৯. দুতিযউপক্খটসিক্খাপদং

৫৩২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰো পুৰিসো অঞ্ঞতৰং পুৰিসং এতদৱোচ – ‘‘অয্যং উপনন্দং চীৱৰেন অচ্ছাদেস্সামী’’তি. সোপি এৱমাহ – ‘‘অহম্পি অয্যং উপনন্দং চীৱৰেন অচ্ছাদেস্সামী’’তি. অস্সোসি খো অঞ্ঞতৰো পিণ্ডচাৰিকো ভিক্খু তেসং পুৰিসানং ইমং কথাসল্লাপং. অথ খো সো ভিক্খু যেনাযস্মা উপনন্দো সক্যপুত্তো তেনুপসঙ্কমি; উপসঙ্কমিত্ৱা আযস্মন্তং উপনন্দং সক্যপুত্তং এতদৱোচ – ‘‘মহাপুঞ্ঞোসি ত্ৱং, আৱুসো উপনন্দ. অমুকস্মিং ওকাসে অঞ্ঞতৰো পুৰিসো অঞ্ঞতৰং পুৰিসং এতদৱোচ – ‘অয্যং উপনন্দং চীৱৰেন অচ্ছাদেস্সামী’তি. সোপি এৱমাহ – ‘অহম্পি অয্যং উপনন্দং চীৱৰেন অচ্ছাদেস্সামী’’’তি. ‘‘অত্থাৱুসো, মং তে উপট্ঠাকা’’তি.

অথ খো আযস্মা উপনন্দো সক্যপুত্তো যেন তে পুৰিসা তেনুপসঙ্কমি; উপসঙ্কমিত্ৱা তে পুৰিসে এতদৱোচ – ‘‘সচ্চং কিৰ মং তুম্হে, আৱুসো, চীৱৰেহি অচ্ছাদেতুকামাত্থা’’তি? ‘‘অপি নয্য, এৱং হোতি – ‘অয্যং উপনন্দং চীৱৰেহি অচ্ছাদেস্সামা’’’তি. ‘‘সচে খো মং তুম্হে, আৱুসো, চীৱৰেহি অচ্ছাদেতুকামাত্থ, এৱৰূপেন চীৱৰেন অচ্ছাদেথ, ক্যাহং তেহি অচ্ছন্নোপি কৰিস্সামি, যানাহং ন পৰিভুঞ্জিস্সামী’’তি. অথ খো তে পুৰিসা উজ্ঝাযন্তি খিয্যন্তি ৱিপাচেন্তি – ‘‘মহিচ্ছা ইমে সমণা সক্যপুত্তিযা অসন্তুট্ঠা. নযিমে সুকৰা চীৱৰেহি অচ্ছাদেতুং. কথঞ্হি নাম অয্যো উপনন্দো অম্হেহি পুব্বে অপ্পৱাৰিতো উপসঙ্কমিত্ৱা চীৱৰে ৱিকপ্পং আপজ্জিস্সতী’’তি!

অস্সোসুং খো ভিক্খূ তেসং পুৰিসানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা উপনন্দো সক্যপুত্তো পুব্বে অপ্পৱাৰিতো গহপতিকে উপসঙ্কমিত্ৱা চীৱৰে ৱিকপ্পং আপজ্জিস্সতী’’তি! অথ খো তে ভিক্খূ আযস্মন্তং উপনন্দং সক্যপুত্তং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ ত্ৱং, উপনন্দ, পুব্বে অপ্পৱাৰিতো গহপতিকে উপসঙ্কমিত্ৱা চীৱৰে ৱিকপ্পং আপজ্জসী’’তি? ‘‘সচ্চং, ভগৱা’’তি. ‘‘ঞাতকা তে, উপনন্দ, অঞ্ঞাতকা’’তি? ‘‘অঞ্ঞাতকা, ভগৱা’’তি. ‘‘অঞ্ঞাতকো, মোঘপুৰিস, অঞ্ঞাতকানং ন জানাতি পতিৰূপং ৱা অপ্পতিৰূপং ৱা সন্তং ৱা অসন্তং ৱা. তত্থ নাম ত্ৱং, মোঘপুৰিস, পুব্বে অপ্পৱাৰিতো অঞ্ঞাতকে গহপতিকে উপসঙ্কমিত্ৱা চীৱৰে ৱিকপ্পং আপজ্জিস্সসি! নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৫৩৩. ‘‘ভিক্খুং পনেৱ উদ্দিস্স উভিন্নং অঞ্ঞাতকানং গহপতীনং ৱা গহপতানীনং ৱা পচ্চেকচীৱৰচেতাপন্নানি উপক্খটানি হোন্তি – ‘ইমেহি মযং পচ্চেকচীৱৰচেতাপন্নেহি পচ্চেকচীৱৰানি চেতাপেত্ৱা ইত্থন্নামং ভিক্খুং চীৱৰেহি অচ্ছাদেস্সামা’তি; তত্ৰ চে সো ভিক্খু পুব্বে অপ্পৱাৰিতো উপসঙ্কমিত্ৱা চীৱৰে ৱিকপ্পং আপজ্জেয্য – ‘সাধু ৱত মং আযস্মন্তো ইমেহি পচ্চেকচীৱৰচেতাপন্নেহি এৱৰূপং ৱা এৱৰূপং ৱা চীৱৰং চেতাপেত্ৱা অচ্ছাদেথ, উভোৱ সন্তা একেনা’তি, কল্যাণকম্যতং উপাদায, নিস্সগ্গিযং পাচিত্তিয’’ন্তি.

