৮. উপক্খটসিক্খাপদং

৫২৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰো পুৰিসো পজাপতিং এতদৱোচ – ‘‘অয্যং উপনন্দং চীৱৰেন অচ্ছাদেস্সামী’’তি. অস্সোসি খো অঞ্ঞতৰো পিণ্ডচাৰিকো ভিক্খু তস্স পুৰিসস্স ইমং ৱাচং ভাসমানস্স. অথ খো সো ভিক্খু যেনাযস্মা উপনন্দো সক্যপুত্তো তেনুপসঙ্কমি; উপসঙ্কমিত্ৱা আযস্মন্তং উপনন্দং সক্যপুত্তং এতদৱোচ – ‘‘মহাপুঞ্ঞোসি ত্ৱং, আৱুসো উপনন্দ, অমুকস্মিং ওকাসে অঞ্ঞতৰো পুৰিসো পজাপতিং এতদৱোচ – ‘‘অয্যং উপনন্দং চীৱৰেন অচ্ছাদেস্সামী’’’তি. ‘‘অত্থাৱুসো, মং সো উপট্ঠাকো’’তি. অথ খো আযস্মা উপনন্দো সক্যপুত্তো যেন সো পুৰিসো তেনুপসঙ্কমি; উপসঙ্কমিত্ৱা তং পুৰিসং এতদৱোচ – ‘‘সচ্চং কিৰ মং ত্ৱং, আৱুসো, চীৱৰেন অচ্ছাদেতুকামোসী’’তি? ‘‘অপি মেয্য, এৱং হোতি – ‘অয্যং উপনন্দং চীৱৰেন অচ্ছাদেস্সামী’’’তি. ‘‘সচে খো মং ত্ৱং, আৱুসো, চীৱৰেন অচ্ছাদেতুকামোসি, এৱৰূপেন চীৱৰেন অচ্ছাদেহি. ক্যাহং তেন অচ্ছন্নোপি কৰিস্সামি যাহং ন পৰিভুঞ্জিস্সামী’’তি.

অথ খো সো পুৰিসো উজ্ঝাযতি খিয্যতি ৱিপাচেতি – ‘‘মহিচ্ছা ইমে সমণা সক্যপুত্তিযা অসন্তুট্ঠা. নযিমে সুকৰা চীৱৰেন অচ্ছাদেতুং. কথঞ্হি নাম অয্যো উপনন্দো মযা পুব্বে অপ্পৱাৰিতো মং উপসঙ্কমিত্ৱা চীৱৰে ৱিকপ্পং আপজ্জিস্সতী’’তি! অস্সোসুং খো ভিক্খূ তস্স পুৰিসস্স উজ্ঝাযন্তস্স খিয্যন্তস্স ৱিপাচেন্তস্স. যে তে ভিক্খূ অপ্পিচ্ছা…পে… তে উজ্ঝায্যন্তি খিয্যন্তি ৱিপাচেন্তি – ‘‘কথঞ্হি নাম আযস্মা উপনন্দো সক্যপুত্তো পুব্বে অপ্পৱাৰিতো গহপতিকং উপসঙ্কমিত্ৱা চীৱৰে ৱিকপ্পং আপজ্জিস্সতী’’তি! অথ খো তে ভিক্খূ আযস্মন্তং উপনন্দং সক্যপুত্তং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং …পে… ‘‘সচ্চং কিৰ ত্ৱং, উপনন্দ, পুব্বে অপ্পৱাৰিতো গহপতিকং উপসঙ্কমিত্ৱা চীৱৰে ৱিকপ্পং আপজ্জসী’’তি? ‘‘সচ্চং, ভগৱা’’তি. ‘‘ঞাতকো তে, উপনন্দ, অঞ্ঞাতকো’’তি? ‘‘অঞ্ঞাতকো, ভগৱা’’তি. ‘‘অঞ্ঞাতকো, মোঘপুৰিস, অঞ্ঞাতকস্স ন জানাতি পতিৰূপং ৱা অপ্পতিৰূপং ৱা সন্তং ৱা অসন্তং ৱা. তত্থ নাম ত্ৱং, মোঘপুৰিস, পুব্বে অপ্পৱাৰিতো অঞ্ঞাতকং গহপতিকং উপসঙ্কমিত্ৱা চীৱৰে ৱিকপ্পং আপজ্জিস্সসি! নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৫২৮. ‘‘ভিক্খুং পনেৱ উদ্দিস্স অঞ্ঞাতকস্স গহপতিস্স ৱা গহপতানিযা ৱা চীৱৰচেতাপন্নং [চীৱৰচেতাপনং (স্যা.)] উপক্খটং হোতি – ‘ইমিনা চীৱৰচেতাপন্নেন চীৱৰং চেতাপেত্ৱা ইত্থন্নামং ভিক্খুং চীৱৰেন অচ্ছাদেস্সামী’তি; তত্ৰ চে সো ভিক্খু পুব্বে অপ্পৱাৰিতো উপসঙ্কমিত্ৱা চীৱৰে ৱিকপ্পং আপজ্জেয্য – ‘সাধু ৱত মং আযস্মা ইমিনা চীৱৰচেতাপন্নেন এৱৰূপং ৱা এৱৰূপং ৱা চীৱৰং চেতাপেত্ৱা অচ্ছাদেহী’তি, কল্যাণকম্যতং উপাদায, নিস্সগ্গিযং পাচিত্তিয’’ন্তি.

