৬. সুত্তৱিঞ্ঞত্তিসিক্খাপদং

৬৩৬. তেন সমযেন বুদ্ধো ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন ছব্বগ্গিযা ভিক্খূ চীৱৰকাৰসমযে বহুং সুত্তং ৱিঞ্ঞাপেসুং. কতেপি চীৱৰে বহুং সুত্তং অৱসিট্ঠং হোতি. অথ খো ছব্বগ্গিযানং ভিক্খূনং এতদহোসি – ‘‘হন্দ মযং, আৱুসো, অঞ্ঞম্পি সুত্তং ৱিঞ্ঞাপেত্ৱা তন্তৱাযেহি চীৱৰং ৱাযাপেমা’’তি. অথ খো ছব্বগ্গিযা ভিক্খূ অঞ্ঞম্পি সুত্তং ৱিঞ্ঞাপেত্ৱা তন্তৱাযেহি চীৱৰং ৱাযাপেসুং. ৱীতেপি চীৱৰে বহুং সুত্তং অৱসিট্ঠং হোতি. দুতিযম্পি খো ছব্বগ্গিযা ভিক্খূ অঞ্ঞম্পি সুত্তং ৱিঞ্ঞাপেত্ৱা তন্তৱাযেহি চীৱৰং ৱাযাপেসুং. ৱীতেপি চীৱৰে বহুং সুত্তং অৱসিট্ঠং হোতি. ততিযম্পি খো ছব্বগ্গিযা ভিক্খূ অঞ্ঞম্পি সুত্তং ৱিঞ্ঞাপেত্ৱা তন্তৱাযেহি চীৱৰং ৱাযাপেসুং. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা সামং সুত্তং ৱিঞ্ঞাপেত্ৱা তন্তৱাযেহি চীৱৰং ৱাযাপেস্সন্তী’’তি!

অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ সামং সুত্তং ৱিঞ্ঞাপেত্ৱা তন্তৱাযেহি চীৱৰং ৱাযাপেস্সন্তী’’তি! অথ খো তে ভিক্খূ ছব্বগ্গিযে ভিক্খূ অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ তুম্হে, ভিক্খৱে, সামং সুত্তং ৱিঞ্ঞাপেত্ৱা তন্তৱাযেহি চীৱৰং ৱাযাপেথা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, সামং সুত্তং ৱিঞ্ঞাপেত্ৱা তন্তৱাযেহি চীৱৰং ৱাযাপেস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৬৩৭. ‘‘যো পন ভিক্খু সামং সুত্তং ৱিঞ্ঞাপেত্ৱা তন্তৱাযেহি চীৱৰং ৱাযাপেয্য, নিস্সগ্গিযং পাচিত্তিয’’ন্তি.

৬৩৮. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

সামন্তি সযং ৱিঞ্ঞাপেত্ৱা.

সুত্তং নাম ছ সুত্তানি – খোমং কপ্পাসিকং কোসেয্যং কম্বলং সাণং ভঙ্গং.

তন্তৱাযেহীতি পেসকাৰেহি ৱাযাপেতি, পযোগে পযোগে দুক্কটং [ৱাযাপেতি, পযোগে দুক্কটং (স্যা.)]. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা পুগ্গলস্স ৱা. এৱঞ্চ পন, ভিক্খৱে, নিস্সজ্জিতব্বং…পে… ইদং মে, ভন্তে, চীৱৰং সামং সুত্তং ৱিঞ্ঞাপেত্ৱা তন্তৱাযেহি ৱাযাপিতং নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৬৩৯. ৱাযাপিতে ৱাযাপিতসঞ্ঞী, নিস্সগ্গিযং পাচিত্তিযং. ৱাযাপিতে ৱেমতিকো, নিস্সগ্গিযং পাচিত্তিযং. ৱাযাপিতে অৱাযাপিতসঞ্ঞী, নিস্সগ্গিযং পাচিত্তিযং.

অৱাযাপিতে ৱাযাপিতসঞ্ঞী, আপত্তি দুক্কটস্স. অৱাযাপিতে ৱেমতিকো, আপত্তি দুক্কটস্স. অৱাযাপিতে অৱাযাপিতসঞ্ঞী, অনাপত্তি.

৬৪০. অনাপত্তি – চীৱৰং সিব্বেতুং, আযোগে, কাযবন্ধনে, অংসবন্ধকে [অংসৱট্টকে (সী.)], পত্তত্থৱিকায, পৰিস্সাৱনে, ঞাতকানং, পৱাৰিতানং, অঞ্ঞস্সত্থায, অত্তনো ধনেন, উম্মত্তকস্স, আদিকম্মিকস্সাতি.

সুত্তৱিঞ্ঞত্তিসিক্খাপদং নিট্ঠিতং ছট্ঠং.