৫৩৪. ভিক্খুং পনেৱ উদ্দিস্সাতি ভিক্খুস্সত্থায, ভিক্খুং আৰম্মণং কৰিত্ৱা, ভিক্খুং অচ্ছাদেতুকামা.

উভিন্নন্তি দ্ৱিন্নং.

অঞ্ঞাতকা নাম মাতিতো ৱা পিতিতো ৱা যাৱ সত্তমা পিতামহযুগা অসম্বদ্ধা.

গহপতী নাম যে কেচি অগাৰ অজ্ঝাৱসন্তি.

গহপতানিযো নাম যা কাচি অগাৰং অজ্ঝাৱসন্তি.

চীৱৰচেতাপন্নানি নাম হিৰঞ্ঞা ৱা সুৱণ্ণা ৱা মুত্তা ৱা মণী ৱা পৱাড়া ৱা ফলিকা ৱা পটকা ৱা সুত্তা ৱা কপ্পাসা ৱা.

ইমেহি পচ্চেকচীৱৰচেতাপন্নেহিতি পচ্চুপট্ঠিতেহি.

চেতাপেত্ৱাতি পৰিৱত্তেত্ৱা.

অচ্ছাদেস্সামাতি দস্সাম.

তত্ৰ চে সো ভিক্খূতি যং ভিক্খুং উদ্দিস্স চীৱৰচেতাপন্নানি উপক্খটানি হোন্তি সো ভিক্খু.

পুব্বে অপ্পৱাৰিতোতি পুব্বে অৱুত্তো হোতি – ‘‘কীদিসেন তে, ভন্তে, চীৱৰেন অত্থো, কীদিসং তে চীৱৰং চেতাপেমা’’তি.

উপসঙ্কমিত্ৱাতি ঘৰং গন্ত্ৱা যত্থ কত্থচি উপসঙ্কমিত্ৱা.

চীৱৰে ৱিকপ্পং আপজ্জেয্যাতি আযতং ৱা হোতু ৱিত্থতং ৱা অপ্পিতং ৱা সণ্হং ৱা.

ইমেহি পচ্চেকচীৱৰচেতাপন্নেহীতি পচ্চুপট্ঠিতেহি.

এৱৰূপং ৱা এৱৰূপং ৱাতি আযতং ৱা ৱিত্থতং ৱা অপ্পিতং ৱা সণ্হং ৱা.

চেতাপেত্ৱাতি পৰিৱত্তেত্ৱা.

অচ্ছাদেথাতি দজ্জেথ.

উভোৱ সন্তা একেনাতি দ্ৱেপি জনা একেন.

কল্যাণকম্যতং উপাদাযাতি সাধত্থিকো মহগ্ঘত্থিকো.

তস্স ৱচনেন আযতং ৱা ৱিত্থতং ৱা অপ্পিতং ৱা সণ্হং ৱা চেতাপেন্তি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা পুগ্গলস্স ৱা. এৱঞ্চ পন, ভিক্খৱে, নিস্সজ্জিতব্বং…পে… ইদং মে, ভন্তে, চীৱৰং পুব্বে অপ্পৱাৰিতো অঞ্ঞাতকে গহপতিকে উপসঙ্কমিত্ৱা চীৱৰে ৱিকপ্পং আপন্নং নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৫৩৫. অঞ্ঞাতকে অঞ্ঞাতকসঞ্ঞী পুব্বে অপ্পৱাৰিতো গহপতিকে উপসঙ্কমিত্ৱা চীৱৰে ৱিকপ্পং আপজ্জতি, নিস্সগ্গিযং পাচিত্তিযং. অঞ্ঞাতকে ৱেমতিকো পুব্বে অপ্পৱাৰিতো গহপতিকে উপসঙ্কমিত্ৱা চীৱৰে ৱিকপ্পং আপজ্জতি, নিস্সগ্গিযং পাচিত্তিযং. অঞ্ঞাতকে ঞাতকসঞ্ঞী পুব্বে অপ্পৱাৰিতো গহপতিকে উপসঙ্কমিত্ৱা চীৱৰে ৱিকপ্পং আপজ্জতি, নিস্সগ্গিযং পাচিত্তিযং.

ঞাতকে অঞ্ঞাতকসঞ্ঞী, আপত্তি দুক্কটস্স. ঞাতকে ৱেমতিকো, আপত্তি দুক্কটস্স. ঞাতকে ঞাতকসঞ্ঞী, অনাপত্তি.

৫৩৬. অনাপত্তি – ঞাতকানং, পৱাৰিতানং, অঞ্ঞস্সত্থায, অত্তনো ধনেন, মহগ্ঘং চেতাপেতুকামানং অপ্পগ্ঘং চেতাপেতি, উম্মত্তকস্স, আদিকম্মিকস্সাতি.

দুতিযউপক্খটসিক্খাপদং নিট্ঠিতং নৱমং.