১০. পৰিণতসিক্খাপদং

৬৫৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন সাৱত্থিযং অঞ্ঞতৰস্স পূগস্স সঙ্ঘস্স সচীৱৰভত্তং পটিযত্তং হোতি – ‘‘ভোজেত্ৱা চীৱৰেন অচ্ছাদেস্সামা’’তি. অথ খো ছব্বগ্গিযা ভিক্খূ যেন সো পূগো তেনুপসঙ্কমিংসু; উপসঙ্কমিত্ৱা তং পূগং এতদৱোচুং – ‘‘দেথাৱুসো, অম্হাকং ইমানি চীৱৰানী’’তি. ‘‘ন মযং, ভন্তে, দস্সাম. অম্হাকং সঙ্ঘস্স অনুৱস্সং সচীৱৰভিক্খা পঞ্ঞত্তা’’তি. ‘‘বহূ, আৱুসো, সঙ্ঘস্স দাযকা, বহূ সঙ্ঘস্স ভত্তা [ভদ্দা (ক.)]. মযং তুম্হে নিস্সায তুম্হে সম্পস্সন্তা ইধ ৱিহৰাম. তুম্হে চে অম্হাকং ন দস্সথ, অথ কো চৰহি অম্হাকং দস্সতি? দেথাৱুসো, অম্হাকং ইমানি চীৱৰানী’’তি. অথ খো সো পূগো ছব্বগ্গিযেহি ভিক্খূহি নিপ্পীড়িযমানো যথাপটিযত্তং চীৱৰং ছব্বগ্গিযানং ভিক্খূনং দত্ৱা সঙ্ঘং ভত্তেন পৰিৱিসি. যে তে ভিক্খূ জানন্তি সঙ্ঘস্স সচীৱৰভত্তং পটিযত্তং, ন চ জানন্তি ছব্বগ্গিযানং ভিক্খূনং দিন্নন্তি, তে এৱমাহংসু – ‘‘ওণোজেথাৱুসো, সঙ্ঘস্স চীৱৰ’’ন্তি. ‘‘নত্থি, ভন্তে. যথাপটিযত্তং চীৱৰং অয্যা ছব্বগ্গিযা অত্তনো পৰিণামেসু’’ন্তি. যে তে ভিক্খূ অপ্পিচ্ছা… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ জানং সঙ্ঘিকং লাভং পৰিণতং অত্তনো পৰিণামেস্সন্তী’’তি! অথ খো তে ভিক্খূ ছব্বগ্গিযে ভিক্খূ অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ তুম্হে, ভিক্খৱে, জানং সঙ্ঘিকং লাভং পৰিণতং অত্তনো পৰিণামেথা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, জানং সঙ্ঘিকং লাভং পৰিণতং অত্তনো পৰিণামেস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৬৫৮. ‘‘যো পন ভিক্খু জানং সঙ্ঘিকং লাভং পৰিণতং অত্তনো পৰিণামেয্য, নিস্সগ্গিযং পাচিত্তিয’’ন্তি.

৬৫৯. যো পনাতি যো যাদিসো…পে… ভিক্খূতি…পে… অয ইমস্মিং অত্থে অধিপ্পেতো ভিক্খূতি.

[পাচি. ৪৯১] জানাতি নাম সামং ৱা জানাতি অঞ্ঞে ৱা তস্স আৰোচেন্তি সো ৱা আৰোচেতি.

[পাচি. ৪৯১] সঙ্ঘিকং নাম সঙ্ঘস্স দিন্নং হোতি পৰিচ্চত্তং.

[পাচি. ৪৯১] লাভো নাম চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা. অন্তমসো চুণ্ণপিণ্ডোপি, দন্তকট্ঠম্পি, দসিকসুত্তম্পি.

[পাচি. ৪৯১] পৰিণতং নাম দস্সাম কৰিস্সামাতি ৱাচা ভিন্না হোতি.

অত্তনো পৰিণামেতি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা পুগ্গলস্স ৱা. এৱঞ্চ পন, ভিক্খৱে, নিস্সজ্জিতব্বং…পে… ইদং মে, ভন্তে, জানং সঙ্ঘিকং লাভং পৰিণতং অত্তনো পৰিণামিতং নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৬৬০. পৰিণতে পৰিণতসঞ্ঞী অত্তনো পৰিণামেতি, নিস্সগ্গিযং পাচিত্তিযং.

পৰিণতে ৱেমতিকো অত্তনো পৰিণামেতি, আপত্তি দুক্কটস্স. পৰিণতে অপৰিণতসঞ্ঞী অত্তনো পৰিণামেতি, অনাপত্তি. সঙ্ঘস্স পৰিণতং অঞ্ঞসঙ্ঘস্স ৱা চেতিযস্স ৱা পৰিণামেতি, আপত্তি দুক্কটস্স. চেতিযস্স পৰিণতং অঞ্ঞচেতিযস্স ৱা সঙ্ঘস্স ৱা পুগ্গলস্স ৱা পৰিণামেতি, আপত্তি দুক্কটস্স. পুগ্গলস্স পৰিণতং অঞ্ঞপুগ্গলস্স ৱা সঙ্ঘস্স ৱা চেতিযস্স ৱা পৰিণামেতি, আপত্তি দুক্কটস্স. অপৰিণতে পৰিণতসঞ্ঞী, আপত্তি দুক্কটস্স. অপৰিণতে ৱেমতিকো, আপত্তি দুক্কটস্স. অপৰিণতে অপৰিণতসঞ্ঞী, অনাপত্তি.

৬৬১. অনাপত্তি কত্থ দেমাতি পুচ্ছিযমানো যত্থ তুম্হাকং দেয্যধম্মো পৰিভোগং ৱা লভেয্য পটিসঙ্খাৰং ৱা লভেয্য চিৰট্ঠিতিকো ৱা অস্স যত্থ ৱা পন তুম্হাকং চিত্তং পসীদতি তত্থ দেথাতি ভণতি, উম্মত্তকস্স, আদিকম্মিকস্সাতি.

পৰিণতসিক্খাপদং নিট্ঠিতং দসমং.

পত্তৱগ্গো ততিযো.

তস্সুদ্দানং –

দ্ৱে চ পত্তানি ভেসজ্জং, ৱস্সিকা দানপঞ্চমং;

সামং ৱাযাপনচ্চেকো, সাসঙ্কং সঙ্ঘিকেন চাতি.

৬৬২. উদ্দিট্ঠা খো, আযস্মন্তো, তিংস নিস্সগ্গিযা পাচিত্তিযা ধম্মা. তত্থাযস্মন্তে পুচ্ছামি – ‘কচ্চিত্থ পৰিসুদ্ধা’? দুতিযম্পি পুচ্ছামি – ‘কচ্চিত্থ পৰিসুদ্ধা’? ততিযম্পি পুচ্ছামি – ‘কচ্চিত্থ পৰিসুদ্ধা’? পৰিসুদ্ধেত্থাযস্মন্তো, তস্মা তুণ্হী, এৱমেতং ধাৰযামীতি.

নিস্সগ্গিযকণ্ডং নিট্ঠিতং.