৯. সাসঙ্কসিক্খাপদং

৬৫২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খূ ৱুত্থৱস্সা আৰঞ্ঞকেসু সেনাসনেসু ৱিহৰন্তি. কত্তিকচোৰকা ভিক্খূ – ‘‘লদ্ধলাভা’’তি পৰিপাতেন্তি. ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, আৰঞ্ঞকেসু সেনাসনেসু ৱিহৰন্তেন তিণ্ণং চীৱৰানং অঞ্ঞতৰং চীৱৰং অন্তৰঘৰে নিক্খিপিতু’’ন্তি.

তেন খো পন সমযেন ভিক্খূ – ‘‘ভগৱতা অনুঞ্ঞাতং আৰঞ্ঞকেসু সেনাসনেসু ৱিহৰন্তেন তিণ্ণং চীৱৰানং অঞ্ঞতৰং চীৱৰং অন্তৰঘৰে নিক্খিপিতু’’ন্তি তিণ্ণং চীৱৰানং অঞ্ঞতৰং চীৱৰং অন্তৰঘৰে নিক্খিপিত্ৱা অতিৰেকছাৰত্তং ৱিপ্পৱসন্তি. তানি চীৱৰানি নস্সন্তিপি ৱিনস্সন্তিপি ডয্হন্তিপি উন্দূৰেহিপি খজ্জন্তি. ভিক্খূ দুচ্চোড়া হোন্তি লূখচীৱৰা. ভিক্খূ এৱমাহংসু – ‘‘কিস্স তুম্হে, আৱুসো, দুচ্চোড়া লূখচীৱৰা’’তি? অথ খো তে ভিক্খূ ভিক্খূনং এতমত্থং আৰোচেসুং. যে তে ভিক্খূ অপ্পিচ্ছা… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খূ তিণ্ণং চীৱৰানং অঞ্ঞতৰং চীৱৰং অন্তৰঘৰে নিক্খিপিত্ৱা অতিৰেকছাৰত্তং ৱিপ্পৱসিস্সন্তী’’তি! অথ খো তে ভিক্খূ তে অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… সচ্চং কিৰ, ভিক্খৱে, ভিক্খূ তিণ্ণং চীৱৰানং অঞ্ঞতৰং চীৱৰং অন্তৰঘৰে নিক্খিপিত্ৱা অতিৰেকছাৰত্তং ৱিপ্পৱসন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তে, ভিক্খৱে, মোঘপুৰিসা তিণ্ণং চীৱৰানং অঞ্ঞতৰং চীৱৰং অন্তৰঘৰে নিক্খিপিত্ৱা অতিৰেকছাৰত্তং ৱিপ্পৱসিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৬৫৩. ‘‘উপৱস্সং খো পন কত্তিকপুণ্ণমং যানি খো পন তানি আৰঞ্ঞকানি সেনাসনানি সাসঙ্কসম্মতানি সপ্পটিভযানি তথাৰূপেসু ভিক্খু সেনাসনেসু ৱিহৰন্তো আকঙ্খমানো তিণ্ণং চীৱৰানং অঞ্ঞতৰং চীৱৰং অন্তৰঘৰে নিক্খিপেয্য, সিযা চ তস্স ভিক্খুনো কোচিদেৱ পচ্চযো তেন চীৱৰেন ৱিপ্পৱাসায. ছাৰত্তপৰমং তেন ভিক্খুনা তেন চীৱৰেন ৱিপ্পৱসিতব্বং. ততো চে উত্তৰি ৱিপ্পৱসেয্য, অঞ্ঞত্ৰ ভিক্খুসম্মুতিযা, নিস্সগ্গিযং পাচিত্তিয’’ন্তি.

৬৫৪. উপৱস্সং খো পনাতি ৱুট্ঠৱস্সানং.

কত্তিকপুণ্ণমন্তি কত্তিকচাতুমাসিনী ৱুচ্চতি.

[পাচি. ৫৭৩] যানি খো পন তানি আৰঞ্ঞকানি সেনাসনানীতি আৰঞ্ঞকং নাম সেনাসনং পঞ্চধনুসতিকং পচ্ছিমং.

[পাচি. ৫৭৩] সাসঙ্কং নাম আৰামে আৰামূপচাৰে চোৰানং নিৱিট্ঠোকাসো দিস্সতি, ভুত্তোকাসো দিস্সতি, ঠিতোকাসো দিস্সতি, নিসিন্নোকাসো দিস্সতি, নিপন্নোকাসো দিস্সতি.

[পাচি. ৫৭৩] সপ্পটিভযং নাম আৰামে আৰামূপচাৰে চোৰেহি মনুস্সা হতা দিস্সন্তি, ৱিলুত্তা দিস্সন্তি, আকোটিতা দিস্সন্তি.

