৮. ঝানসুত্তং

৮. ‘‘সদ্ধো চ [ইমস্মিং ৰাক্যে অযং চ কারো নত্থি স্যামপোত্থকে], ভিক্খৰে, ভিক্খু হোতি, নো চ [নো (স্যা.) এৰমুপরিপি. অ. নি. ৮.৭১] সীলৰা; এৰং সো তেনঙ্গেন অপরিপূরো হোতি. তেন তং অঙ্গং পরিপূরেতব্বং – ‘কিন্তাহং সদ্ধো চ অস্সং, সীলৰা চা’তি! যতো চ খো, ভিক্খৰে, ভিক্খু সদ্ধো চ হোতি সীলৰা চ, এৰং সো তেনঙ্গেন পরিপূরো হোতি.

‘‘সদ্ধো চ, ভিক্খৰে, ভিক্খু হোতি সীলৰা চ, নো চ বহুস্সুতো…পে… বহুস্সুতো চ, নো চ ধম্মকথিকো… ধম্মকথিকো চ, নো চ পরিসাৰচরো… পরিসাৰচরো চ, নো চ ৰিসারদো পরিসায ধম্মং দেসেতি… ৰিসারদো চ পরিসায ধম্মং দেসেতি, নো চ ৰিনযধরো… ৰিনযধরো চ, নো চ আরঞ্ঞিকো [আরঞ্ঞকো (ক.)] পন্তসেনাসনো… আরঞ্ঞিকো চ পন্তসেনাসনো, নো চ চতুন্নং ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী… চতুন্নঞ্চ ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী, নো চ আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি. এৰং সো তেনঙ্গেন অপরিপূরো হোতি. তেন তং অঙ্গং পরিপূরেতব্বং – ‘কিন্তাহং সদ্ধো চ অস্সং, সীলৰা চ, বহুস্সুতো চ, ধম্মকথিকো চ, পরিসাৰচরো চ, ৰিসারদো চ পরিসায ধম্মং দেসেয্যং, ৰিনযধরো চ, আরঞ্ঞিকো চ পন্তসেনাসনো, চতুন্নঞ্চ ঝানানং আভিচেতসিকানং দিট্ঠধম্মসুখৰিহারানং নিকামলাভী অস্সং অকিচ্ছলাভী অকসিরলাভী, আসৰানঞ্চ খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরেয্য’ন্তি.

‘‘যতো চ খো, ভিক্খৰে, ভিক্খু সদ্ধো চ হোতি, সীলৰা চ, বহুস্সুতো চ, ধম্মকথিকো চ, পরিসাৰচরো চ, ৰিসারদো চ পরিসায ধম্মং দেসেতি, ৰিনযধরো চ, আরঞ্ঞিকো চ পন্তসেনাসনো, চতুন্নঞ্চ ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী, আসৰানঞ্চ খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি; এৰং সো তেনঙ্গেন পরিপূরো হোতি. ইমেহি খো, ভিক্খৰে, দসহি ধম্মেহি সমন্নাগতো ভিক্খু সমন্তপাসাদিকো চ হোতি সব্বাকারপরিপূরো চা’’তি. অট্ঠমং.