৪. ৱস্সিকসাটিকসিক্খাপদং

৬২৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভগৱতা ভিক্খূনং ৱস্সিকসাটিকা অনুঞ্ঞাতা হোতি. ছব্বগ্গিযা ভিক্খূ – ‘‘ভগৱতা ৱস্সিকসাটিকা অনুঞ্ঞাতা’’তি, পটিকচ্চেৱ [পটিগচ্চেৱ (সী.)] ৱস্সিকসাটিকচীৱৰং পৰিযেসন্তি, পটিকচ্চেৱ কত্ৱা নিৱাসেন্তি, জিণ্ণায ৱস্সিকসাটিকায নগ্গা কাযং ওৱস্সাপেন্তি. যে তে ভিক্খূ অপ্পিচ্ছা… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ পটিকচ্চেৱ ৱস্সিকসাটিকচীৱৰং পৰিযেসিস্সন্তি, পটিকচ্চেৱ কত্ৱা নিৱাসেস্সন্তি, জিণ্ণায ৱস্সিকসাটিকায নগ্গা কাযং ওৱস্সাপেস্সন্তী’’তি! অথ খো তে ভিক্খূ ছব্বগ্গিযে ভিক্খূ অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ তুম্হে, ভিক্খৱে, পটিকচ্চেৱ ৱস্সিকসাটিকচীৱৰং পৰিযেসথ? পটিকচ্চেৱ কত্ৱা নিৱাসেথ? জিণ্ণায ৱস্সিকসাটিকায নগ্গা কাযং ওৱস্সাপেথা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে মোঘপুৰিসা, পটিকচ্চেৱ ৱস্সিকসাটিকচীৱৰং পৰিযেসিস্সথ, পটিকচ্চেৱ কত্ৱা নিৱাসেস্সথ, জিণ্ণায ৱস্সিকসাটিকায নগ্গা কাযং ওৱস্সাপেস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৬২৭. ‘‘মাসো সেসো গিম্হান’ন্তি ভিক্খুনা ৱস্সিকসাটিকচীৱৰং পৰিযেসিতব্বং; ‘অদ্ধমাসো সেসো গিম্হান’ন্তি কত্ৱা নিৱাসেতব্বং. ‘ওৰেন চে মাসো সেসো গিম্হান’ন্তি ৱস্সিকসাটিকচীৱৰং পৰিযেসেয্য, ‘ওৰেনদ্ধমাসো সেসো গিম্হান’ন্তি কত্ৱা নিৱাসেয্য, নিস্সগ্গিযং পাচিত্তিয’’ন্তি.

৬২৮. ‘মাসো সেসো গিম্হান’ন্তি ভিক্খুনা ৱস্সিকসাটিকচীৱৰং পৰিযেসিতব্বন্তি. যে মনুস্সা পুব্বেপি ৱস্সিকসাটিকচীৱৰং দেন্তি তে উপসঙ্কমিত্ৱা এৱমস্সু ৱচনীযা – ‘‘কালো ৱস্সিকসাটিকায, সমযো ৱস্সিকসাটিকায, অঞ্ঞেপি মনুস্সা ৱস্সিকসাটিকচীৱৰং দেন্তী’’তি. ন ৱত্তব্বা – ‘‘দেথ মে ৱস্সিকসাটিকচীৱৰং, আহৰথ মে ৱস্সিকসাটিকচীৱৰং, পৰিৱত্তেথ মে ৱস্সিকসাটিকচীৱৰং, চেতাপেথ মে ৱস্সিকসাটিকচীৱৰ’’ন্তি.

‘অদ্ধমাসো সেসো গিম্হান’ন্তি কত্ৱা নিৱাসেতব্বন্তি. অদ্ধমাসে সেসে গিম্হানে কত্ৱা নিৱাসেতব্বং.

‘ওৰেন চে মাসো সেসো গিম্হান’ন্তি অতিৰেকমাসে সেস গিম্হানে ৱস্সিকসাটিকচীৱৰং পৰিযেসতি, নিস্সগ্গিযং পাচিত্তিযং.