[পাচি. ৫৭৩] তথাৰূপেসু ভিক্খু সেনাসনেসু ৱিহৰন্তোতি এৱৰূপেসু ভিক্খু সেনাসনেসু ৱিহৰন্তো.

আকঙ্খমানোতি ইচ্ছমানো.

তিণ্ণং চীৱৰানং অঞ্ঞতৰং চীৱৰন্তি সঙ্ঘাটিং ৱা উত্তৰাসঙ্গং ৱা অন্তৰৱাসকং ৱা.

অন্তৰঘৰে নিক্খিপেয্যাতি সমন্তা গোচৰগামে নিক্খিপেয্য.

সিযা চ তস্স ভিক্খুনো কোচিদেৱ পচ্চযো তেন চীৱৰেন ৱিপ্পৱাসাযাতি সিযা পচ্চযো সিযা কৰণীযং.

ছাৰত্তপৰমং তেন ভিক্খুনা তেন চীৱৰেন ৱিপ্পৱসিতব্বন্তি ছাৰত্তপৰমতা ৱিপ্পৱসিতব্বং.

অঞ্ঞত্ৰ ভিক্খুসম্মুতিযাতি ঠপেত্ৱা ভিক্খুসম্মুতিং.

ততো চে উত্তৰি ৱিপ্পৱসেয্যাতি সত্তমে অৰুণুগ্গমনে নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা পুগ্গলস্স ৱা. এৱঞ্চ পন, ভিক্খৱে, নিস্সজ্জিতব্বং. ‘‘ইদং মে, ভন্তে, চীৱৰং অতিৰেকছাৰত্তং ৱিপ্পৱুট্ঠং, অঞ্ঞত্ৰ ভিক্খুসম্মুতিযা, নিস্সগ্গিযং. ইমাহং সঙ্ঘস্স নিস্সজ্জামী’’তি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৬৫৫. অতিৰেকছাৰত্তে অতিৰেকসঞ্ঞী ৱিপ্পৱসতি, অঞ্ঞত্ৰ ভিক্খুসম্মুতিযা, নিস্সগ্গিযং পাচিত্তিযং. অতিৰেকছাৰত্তে ৱেমতিকো ৱিপ্পৱসতি, অঞ্ঞত্ৰ ভিক্খুসম্মুতিযা, নিস্সগ্গিযং পাচিত্তিযং. অতিৰেকছাৰত্তে ঊনকসঞ্ঞী ৱিপ্পৱসতি, অঞ্ঞত্ৰ ভিক্খুসম্মুতিযা, নিস্সগ্গিযং পাচিত্তিযং. অপ্পচ্চুদ্ধটে পচ্চুদ্ধটসঞ্ঞী…পে… অৱিস্সজ্জিতে ৱিস্সজ্জিতসঞ্ঞী… অনট্ঠে নট্ঠসঞ্ঞী… অৱিনট্ঠে ৱিনট্ঠসঞ্ঞী… অদড্ঢে দড্ঢসঞ্ঞী … অৱিলুত্তে ৱিলুত্তসঞ্ঞী ৱিপ্পৱসতি, অঞ্ঞত্ৰ ভিক্খুসম্মুতিযা, নিস্সগ্গিযং পাচিত্তিযং.

নিস্সগ্গিযং চীৱৰং অনিস্সজ্জিত্ৱা পৰিভুঞ্জতি, আপত্তি দুক্কটস্স. ঊনকছাৰত্তে অতিৰেকসঞ্ঞী, আপত্তি দুক্কটস্স. ঊনকছাৰত্তে ৱেমতিকো, আপত্তি দুক্কটস্স. ঊনকছাৰত্তে ঊনকসঞ্ঞী, অনাপত্তি.

৬৫৬. অনাপত্তি – ছাৰত্তং ৱিপ্পৱসতি, ঊনকছাৰত্তং ৱিপ্পৱসতি, ছাৰত্তং ৱিপ্পৱসিত্ৱা পুন গামসীমং ওক্কমিত্ৱা ৱসিত্ৱা পক্কমতি, অন্তো ছাৰত্তং পচ্চুদ্ধৰতি, ৱিস্সজ্জেতি, নস্সতি, ৱিনস্সতি, ডয্হতি, অচ্ছিন্দিত্ৱা গণ্হন্তি, ৱিস্সাসং গণ্হন্তি, ভিক্খুসম্মুতিযা, উম্মত্তকস্স, আদিকম্মিকস্সাতি.

সাসঙ্কসিক্খাপদং নিট্ঠিতং নৱমং.