৭. সারিপুত্তসুত্তং

৭. অথ খো আযস্মা আনন্দো যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো আযস্মা আনন্দো আযস্মন্তং সারিপুত্তং এতদৰোচ –

‘‘সিযা নু খো, আৰুসো সারিপুত্ত, ভিক্খুনো তথারূপো সমাধিপটিলাভো যথা নেৰ পথৰিযং পথৰিসঞ্ঞী অস্স, ন আপস্মিং আপোসঞ্ঞী অস্স, ন তেজস্মিং তেজোসঞ্ঞী অস্স, ন ৰাযস্মিং ৰাযোসঞ্ঞী অস্স, ন আকাসানঞ্চাযতনে আকাসানঞ্চাযতনসঞ্ঞী অস্স, ন ৰিঞ্ঞাণঞ্চাযতনে ৰিঞ্ঞাণঞ্চাযতনসঞ্ঞী অস্স, ন আকিঞ্চঞ্ঞাযতনে আকিঞ্চঞ্ঞাযতনসঞ্ঞী অস্স, ন নেৰসঞ্ঞানাসঞ্ঞাযতনে নেৰসঞ্ঞানাসঞ্ঞাযতনসঞ্ঞী অস্স, ন ইধলোকে ইধলোকসঞ্ঞী অস্স, ন পরলোকে পরলোকসঞ্ঞী অস্স; সঞ্ঞী চ পন অস্সা’’তি?

‘‘সিযা, আৰুসো আনন্দ, ভিক্খুনো তথারূপো সমাধিপটিলাভো যথা নেৰ পথৰিযং পথৰিসঞ্ঞী অস্স…পে… ন পরলোকে পরলোকসঞ্ঞী অস্স; সঞ্ঞী চ পন অস্সা’’তি.

‘‘যথা কথং পন, আৰুসো সারিপুত্ত, সিযা ভিক্খুনো তথারূপো সমাধিপটিলাভো যথা নেৰ পথৰিযং পথৰিসঞ্ঞী অস্স…পে… সঞ্ঞী চ পন অস্সা’’তি? ‘‘একমিদাহং, আৰুসো আনন্দ, সমযং ইধেৰ সাৰত্থিযং ৰিহরামি অন্ধৰনস্মিং. তত্থাহং [অথাহং (ক.)] তথারূপং সমাধিং সমাপজ্জিং [পটিলভামি (ক.)] যথা নেৰ পথৰিযং পথৰিসঞ্ঞী অহোসিং, ন আপস্মিং আপোসঞ্ঞী অহোসিং, ন তেজস্মিং তেজোসঞ্ঞী অহোসিং, ন ৰাযস্মিং ৰাযোসঞ্ঞী অহোসিং, ন আকাসানঞ্চাযতনে আকাসানঞ্চাযতনসঞ্ঞী অহোসিং, ন ৰিঞ্ঞাণঞ্চাযতনে ৰিঞ্ঞাণঞ্চাযতনসঞ্ঞী অহোসিং, ন আকিঞ্চঞ্ঞাযতনে আকিঞ্চঞ্ঞাযতনসঞ্ঞী অহোসিং, ন নেৰসঞ্ঞানাসঞ্ঞাযতনে নেৰসঞ্ঞানাসঞ্ঞাযতনসঞ্ঞী অহোসিং, ন ইধলোকে ইধলোকসঞ্ঞী অহোসিং, ন পরলোকে পরলোকসঞ্ঞী অহোসিং; সঞ্ঞী চ পন অহোসি’’ন্তি.

‘‘কিংসঞ্ঞী পনাযস্মা সারিপুত্তো [কিং সঞ্ঞী পনাৰুসো সারিপুত্ত (ক.)] তস্মিং সমযে অহোসী’’তি? ‘‘ভৰনিরোধো নিব্বানং ভৰনিরোধো নিব্বান’’ন্তি খো মে, আৰুসো, অঞ্ঞাৰ সঞ্ঞা উপ্পজ্জতি অঞ্ঞাৰ সঞ্ঞা নিরুজ্ঝতি. সেয্যথাপি, আৰুসো, সকলিকগ্গিস্স ঝাযমানস্স অঞ্ঞাৰ অচ্চি উপ্পজ্জতি অঞ্ঞাৰ অচ্চি নিরুজ্ঝতি; এৰমেৰং খো, আৰুসো, ‘ভৰনিরোধো নিব্বানং ভৰনিরোধো নিব্বান’ন্তি অঞ্ঞাৰ সঞ্ঞা উপ্পজ্জতি অঞ্ঞাৰ সঞ্ঞা নিরুজ্ঝতি. ‘ভৰনিরোধো নিব্বান’ন্তি [নিব্বানং (সী. ক.)] সঞ্ঞী চ পনাহং, আৰুসো, তস্মিং সমযে অহোসি’’ন্তি. সত্তমং.