৮. অচ্চেকচীৱৰসিক্খাপদং

৬৪৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰো মহামত্তো পৱাসং গচ্ছন্তো ভিক্খূনং সন্তিকে দূতং পাহেসি – ‘‘আগচ্ছন্তু ভদন্তা ৱস্সাৱাসিকং দস্সামী’’তি. ভিক্খূ – ‘ৱস্সংৱুট্ঠানং ভগৱতা ৱস্সাৱাসিকং অনুঞ্ঞাত’ন্তি, কুক্কুচ্চাযন্তা নাগমংসু. অথ খো সো মহামত্তো উজ্ঝাযতি খিয্যতি ৱিপাচেতি – ‘‘কথঞ্হি নাম ভদন্তা মযা দূতে পহিতে নাগচ্ছিস্সন্তি! অহঞ্হি সেনায গচ্ছামি. দুজ্জানং জীৱিতং দুজ্জানং মৰণ’’ন্তি. অস্সোসুং খো ভিক্খূ তস্স মহামত্তস্স উজ্ঝাযন্তস্স খিয্যন্তস্স ৱিপাচেন্তস্স. অথ খো তে ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, অচ্চেকচীৱৰং পটিগ্গহেত্ৱা নিক্খিপিতু’’ন্তি.

৬৪৭. তেন খো পন সমযেন ভিক্খূ – ‘‘ভগৱতা অনুঞ্ঞাতং অচ্চেকচীৱৰং পটিগ্গহেত্ৱা নিক্খিপিতু’’ন্তি, অচ্চেকচীৱৰানি পটিগ্গহেত্ৱা চীৱৰকালসমযং অতিক্কামেন্তি. তানি চীৱৰানি চীৱৰৱংসে ভণ্ডিকাবদ্ধানি তিট্ঠন্তি. অদ্দস খো আযস্মা আনন্দো সেনাসনচাৰিকং আহিণ্ডন্তো তানি চীৱৰানি চীৱৰৱংসে ভণ্ডিকাবদ্ধানি. তিট্ঠন্তে দিস্ৱা ভিক্খূ এতদৱোচ – ‘‘কস্সিমানি, আৱুসো, চীৱৰানি চীৱৰৱংসে ভণ্ডিকাবদ্ধানি তিট্ঠন্তী’’তি? ‘‘অম্হাকং, আৱুসো, অচ্চেকচীৱৰানী’’তি. ‘‘কীৱচিৰং পনাৱুসো, ইমানি চীৱৰানি নিক্খিত্তানী’’তি? অথ খো তে ভিক্খূ আযস্মতো আনন্দস্স যথানিক্খিত্তং আৰোচেসুং. আযস্মা আনন্দো উজ্ঝাযতি খিয্যতি ৱিপাচেতি – ‘‘কথঞ্হি নাম ভিক্খূ অচ্চেকচীৱৰং পটিগ্গহেত্ৱা চীৱৰকালসমযং অতিক্কামেস্সন্তী’’তি! অথ খো আযস্মা আনন্দো তে ভিক্খূ অনেকপৰিযাযেন ৱিগৰহিত্ৱা ভগৱতো এতমত্থং আৰোচেসি…পে… – ‘‘সচ্চং কিৰ, ভিক্খৱে, ভিক্খূ অচ্চেকচীৱৰং পটিগ্গহেত্ৱা চীৱৰকালসমযং অতিক্কামেন্তী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তে, ভিক্খৱে, মোঘপুৰিসা অচ্চেকচীৱৰং পটিগ্গহেত্ৱা চীৱৰকালসমযং অতিক্কামেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৬৪৮. ‘‘দসাহানাগতং কত্তিকতেমাসিকপুণ্ণমং ভিক্খুনো পনেৱ অচ্চেকচীৱৰং উপ্পজ্জেয্য, অচ্চেকং মঞ্ঞমানেন ভিক্খুনা পটিগ্গহেতব্বং, পটিগ্গহেত্ৱা যাৱ চীৱৰকালসমযং নিক্খিপিতব্বং. ততো চে উত্তৰি নিক্খিপেয্য, নিস্সগ্গিযং পাচিত্তিয’’ন্তি.

৬৪৯. দসাহানাগতন্তি দসাহানাগতায পৱাৰণায.

