো হোতি সুতধরো সুতসন্নিচযো, যে তে ধম্মা আদিকল্যাণা মজ্ঝেকল্যাণা পরিযোসানকল্যাণা সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং অভিৰদন্তি, তথারূপাস্স ধম্মা বহুস্সুতা হোন্তি ধাতা ৰচসা পরিচিতা মনসানুপেক্খিতা দিট্ঠিযা সুপ্পটিৰিদ্ধা; পাতিমোক্খং খো পনস্স ৰিত্থারেন স্ৰাগতং হোতি সুৰিভত্তং সুপ্পৰত্তং সুৰিনিচ্ছিতং সুত্তসো অনুব্যঞ্জনসো; পটিবলো হোতি গিলানং উপট্ঠাতুং ৰা উপট্ঠাপেতুং ৰা; পটিবলো হোতি অনভিরতিং ৰূপকাসেতুং ৰা ৰূপকাসাপেতুং ৰা; পটিবলো হোতি উপ্পন্নং কুক্কুচ্চং ধম্মতো ৰিনোদেতুং; পটিবলো হোতি উপ্পন্নং দিট্ঠিগতং ধম্মতো ৰিৰেচেতুং; পটিবলো হোতি অধিসীলে সমাদপেতুং; পটিবলো হোতি অধিচিত্তে সমাদপেতুং; পটিবলো হোতি অধিপঞ্ঞায সমাদপেতুং. ইমেহি খো, উপালি, দসহি ধম্মেহি সমন্নাগতেন ভিক্খুনা উপসম্পাদেতব্ব’’ন্তি. চতুত্থং.

৫. নিস্সযসুত্তং

৩৫. ‘‘কতিহি নু খো, ভন্তে, ধম্মেহি সমন্নাগতেন ভিক্খুনা নিস্সযো দাতব্বো’’তি? ‘‘দসহি খো, উপালি, ধম্মেহি সমন্নাগতেন ভিক্খুনা নিস্সযো দাতব্বো. কতমেহি দসহি? ইধুপালি, ভিক্খু সীলৰা হোতি…পে… সমাদায সিক্খতি সিক্খাপদেসু; বহুস্সুতো হোতি…পে… দিট্ঠিযা সুপ্পটিৰিদ্ধা; পাতিমোক্খং খো পনস্স ৰিত্থারেন স্ৰাগতং হোতি সুৰিভত্তং সুপ্পৰত্তং সুৰিনিচ্ছিতং সুত্তসো অনুব্যঞ্জনসো; পটিবলো হোতি গিলানং উপট্ঠাতুং ৰা উপট্ঠাপেতুং ৰা; পটিবলো হোতি অনভিরতিং ৰূপকাসেতুং ৰা ৰূপকাসাপেতুং ৰা; পটিবলো হোতি উপ্পন্নং কুক্কুচ্চং ধম্মতো ৰিনোদেতুং; পটিবলো হোতি উপ্পন্নং দিট্ঠিগতং ধম্মতো ৰিৰেচেতুং; পটিবলো হোতি অধিসীলে…পে… অধিচিত্তে… অধিপঞ্ঞায সমাদপেতুং. ইমেহি খো, উপালি, দসহি ধম্মেহি সমন্নাগতেন ভিক্খুনা নিস্সযো দাতব্বো’’তি. পঞ্চমং.

৬. সামণেরসুত্তং

৩৬. ‘‘কতিহি নু খো, ভন্তে, ধম্মেহি সমন্নাগতেন ভিক্খুনা সামণেরো উপট্ঠাপেতব্বো’’তি? ‘‘দসহি খো, উপালি, ধম্মেহি সমন্নাগতেন ভিক্খুনা সামণেরো উপট্ঠাপেতব্বো. কতমেহি দসহি? ইধুপালি, ভিক্খু সীলৰা হোতি…পে… সমাদায সিক্খতি সিক্খাপদেসু; বহুস্সুতো হোতি…পে… দিট্ঠিযা সুপ্পটিৰিদ্ধা; পাতিমোক্খং খো পনস্স ৰিত্থারেন স্ৰাগতং হোতি সুৰিভত্তং সুপ্পৰত্তং সুৰিনিচ্ছিতং সুত্তসো অনুব্যঞ্জনসো; পটিবলো হোতি গিলানং উপট্ঠাতুং ৰা উপট্ঠাপেতুং ৰা; পটিবলো হোতি অনভিরতিং ৰূপকাসেতুং ৰা ৰূপকাসাপেতুং ৰা; পটিবলো হোতি উপ্পন্নং কুক্কুচ্চং ধম্মতো ৰিনোদেতুং; পটিবলো হোতি উপ্পন্নং দিট্ঠিগতং ধম্মতো ৰিৰেচেতুং; পটিবলো হোতি অধিসীলে সমাদপেতুং; পটিবলো হোতি অধিচিত্তে সমাদপেতুং; পটিবলো হোতি অধিপঞ্ঞায সমাদপেতুং. ইমেহি খো, উপালি, দসহি ধম্মেহি সমন্নাগতেন ভিক্খুনা সামণেরো উপট্ঠাপেতব্বো’’তি. ছট্ঠং.

