৭. মহাপেসকাৰসিক্খাপদং

৬৪১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰো পুৰিসো পৱাসং গচ্ছন্তো পজাপতিং এতদৱোচ – ‘‘সুত্তং ধাৰযিত্ৱা অমুকস্স তন্তৱাযস্স দেহি, চীৱৰং ৱাযাপেত্ৱা নিক্খিপ, আগতো অয্যং উপনন্দং চীৱৰেন অচ্ছাদেস্সামী’’তি. অস্সোসি খো অঞ্ঞতৰো পিণ্ডচাৰিকো ভিক্খু তস্স পুৰিসস্স ইমং ৱাচং ভাসমানস্স. অথ খো সো ভিক্খু যেনাযস্মা উপনন্দো সক্যপুত্তো তেনুপসঙ্কমি; উপসঙ্কমিত্ৱা আযস্মন্তং উপনন্দং সক্যপুত্তং এতদৱোচ – ‘‘মহাপুঞ্ঞোসি ত্ৱং, আৱুসো উপনন্দ, অমুকস্মিং ওকাসে অঞ্ঞতৰো পুৰিসো পৱাসং গচ্ছন্তো পজাপতিং এতদৱোচ – ‘‘সুত্তং ধাৰযিত্ৱা অমুকস্স তন্তৱাযস্স দেহি, চীৱৰং ৱাযাপেত্ৱা নিক্খিপ, আগতো অয্যং উপনন্দং চীৱৰেন অচ্ছাদেস্সামী’’তি. ‘‘অত্থাৱুসো, মং সো উপট্ঠাকো’’তি. সোপি খো তন্তৱাযো আযস্মতো উপনন্দস্স সক্যপুত্তস্স উপট্ঠাকো হোতি. অথ খো আযস্মা উপনন্দো সক্যপুত্তো যেন সো তন্তৱাযো তেনুপসঙ্কমি; উপসঙ্কমিত্ৱা তং তন্তৱাযং এতদৱোচ – ‘‘ইদং খো, আৱুসো, চীৱৰং মং উদ্দিস্স ৱিয্যতি; আযতঞ্চ কৰোহি ৱিত্থতঞ্চ. অপ্পিতঞ্চ সুৱীতঞ্চ সুপ্পৱাযিতঞ্চ সুৱিলেখিতঞ্চ সুৱিতচ্ছিতঞ্চ কৰোহী’’তি. ‘‘এতে খো মে, ভন্তে, সুত্তং ধাৰযিত্ৱা অদংসু; ইমিনা সুত্তেন চীৱৰং ৱিনাহী’’তি. ‘‘ন, ভন্তে, সক্কা আযতং ৱা ৱিত্থতং ৱা অপ্পিতং ৱা কাতুং. সক্কা চ খো, ভন্তে, সুৱীতঞ্চ সুপ্পৱাযিতঞ্চ সুৱিলেখিতঞ্চ সুৱিতচ্ছিতঞ্চ কাতু’’ন্তি. ‘‘ইঙ্ঘ ত্ৱং, আৱুসো, আযতঞ্চ কৰোহি ৱিত্থতঞ্চ অপ্পিতঞ্চ. ন তেন সুত্তেন পটিবদ্ধং ভৱিস্সতী’’তি.