‘ওৰেনদ্ধমাসো সেসো গিম্হান’ন্তি অতিৰেকদ্ধমাসে সেসে গিম্হানে কত্ৱা নিৱাসেতি, নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা পুগ্গলস্স ৱা. এৱঞ্চ পন, ভিক্খৱে, নিস্সজ্জিতব্বং…পে… ইদং মে, ভন্তে, ৱস্সিকসাটিকচীৱৰং অতিৰেকমাসে সেসে গিম্হানে পৰিযিট্ঠং অতিৰেকদ্ধমাসে সেসে গিম্হানে কত্ৱা পৰিদহিতং নিস্সগ্গিযং. ইমাহং সঙ্ঘস্স নিস্সজ্জামীতি.…পে… দদেয্যাতি…পে… দদেয্যুন্তি…পে… আযস্মতো দম্মীতি.

৬২৯. অতিৰেকমাসে সেসে গিম্হানে অতিৰেকসঞ্ঞী ৱস্সিকসাটিকচীৱৰং পৰিযেসতি, নিস্সগ্গিযং পাচিত্তিযং. অতিৰেকমাসে সেসে গিম্হানে ৱেমতিকো ৱস্সিকসাটিকচীৱৰং পৰিযেসতি, নিস্সগ্গিযং পাচিত্তিযং. অতিৰেকমাসে সেসে গিম্হানে ঊনকসঞ্ঞী ৱস্সিকসাটিকচীৱৰং পৰিযেসতি, নিস্সগ্গিযং পাচিত্তিযং.

অতিৰেকদ্ধমাসে সেসে গিম্হানে অতিৰেকসঞ্ঞী কত্ৱা নিৱাসেতি, নিস্সগ্গিযং পাচিত্তিযং. অতিৰেকদ্ধমাসে সেসে গিম্হানে ৱেমতিকো কত্ৱা নিৱাসেতি, নিস্সগ্গিযং পাচিত্তিযং. অতিৰেকদ্ধমাসে সেসে গিম্হানে ঊনকসঞ্ঞী কত্ৱা নিৱাসেতি, নিস্সগ্গিযং পাচিত্তিযং.

সতিযা ৱস্সিকসাটিকায নগ্গো কাযং ওৱস্সাপেতি, আপত্তি দুক্কটস্স. ঊনকমাসে সেসে গিম্হানে অতিৰেকসঞ্ঞী, আপত্তি দুক্কটস্স. ঊনকমাসে সেসে গিম্হানে ৱেমতিকো, আপত্তি দুক্কটস্স. ঊনকমাসে সেসে গিম্হানে ঊনকসঞ্ঞী, অনাপত্তি.

ঊনকদ্ধমাসে সেসে গিম্হানে অতিৰেকসঞ্ঞী, আপত্তি দুক্কটস্স. ঊনকদ্ধমাসে সেসে গিম্হানে ৱেমতিকো, আপত্তি দুক্কটস্স. ঊনকদ্ধমাসে সেসে গিম্হানে ঊনকসঞ্ঞী, অনাপত্তি.

৬৩০. অনাপত্তি ‘মাসো সেসো গিম্হান’ন্তি ৱস্সিকসাটিকচীৱৰং পৰিযেসতি, ‘অদ্ধমাসো সেসো গিম্হান’ন্তি কত্ৱা নিৱাসেতি, ‘ঊনকমাসো সেসো গিম্হান’ন্তি ৱস্সিকসাটিকচীৱৰং পৰিযেসতি, ‘ঊনকদ্ধমাসো সেসো গিম্হান’ন্তি কত্ৱা নিৱাসেতি, পৰিযিট্ঠায ৱস্সিকসাটিকায ৱস্সং উক্কড্ঢিয্যতি, নিৱত্থায ৱস্সিকসাটিকায ৱস্সং উক্কড্ঢিয্যতি, ধোৱিত্ৱা নিক্খিপিতব্বং; সমযে নিৱাসেতব্বং, অচ্ছিন্নচীৱৰস্স, নট্ঠচীৱৰস্স, আপদাসু, উম্মত্তকস্স, আদিকম্মিকস্সাতি.

ৱস্সিকসাটিকসিক্খাপদং নিট্ঠিতং চতুত্থং.