৭. সঙ্ঘভেদসুত্তং

৩৭. ‘‘‘সঙ্ঘভেদো সঙ্ঘভেদো’তি, ভন্তে, ৰুচ্চতি. কিত্তাৰতা নু খো, ভন্তে, সঙ্ঘো ভিন্নো হোতী’’তি? ‘‘ইধুপালি, ভিক্খূ অধম্মং ধম্মোতি দীপেন্তি, ধম্মং অধম্মোতি দীপেন্তি, অৰিনযং ৰিনযোতি দীপেন্তি, ৰিনযং অৰিনযোতি দীপেন্তি, অভাসিতং অলপিতং তথাগতেন ভাসিতং লপিতং তথাগতেনাতি দীপেন্তি, ভাসিতং লপিতং তথাগতেন অভাসিতং অলপিতং তথাগতেনাতি দীপেন্তি, অনাচিণ্ণং তথাগতেন আচিণ্ণং তথাগতেনাতি দীপেন্তি, আচিণ্ণং তথাগতেন অনাচিণ্ণং তথাগতেনাতি দীপেন্তি, অপঞ্ঞত্তং তথাগতেন পঞ্ঞত্তং তথাগতেনাতি দীপেন্তি, পঞ্ঞত্তং তথাগতেন অপঞ্ঞত্তং তথাগতেনাতি দীপেন্তি. তে ইমেহি দসহি ৰত্থূহি অৰকস্সন্তি অপকস্সন্তি আৰেনি [আৰেনিং (চূল়ৰ. ৩৫২) আৰেণি, আৰেণিকং (তত্থেৰ অধোলিপি)] কম্মানি করোন্তি আৰেনি পাতিমোক্খং উদ্দিসন্তি. এত্তাৰতা খো, উপালি, সঙ্ঘো ভিন্নো হোতী’’তি. সত্তমং.

৮. সঙ্ঘসামগ্গীসুত্তং

৩৮. [চূল়ৰ. ৩৫৩] ‘‘‘সঙ্ঘসামগ্গী সঙ্ঘসামগ্গী’তি, ভন্তে, ৰুচ্চতি. কিত্তাৰতা নু খো, ভন্তে, সঙ্ঘো সমগ্গো হোতী’’তি? ‘‘ইধুপালি, ভিক্খূ অধম্মং অধম্মোতি দীপেন্তি, ধম্মং ধম্মোতি দীপেন্তি, অৰিনযং অৰিনযোতি দীপেন্তি, ৰিনযং ৰিনযোতি দীপেন্তি, অভাসিতং অলপিতং তথাগতেন অভাসিতং অলপিতং তথাগতেনাতি দীপেন্তি, ভাসিতং লপিতং তথাগতেন ভাসিতং লপিতং তথাগতেনাতি দীপেন্তি, অনাচিণ্ণং তথাগতেন অনাচিণ্ণং তথাগতেনাতি দীপেন্তি, আচিণ্ণং তথাগতেন আচিণ্ণং তথাগতেনাতি দীপেন্তি, অপঞ্ঞত্তং তথাগতেন অপঞ্ঞত্তং তথাগতেনাতি দীপেন্তি, পঞ্ঞত্তং তথাগতেন পঞ্ঞত্তং তথাগতেনাতি দীপেন্তি. তে ইমেহি দসহি ৰত্থূহি ন অৰকস্সন্তি ন অপকস্সন্তি ন আৰেনি কম্মানি করোন্তি ন আৰেনি পাতিমোক্খং উদ্দিসন্তি. এত্তাৰতা খো, উপালি, সঙ্ঘো সমগ্গো হোতী’’তি. অট্ঠমং.