অথ খো সো তন্তৱাযো যথাভতং সুত্তং তন্তে উপনেত্ৱা যেন সা ইত্থী তেনুপসঙ্কমি; উপসঙ্কমিত্ৱা তং ইত্থিং এতদৱোচ – ‘‘সুত্তেন, অয্যে, অত্থো’’তি. ‘‘ননু ত্ৱং অয্যো [অয্য (স্যা.)] মযা ৱুত্তো – ‘ইমিনা সুত্তেন চীৱৰং ৱিনাহী’’’তি. ‘‘সচ্চাহং, অয্যে, তযা ৱুত্তো – ‘ইমিনা সুত্তেন চীৱৰং ৱিনাহী’তি. অপিচ, মং অয্যো উপনন্দো এৱমাহ – ‘ইঙ্ঘ ত্ৱং, আৱুসো, আযতঞ্চ কৰোহি ৱিত্থতঞ্চ অপ্পিতঞ্চ, ন তেন সুত্তেন পটিবদ্ধং ভৱিস্সতী’’’তি. অথ খো সা ইত্থী যত্তকংযেৱ সুত্তং পঠমং অদাসি তত্তকং পচ্ছা অদাসি. অস্সোসি খো আযস্মা উপনন্দো সক্যপুত্তো – ‘‘সো কিৰ পুৰিসো পৱাসতো আগতো’’তি. অথ খো আযস্মা উপনন্দো সক্যপুত্তো যেন তস্স পুৰিসস্স নিৱেসনং তেনুপসঙ্কমি; উপসঙ্কমিত্ৱা পঞ্ঞত্তে আসনে নিসীদি. অথ খো সো পুৰিসো যেনাযস্মা উপনন্দো সক্যপুত্তো তেনুপসঙ্কমি; উপসঙ্কমিত্ৱা আযস্মন্তং উপনন্দং সক্যপুত্তং অভিৱাদেত্ৱা একমন্তং নিসীদি. একমন্তং নিসিন্নো খো সো পুৰিসো পজাপতিং এতদৱোচ – ‘‘ৱীতং তং চীৱৰ’’ন্তি? ‘‘আমায্য, ৱীতং তং চীৱৰ’’ন্তি. ‘‘আহৰ, অয্যং উপনন্দং চীৱৰেন অচ্ছাদেস্সামী’’তি. অথ খো সা ইত্থী তং চীৱৰং নীহৰিত্ৱা সামিকস্স দত্ৱা এতমত্থং আৰোচেসি. অথ খো সো পুৰিসো আযস্মতো উপনন্দস্স সক্যপুত্তস্স চীৱৰং দত্ৱা উজ্ঝাযতি খিয্যতি ৱিপাচেতি – ‘‘মহিচ্ছা ইমে সমণা সক্যপুত্তিযা অসন্তুট্ঠা. নযিমে সুকৰা চীৱৰেন অচ্ছাদেতুং. কথঞ্হি নাম অয্যো উপনন্দো মযা পুব্বে অপ্পৱাৰিতো তন্তৱাযে [গহপতিকস্স তন্তৱাযে (ক.)] উপসঙ্কমিত্ৱা চীৱৰে ৱিকপ্পং আপজ্জিস্সতী’’তি.

অস্সোসুং খো ভিক্খূ তস্স পুৰিসস্স উজ্ঝাযন্তস্স খিয্যন্তস্স ৱিপাচেন্তস্স. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা উপনন্দো সক্যপুত্তো পুব্বে অপ্পৱাৰিতো গহপতিকস্স তন্তৱাযে উপসঙ্কমিত্ৱা চীৱৰে ৱিকপ্পং আপজ্জিস্সতী’’তি! অথ খো তে ভিক্খূ আযস্মন্তং উপনন্দং সক্যপুত্তং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ ত্ৱং, উপনন্দ, পুব্বে অপ্পৱাৰিতো গহপতিকস্স তন্তৱাযে উপসঙ্কমিত্ৱা চীৱৰে ৱিকপ্পং আপজ্জী’’তি? ‘‘সচ্চং, ভগৱা’’তি. ‘‘ঞাতকো তে, উপনন্দ, অঞ্ঞাতকো’’তি? ‘‘অঞ্ঞাতকো, ভগৱা’’তি. ‘‘অঞ্ঞাতকো, মোঘপুৰিস, অঞ্ঞাতকস্স ন জানাতি পতিৰূপং ৱা অপ্পতিৰূপং ৱা সন্তং ৱা অসন্তং ৱা. তত্থ নাম ত্ৱং, মোঘপুৰিস, পুব্বে অপ্পৱাৰিতো অঞ্ঞাতকস্স গহপতিকস্স তন্তৱাযে উপসঙ্কমিত্ৱা চীৱৰে ৱিকপ্পং আপজ্জিস্সসি! নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৬৪২. ‘‘ভিক্খুং পনেৱ উদ্দিস্স অঞ্ঞাতকো গহপতি ৱা গহপতানী ৱা তন্তৱাযেহি চীৱৰং ৱাযাপেয্য, তত্ৰ চে সো ভিক্খু পুব্বে অপ্পৱাৰিতো তন্তৱাযে উপসঙ্কমিত্ৱা চীৱৰে ৱিকপ্পং আপজ্জেয্য – ‘ইদং খো, আৱুসো, চীৱৰং মং উদ্দিস্স ৱিয্যতি. আযতঞ্চ কৰোথ ৱিত্থতঞ্চ. অপ্পিতঞ্চ সুৱীতঞ্চ সুপ্পৱাযিতঞ্চ সুৱিলেখিতঞ্চ সুৱিতচ্ছিতঞ্চ কৰোথ. অপ্পেৱ নাম মযম্পি আযস্মন্তানং কিঞ্চিমত্তং অনুপদজ্জেয্যামা’তি. এৱঞ্চ সো ভিক্খু ৱত্ৱা কিঞ্চিমত্তং অনুপদজ্জেয্য অন্তমসো পিণ্ডপাতমত্তম্পি, নিস্সগ্গিযং পাচিত্তিয’’ন্তি.

৬৪৩. ভিক্খুং পনেৱ উদ্দিস্সাতি ভিক্খুস্সত্থায ভিক্খুং আৰম্মণং কৰিত্ৱা ভিক্খুং অচ্ছাদেতুকামো.

