৯. ৰূপিযসংৱোহাৰসিক্খাপদং

৫৮৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ নানপ্পকাৰকং ৰূপিযসংৱোহাৰং সমাপজ্জন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা নানপ্পকাৰকং ৰূপিযসংৱোহাৰং সমাপজ্জিস্সন্তি, সেয্যথাপি গিহী কামভোগিনো’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ নানপ্পকাৰকং ৰূপিযসংৱোহাৰং সমাপজ্জিস্সন্তী’’তি! অথ খো তে ভিক্খূ ছব্বগ্গিযে ভিক্খূ অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ তুম্হে, ভিক্খৱে, নানপ্পকাৰকং ৰূপিযসংৱোহাৰং সমাপজ্জথা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, নানপ্পকাৰকং ৰূপিযসংৱোহাৰং সমাপজ্জিস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৫৮৮. ‘‘যো পন ভিক্খু নানপ্পকাৰকং ৰূপিযসংৱোহাৰং সমাপজ্জেয্য, নিস্সগ্গিযং পাচিত্তিয’’ন্তি.

৫৮৯. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

নানপ্পকাৰকং নাম কতম্পি অকতম্পি কতাকতম্পি. কতং নাম সীসূপগং গীৱূপগং হত্থূপগং পাদূপগং কটূপগং. অকতং নাম ঘনকতং ৱুচ্চতি. কতাকতং নাম তদুভযং.

ৰূপিযং নাম সত্থুৱণ্ণো কহাপণো, লোহমাসকো, দাৰুমাসকো, জতুমাসকো যে ৱোহাৰং গচ্ছন্তি.

সমাপজ্জেয্যাতি কতেন কতং চেতাপেতি, নিস্সগ্গিযং পাচিত্তিযং [নিস্সগ্গিযং হোতি (স্যা.)]. কতেন অকতং চেতাপেতি, নিস্সগ্গিযং পাচিত্তিযং. কতেন কতাকতং চেতাপেতি, নিস্সগ্গিযং পাচিত্তিযং. অকতেন কতং চেতাপেতি, নিস্সগ্গিযং পাচিত্তিযং. অকতেন অকতং চেতাপেতি, নিস্সগ্গিযং পাচিত্তিযং. অকতেন কতাকতং চেতাপেতি, নিস্সগ্গিযং পাচিত্তিযং. কতাকতেন কতং চেতাপেতি, নিস্সগ্গিযং পাচিত্তিযং. কতাকতেন অকতং চেতাপেতি, নিস্সগ্গিযং পাচিত্তিযং. কতাকতেন কতাকতং চেতাপেতি, নিস্সগ্গিযং পাচিত্তিযং. সঙ্ঘমজ্ঝে নিস্সজ্জিতব্বং. এৱঞ্চ পন, ভিক্খৱে, নিস্সজ্জিতব্বং. তেন ভিক্খুনা সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ৱুড্ঢানং ভিক্খূনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘অহং, ভন্তে, নানপ্পকাৰকং ৰূপিযসংৱোহাৰং সমাপজ্জিং. ইদং মে নিস্সগ্গিযং. ইমাহং সঙ্ঘস্স নিস্সজ্জামী’’তি. নিস্সজ্জিত্ৱা আপত্তি দেসেতব্বা. ব্যত্তেন ভিক্খুনা পটিবলেন আপত্তি পটিগ্গহেতব্বা. সচে তত্থ আগচ্ছতি আৰামিকো ৱা উপাসকো ৱা সো ৱত্তব্বো – ‘‘আৱুসো, ইমং জানাহী’’তি. সচে সো ভণতি – ‘‘ইমিনা কিং আহৰিয্যতূ’’তি, ন ৱত্তব্বো – ‘‘ইমং ৱা ইমং ৱা আহৰা’’তি. কপ্পিযং আচিক্খিতব্বং – সপ্পি ৱা তেলং ৱা মধু ৱা ফাণিতং ৱা. সচে সো তেন পৰিৱত্তেত্ৱা কপ্পিযং আহৰতি, ৰূপিযচেতাপকং ঠপেত্ৱা, সব্বেহেৱ পৰিভুঞ্জিতব্বং. এৱঞ্চেতং লভেথ, ইচ্চেতং কুসলং; নো চে লভেথ, সো ৱত্তব্বো – ‘‘আৱুসো, ইমং ছড্ডেহী’’তি. সচে সো ছড্ডেতি, ইচ্চেতং কুসলং; নো চে ছড্ডেতি, পঞ্চহঙ্গেহি সমন্নাগতো ভিক্খু ৰূপিযছড্ডকো সম্মন্নিতব্বো – যো ন ছন্দাগতিং গচ্ছেয্য, ন দোসাগতিং গচ্ছেয্য, ন মোহাগতিং গচ্ছেয্য, ন ভযাগতিং গচ্ছেয্য, ছড্ডিতাছড্ডিতঞ্চ জানেয্য. এৱঞ্চ পন, ভিক্খৱে, সম্মন্নিতব্বো. পঠমং ভিক্খু যাচিতব্বো. যাচিত্ৱা ব্যত্তেন ভিক্খুনা পটিবলেন সঙ্ঘো ঞাপেতব্বো –

৫৯০. ‘‘সুণাতু মে, ভন্তে, সঙ্ঘো. যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুং ৰূপিযছড্ডকং সম্মন্নেয্য. এসা ঞত্তি.

‘‘সুণাতু মে, ভন্তে, সঙ্ঘো. সঙ্ঘো ইত্থন্নামং ভিক্খুং ৰূপিযছড্ডকং সম্মন্নতি. যস্সাযস্মতো খমতি ইত্থন্নামস্স ভিক্খুনো ৰূপিযছড্ডকস্স সম্মুতি, সো তুণ্হস্স; যস্স নক্খমতি, সো ভাসেয্য.

‘‘সম্মতো সঙ্ঘেন ইত্থন্নামো ভিক্খু ৰূপিযছড্ডকো. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

তেন সম্মতেন ভিক্খুনা অনিমিত্তং কত্ৱা পাতেতব্বং. সচে নিমিত্তং কত্ৱা পাতেতি, আপত্তি দুক্কটস্স.

৫৯১. ৰূপিযে ৰূপিযসঞ্ঞী ৰূপিযং চেতাপেতি, নিস্সগ্গিযং পাচিত্তিযং. ৰূপিযে ৱেমতিকো ৰূপিযং চেতাপেতি, নিস্সগ্গিযং পাচিত্তিযং. ৰূপিযে অৰূপিযসঞ্ঞী ৰূপিযং চেতাপেতি, নিস্সগ্গিযং পাচিত্তিযং. অৰূপিযে ৰূপিযসঞ্ঞী ৰূপিযং চেতাপেতি, নিস্সগ্গিযং পাচিত্তিযং. অৰূপিযে ৱেমতিকো ৰূপিযং চেতাপেতি, নিস্সগ্গিযং পাচিত্তিযং. অৰূপিযে অৰূপিযসঞ্ঞী ৰূপিযং চেতাপেতি, নিস্সগ্গিযং পাচিত্তিযং.

অৰূপিযে ৰূপিযসঞ্ঞী, আপত্তি দুক্কটস্স. অৰূপিযে ৱেমতিকো, আপত্তি দুক্কটস্স. অৰূপিযে অৰূপিযসঞ্ঞী, অনাপত্তি.

৫৯২. অনাপত্তি উম্মত্তকস্স, আদিকম্মিকস্সাতি.

ৰূপিযসংৱোহাৰসিক্খাপদং নিট্ঠিতং নৱমং.