৯. পঠমআনন্দসুত্তং

৩৯. অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘‘সঙ্ঘভেদো সঙ্ঘভেদো’তি, ভন্তে, ৰুচ্চতি. কিত্তাৰতা নু খো, ভন্তে, সঙ্ঘো ভিন্নো হোতী’’তি? ‘‘ইধানন্দ, ভিক্খূ অধম্মং ধম্মোতি দীপেন্তি, ধম্মং অধম্মোতি দীপেন্তি, অৰিনযং ৰিনযোতি দীপেন্তি…পে… পঞ্ঞত্তং তথাগতেন অপঞ্ঞত্তং তথাগতেনাতি দীপেন্তি. তে ইমেহি দসহি ৰত্থূহি অৰকস্সন্তি অপকস্সন্তি আৰেনি কম্মানি করোন্তি আৰেনি পাতিমোক্খং উদ্দিসন্তি. এত্তাৰতা খো, আনন্দ, সঙ্ঘো ভিন্নো হোতী’’তি.

‘‘সমগ্গং পন, ভন্তে, সঙ্ঘং ভিন্দিত্ৰা কিং সো পসৰতী’’তি? ‘‘কপ্পট্ঠিকং, আনন্দ, কিব্বিসং পসৰতী’’তি. ‘‘কিং পন, ভন্তে, কপ্পট্ঠিকং কিব্বিস’’ন্তি? ‘‘কপ্পং, আনন্দ, নিরযম্হি পচ্চতীতি –

‘‘আপাযিকো নেরযিকো, কপ্পট্ঠো সঙ্ঘভেদকো;

ৰগ্গরতো অধম্মট্ঠো, যোগক্খেমা পধংসতি;

সঙ্ঘং সমগ্গং ভিন্দিত্ৰা [ভেত্ৰান (সী. স্যা.), ভিত্ৰান (ক.) চূল়ৰ. ৩৫৪; ইতিৰু. ১৮; কথাৰ. ৬৫৭] কপ্পং নিরযম্হি পচ্চতী’’তি. নৰমং;

১০. দুতিযআনন্দসুত্তং

৪০. ‘‘‘সঙ্ঘসামগ্গী সঙ্ঘসামগ্গী’তি, ভন্তে, ৰুচ্চতি. কিত্তাৰতা নু খো, ভন্তে, সঙ্ঘো সমগ্গো হোতী’’তি? ‘‘ইধানন্দ, ভিক্খূ অধম্মং অধম্মোতি দীপেন্তি, ধম্মং ধম্মোতি দীপেন্তি, অৰিনযং অৰিনযোতি দীপেন্তি, ৰিনযং ৰিনযোতি দীপেন্তি, অভাসিতং অলপিতং তথাগতেন অভাসিতং অলপিতং তথাগতেনাতি দীপেন্তি, ভাসিতং লপিতং তথাগতেন ভাসিতং লপিতং তথাগতেনাতি দীপেন্তি, অনাচিণ্ণং তথাগতেন অনাচিণ্ণং তথাগতেনাতি দীপেন্তি, আচিণ্ণং তথাগতেন আচিণ্ণং তথাগতেনাতি দীপেন্তি, অপঞ্ঞত্তং তথাগতেন অপঞ্ঞত্তং তথাগতেনাতি দীপেন্তি, পঞ্ঞত্তং তথাগতেন পঞ্ঞত্তং তথাগতেনাতি দীপেন্তি. তে ইমেহি দসহি ৰত্থূহি ন অৰকস্সন্তি ন অপকস্সন্তি ন আৰেনি কম্মানি করোন্তি ন আৰেনি পাতিমোক্খং উদ্দিসন্তি. এত্তাৰতা খো, আনন্দ, সঙ্ঘো সমগ্গো হোতী’’তি.

‘‘ভিন্নং পন, ভন্তে, সঙ্ঘং সমগ্গং কত্ৰা কিং সো পসৰতী’’তি? ‘‘ব্রহ্মং, আনন্দ, পুঞ্ঞং পসৰতী’’তি. ‘‘কিং পন, ভন্তে, ব্রহ্মং পুঞ্ঞ’’ন্তি? ‘‘কপ্পং, আনন্দ, সগ্গম্হি মোদতীতি –

‘‘সুখা সঙ্ঘস্স সামগ্গী, সমগ্গানঞ্চ অনুগ্গহো;

সমগ্গরতো ধম্মট্ঠো, যোগক্খেমা ন ধংসতি;

সঙ্ঘং সমগ্গং কত্ৰান, কপ্পং সগ্গম্হি মোদতী’’তি. দসমং;

উপালিৰগ্গো চতুত্থো.