অঞ্ঞাতকো নাম মাতিতো ৱা পিতিতো ৱা যাৱ সত্তমা পিতামহযুগা অসম্বদ্ধো.

গহপতি নাম যো কোচি অগাৰং অজ্ঝাৱসতি.

গহপতানী নাম যা কাচি অগাৰং অজ্ঝাৱসতি.

তন্তৱাযেহীতি পেসকাৰেহি.

চীৱৰং নাম ছন্নং চীৱৰানং অঞ্ঞতৰং চীৱৰং ৱিকপ্পনুপগং পচ্ছিমং.

ৱাযাপেয্যাতি ৱিনাপেতি.

তত্ৰ চে সো ভিক্খূতি যং ভিক্খুং উদ্দিস্স চীৱৰং ৱিয্যতি সো ভিক্খু.

পুব্বে অপ্পৱাৰিতোতি পুব্বে অৱুত্তো হোতি – ‘‘কীদিসেন তে, ভন্তে, চীৱৰেন অত্থো, কীদিসং তে চীৱৰং ৱাযাপেমী’’তি?

তন্তৱাযে উপসঙ্কমিত্ৱাতি ঘৰং গন্ত্ৱা যত্থ কত্থচি উপসঙ্কমিত্ৱা.

চীৱৰে ৱিকপ্পং আপজ্জেয্যাতি – ‘‘ইদং খো, আৱুসো, চীৱৰং মং উদ্দিস্স ৱিয্যতি, আযতঞ্চ কৰোথ ৱিত্থতঞ্চ. অপ্পিতঞ্চ সুৱীতঞ্চ সুপ্পৱাযিতঞ্চ সুৱিলেখিতঞ্চ সুৱিতচ্ছিতঞ্চ কৰোথ. অপ্পেৱ নাম মযম্পি আযস্মন্তানং কিঞ্চিমত্তং অনুপদজ্জেয্যামা’’তি.

এৱঞ্চ সো ভিক্খু ৱত্ৱা কিঞ্চিমত্তং অনুপদজ্জেয্য অন্তমসো পিণ্ডপাতমত্তম্পীতি. পিণ্ডপাতো নাম যাগুপি ভত্তম্পি খাদনীযম্পি চুণ্ণপিণ্ডোপি দন্তকট্ঠম্পি দসিকসুত্তম্পি, অন্তমসো ধম্মম্পি ভণতি.

তস্স ৱচনেন আযতং ৱা ৱিত্থতং ৱা অপ্পিতং ৱা কৰোতি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা পুগ্গলস্স ৱা. এৱঞ্চ পন, ভিক্খৱে, নিস্সজ্জিতব্বং…পে… ইদং মে, ভন্তে, চীৱৰং পুব্বে অপ্পৱাৰিতো অঞ্ঞাতকস্স গহপতিকস্স তন্তৱাযে উপসঙ্কমিত্ৱা চীৱৰে ৱিকপ্পং আপন্নং নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৬৪৪. অঞ্ঞাতকে অঞ্ঞাতকসঞ্ঞী পুব্বে অপ্পৱাৰিতো গহপতিকস্স তন্তৱাযে উপসঙ্কমিত্ৱা চীৱৰে ৱিকপ্পং আপজ্জতি, নিস্সগ্গিযং পাচিত্তিযং. অঞ্ঞাতকে ৱেমতিকো পুব্বে অপ্পৱাৰিতো গহপতিকস্স তন্তৱাযে উপসঙ্কমিত্ৱা চীৱৰে ৱিকপ্পং আপজ্জতি, নিস্সগ্গিযং পাচিত্তিযং. অঞ্ঞাতকে ঞাতকসঞ্ঞী পুব্বে অপ্পৱাৰিতো গহপতিকস্স তন্তৱাযে উপসঙ্কমিত্ৱা চীৱৰে ৱিকপ্পং আপজ্জতি, নিস্সগ্গিযং পাচিত্তিযং.

ঞাতকে অঞাতকসঞ্ঞী, আপত্তি দুক্কটস্স. ঞাতকে ৱেমতিকো, আপত্তি দুক্কটস্স. ঞাতকে ঞাতকসঞ্ঞী, অনাপত্তি.

৬৪৫. অনাপত্তি – ঞাতকানং, পৱাৰিতানং, অঞ্ঞস্সত্থায, অত্তনো ধনেন, মহগ্ঘং ৱাযাপেতুকামস্স অপ্পগ্ঘং ৱাযাপেতি, উম্মত্তকস্স, আদিকম্মিকস্সাতি.

মহাপেসকাৰসিক্খাপদং নিট্ঠিতং সত্তমং.