৫২৯. ভিক্খুং পনেৱ উদ্দিস্সাতি ভিক্খুস্সত্থায, ভিক্খুং আৰম্মণং কৰিত্ৱা, ভিক্খুং অচ্ছাদেতুকামো.

অঞ্ঞাতকো নাম মাতিতো ৱা পিতিতো ৱা যাৱ সত্তমা পিতামহযুগা অসম্বদ্ধো.

গহপতি নাম যো কোচি অগাৰং অজ্ঝাৱসতি.

গহপতানী নাম যা কাচি অগাৰং অজ্ঝাৱসতি.

চীৱৰচেতাপন্নং নাম হিৰঞ্ঞং ৱা সুৱণ্ণং ৱা মুত্তা ৱা মণি ৱা পৱাড়ো ৱা ফলিকো ৱা পটকো ৱা সুত্তং ৱা কপ্পাসো ৱা.

ইমিনা চীৱৰচেতাপন্নেনাতি পচ্চুপট্ঠিতেন.

চেতাপেত্ৱাতি পৰিৱত্তেত্ৱা.

অচ্ছাদেস্সামীতি দস্সামি.

তত্ৰ চে সো ভিক্খূতি যং ভিক্খুং উদ্দিস্স চীৱৰচেতাপন্নং উপক্খটং হোতি সো ভিক্খু.

পুব্বে অপ্পৱাৰিতোতি পুব্বে অৱুত্তো হোতি – ‘‘কীদিসেন তে, ভন্তে, চীৱৰেন অত্থো, কীদিসং তে চীৱৰং চেতাপেমী’’তি?

উপসঙ্কমিত্ৱাতি ঘৰং গন্ত্ৱা যত্থ কত্থচি উপসঙ্কমিত্ৱা .

চীৱৰে ৱিকপ্পং আপজ্জেয্যাতি আযতং ৱা হোতু ৱিত্থতং ৱা অপ্পিতং ৱা সণ্হং ৱা.

ইমিনা চীৱৰচেতাপন্নেনাতি পচ্চুপট্ঠিতেন.

এৱৰূপং ৱা এৱৰূপং ৱাতি. আযতং ৱা ৱিত্থতং ৱা অপ্পিতং ৱা সণ্হং ৱা.

চেতাপেত্ৱাতি পৰিৱত্তেত্ৱা.

অচ্ছাদেহীতি দজ্জেহি.

কল্যাণকম্যতং উপাদাযাতি সাধত্থিকো [সাধুত্থিকো (স্যা.)] মহগ্ঘত্থিকো. তস্স ৱচনেন আযতং ৱা ৱিত্থতং ৱা অপ্পিতং ৱা সণ্হং ৱা চেতাপেতি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা পুগ্গলস্স ৱা. এৱঞ্চ পন, ভিক্খৱে, নিস্সজ্জিতব্বং…পে… ইদং মে, ভন্তে, চীৱৰং পুব্বে অপ্পৱাৰিতো অঞ্ঞাতকং গহপতিকং উপসঙ্কমিত্ৱা চীৱৰে ৱিকপ্পং আপন্নং নিস্সগ্গিযং, ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৫৩০. অঞ্ঞাতকে অঞ্ঞাতকসঞ্ঞী পুব্বে অপ্পৱাৰিতো গহপতিকং উপসঙ্কমিত্ৱা চীৱৰে ৱিকপ্পং আপজ্জতি, নিস্সগ্গিযং পাচিত্তিযং. অঞ্ঞাতকে ৱেমতিকো পুব্বে অপ্পৱাৰিতো গহপতিকং উপসঙ্কমিত্ৱা চীৱৰে ৱিকপ্পং আপজ্জতি, নিস্সগ্গিযং পাচিত্তিযং. অঞ্ঞাতকে ঞাতকসঞ্ঞী পুব্বে অপ্পৱাৰিতো গহপতিকং উপসঙ্কমিত্ৱা চীৱৰে ৱিকপ্পং আপজ্জতি, নিস্সগ্গিযং পাচিত্তিযং.

ঞাতকে অঞ্ঞাতকসঞ্ঞী, আপত্তি দুক্কটস্স. ঞাতকে ৱেমতিকো, আপত্তি দুক্কটস্স. ঞাতকে ঞাতকসঞ্ঞী, অনাপত্তি.

৫৩১. অনাপত্তি ঞাতকানং, পৱাৰিতানং, অঞ্ঞস্সত্থায, অত্তনো ধনেন, মহগ্ঘং চেতাপেতুকামস্স অপ্পগ্ঘং চেতাপেতি, উম্মত্তকস্স, আদিকম্মিকস্সাতি.

উপক্খটসিক্খাপদং নিট্ঠিতং অট্ঠমং.