৫. চীৱৰঅচ্ছিন্দনসিক্খাপদং

৬৩১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন আযস্মা উপনন্দো সক্যপুত্তো ভাতুনো সদ্ধিৱিহাৰিকং ভিক্খুং এতদৱোচ – ‘‘এহাৱুসো, জনপদচাৰিকং পক্কমিস্সামা’’তি. ‘‘নাহং, ভন্তে, গমিস্সামি; দুব্বলচীৱৰোম্হী’’তি. ‘‘এহাৱুসো, অহং তে চীৱৰং দস্সামী’’তি তস্স চীৱৰং অদাসি. অস্সোসি খো সো ভিক্খু – ‘‘ভগৱা কিৰ জনপদচাৰিকং পক্কমিস্সতী’’তি. অথ খো তস্স ভিক্খুনো এতদহোসি – ‘‘ন দানাহং আযস্মতা উপনন্দেন সক্যপুত্তেন সদ্ধিং জনপদচাৰিকং পক্কমিস্সামি, ভগৱতা সদ্ধিং জনপদচাৰিকং পক্কমিস্সামী’’তি. অথ খো আযস্মা উপনন্দো সক্যপুত্তো তং ভিক্খুং এতদৱোচ – ‘‘এহি দানি, আৱুসো, জনপদচাৰিকং পক্কমিস্সামা’’তি. ‘‘নাহং, ভন্তে, তযা সদ্ধিং জনপদচাৰিকং পক্কমিস্সামি, ভগৱতা সদ্ধিং জনপদচাৰিকং পক্কমিস্সামী’’তি. ‘‘যম্পি ত্যাহং, আৱুসো, চীৱৰং অদাসিং, মযা সদ্ধিং জনপদচাৰিকং পক্কমিস্সতী’’তি, কুপিতো অনত্তমনো অচ্ছিন্দি.

অথ খো সো ভিক্খু ভিক্খূনং এতমত্থং আৰোচেসি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা উপনন্দো সক্যপুত্তো ভিক্খুস্স সামং চীৱৰং দত্ৱা কুপিতো অনত্তমনো অচ্ছিন্দিস্সতী’’তি! অথ খো তে ভিক্খূ আযস্মন্তং উপনন্দং সক্যপুত্তং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ ত্ৱং, উপনন্দ, ভিক্খুস্স সামং চীৱৰং দত্ৱা কুপিতো অনত্তমনো অচ্ছিন্দী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, মোঘপুৰিস, ভিক্খুস্স সামং চীৱৰং দত্ৱা কুপিতো অনত্তমনো অচ্ছিন্দিস্সসি! নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৬৩২. ‘‘যো পন ভিক্খু ভিক্খুস্স সামং চীৱৰং দত্ৱা কুপিতো অনত্তমনো অচ্ছিন্দেয্য ৱা অচ্ছিন্দাপেয্য ৱা, নিস্সগ্গিযং পাচিত্তিয’’ন্তি.

৬৩৩. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুস্সাতি অঞ্ঞস্স ভিক্খুস্স.

সামন্তি সযং দত্ৱা.

চীৱৰং নাম ছন্নং চীৱৰানং অঞ্ঞতৰং চীৱৰং, ৱিকপ্পনুপগং পচ্ছিমং.

কুপিতো অনত্তমনোতি অনভিৰদ্ধো আহতচিত্তো খিলজাতো.

অচ্ছিন্দেয্যাতি সযং অচ্ছিন্দতি, নিস্সগ্গিযং পাচিত্তিযং [নিস্সগ্গিযং হোতি (স্যা.)].

অচ্ছিন্দাপেয্যাতি অঞ্ঞং আণাপেতি, আপত্তি দুক্কটস্স. সকিং আণত্তো বহুকম্পি অচ্ছিন্দতি, নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা পুগ্গলস্স ৱা. এৱঞ্চ পন, ভিক্খৱে, নিস্সজ্জিতব্বং…পে… ইদং মে, ভন্তে, চীৱৰং ভিক্খুস্স সামং দত্ৱা অচ্ছিন্নং নিস্সগ্গিযং ইমাহং সঙ্ঘস্স নিস্সজ্জামীতি…পে… দদেয্যাতি …পে… দদেয্যুন্তি…পে… আযস্মতো দম্মীতি.

৬৩৪. উপসম্পন্নে উপসম্পন্নসঞ্ঞী চীৱৰং দত্ৱা কুপিতো অনত্তমনো অচ্ছিন্দতি ৱা অচ্ছিন্দাপেতি ৱা, নিস্সগ্গিযং পাচিত্তিযং. উপসম্পন্নে ৱেমতিকো চীৱৰং দত্ৱা কুপিতো অনত্তমনো অচ্ছিন্দতি ৱা অচ্ছিন্দাপেতি ৱা, নিস্সগ্গিযং পাচিত্তিযং. উপসম্পন্নে অনুপসম্পন্নসঞ্ঞী চীৱৰং দত্ৱা কুপিতো অনত্তমনো অচ্ছিন্দতি ৱা অচ্ছিন্দাপেতি ৱা, নিস্সগ্গিযং পাচিত্তিযং.

অঞ্ঞং পৰিক্খাৰং দত্ৱা কুপিতো অনত্তমনো অচ্ছিন্দতি ৱা অচ্ছিন্দাপেতি ৱা, আপত্তি দুক্কটস্স. অনুপসম্পন্নস্স চীৱৰং ৱা অঞ্ঞং ৱা পৰিক্খাৰং দত্ৱা কুপিতো অনত্তমনো অচ্ছিন্দতি ৱা অচ্ছিন্দাপেতি ৱা, আপত্তি দুক্কটস্স. অনুপসম্পন্নে উপসম্পন্নসঞ্ঞী, আপত্তি দুক্কটস্স. অনুপসম্পন্নে ৱেমতিকো, আপত্তি দুক্কটস্স. অনুপসম্পন্নে অনুপসম্পন্নসঞ্ঞী, আপত্তি দুক্কটস্স.

৬৩৫. অনাপত্তি – সো ৱা দেতি, তস্স ৱা ৱিস্সসন্তো গণ্হাতি, উম্মত্তকস্স আদিকম্মিকস্সাতি.

চীৱৰঅচ্ছিন্দনসিক্খাপদং নিট্ঠিতং পঞ্চমং.