কত্তিকতেমাসিকপুণ্ণমন্তি পৱাৰণা কত্তিকা ৱুচ্চতি.

অচ্চেকচীৱৰং নাম সেনায ৱা গন্তুকামো হোতি, পৱাসং ৱা গন্তুকামো হোতি, গিলানো ৱা হোতি, গব্ভিনী ৱা হোতি, অস্সদ্ধস্স ৱা সদ্ধা উপ্পন্না হোতি, অপ্পসন্নস্স ৱা পসাদো উপ্পন্নো হোতি, সো চে ভিক্খূনং সন্তিকে দূতং পহিণেয্য – ‘‘আগচ্ছন্তু ভদন্তা ৱস্সাৱাসিকং দস্সামী’’তি, এতং অচ্চেকচীৱৰং নাম.

অচ্চেকং মঞ্ঞমানেন ভিক্খুনা পটিগ্গহেতব্বং পটিগ্গহেত্ৱা যাৱ চীৱৰকালসমযং নিক্খিপিতব্বন্তি সঞ্ঞাণং কত্ৱা নিক্খিপিতব্বং – ‘‘ইদং অচ্চেকচীৱৰ’’ন্তি.

চীৱৰকালসমযো নাম অনত্থতে কথিনে ৱস্সানস্স পচ্ছিমো মাসো, অত্থতে কথিনে পঞ্চমাসা.

ততো চে উত্তৰি নিক্খিপেয্যাতি অনত্থতে কথিনে ৱস্সানস্স পচ্ছিমং দিৱসং অতিক্কামেতি, নিস্সগ্গিযং পাচিত্তিযং [নিস্সগ্গিযং হোতি (স্যা.)]. অত্থতে কথিনে কথিনুদ্ধাৰদিৱসং অতিক্কামেতি, নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা পুগ্গলস্স ৱা. এৱঞ্চ পন, ভিক্খৱে, নিস্সজ্জিতব্বং…পে… ইদং মে, ভন্তে, অচ্চেকচীৱৰং চীৱৰকালসমযং অতিক্কামিতং নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৬৫০. অচ্চেকচীৱৰে অচ্চেকচীৱৰসঞ্ঞী চীৱৰকালসমযং অতিক্কামেতি, নিস্সগ্গিযং পাচিত্তিযং. অচ্চেকচীৱৰে ৱেমতিকো চীৱৰকালসমযং অতিক্কামেতি, নিস্সগ্গিযং পাচিত্তিযং. অচ্চেকচীৱৰে অনচ্চেকচীৱৰসঞ্ঞী চীৱৰকালসমযং অতিক্কামেতি, নিস্সগ্গিযং পাচিত্তিযং. অনধিট্ঠিতে অধিট্ঠিতসঞ্ঞী …পে… অৱিকপ্পিতে ৱিকপ্পিতসঞ্ঞী… অৱিস্সজ্জিতে ৱিস্সজ্জিতসঞ্ঞী… অনট্ঠে নট্ঠসঞ্ঞী… অৱিনট্ঠে ৱিনট্ঠসঞ্ঞী… অদড্ঢে দড্ঢসঞ্ঞী… অৱিলুত্তে ৱিলুত্তসঞ্ঞী চীৱৰকালসমযং অতিক্কামেতি, নিস্সগ্গিযং পাচিত্তিযং.

নিস্সগ্গিযং চীৱৰং অনিস্সজ্জিত্ৱা পৰিভুঞ্জতি, আপত্তি দুক্কটস্স. অনচ্চেকচীৱৰে অচ্চেকচীৱৰসঞ্ঞী, আপত্তি দুক্কটস্স. অনচ্চেকচীৱৰে ৱেমতিকো, আপত্তি দুক্কটস্স. অনচ্চেকচীৱৰে অনচ্চেকচীৱৰসঞ্ঞী, অনাপত্তি.

৬৫১. অনাপত্তি – অন্তোসমযে অধিট্ঠেতি, ৱিকপ্পেতি, ৱিস্সজ্জেতি, নস্সতি, ৱিনস্সতি, ডয্হতি, অচ্ছিন্দিত্ৱা গণ্হন্তি, ৱিস্সাসং গণ্হন্তি, উম্মত্তকস্স, আদিকম্মিকস্সাতি.

অচ্চেকচীৱৰসিক্খাপদং নিট্ঠিতং অট্ঠমং.