১০. কযৱিক্কযসিক্খাপদং

৫৯৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন আযস্মা উপনন্দো সক্যপুত্তো পট্টো হোতি চীৱৰকম্মং কাতুং. সো পটপিলোতিকানং সঙ্ঘাটিং কৰিত্ৱা সুৰত্তং সুপৰিকম্মকতং কত্ৱা পাৰুপি. অথ খো অঞ্ঞতৰো পৰিব্বাজকো মহগ্ঘং পটং পাৰুপিত্ৱা যেনাযস্মা উপনন্দো সক্যপুত্তো তেনুপসঙ্কমি; উপসঙ্কমিত্ৱা আযস্মন্তং উপনন্দং সক্যপুত্তং এতদৱোচ – ‘‘সুন্দৰা খো ত্যাযং, আৱুসো, সঙ্ঘাটি; দেহি মে পটেনা’’তি. ‘‘জানাহি, আৱুসো’’তি. ‘‘আমাৱুসো, জানামী’’তি. ‘‘হন্দাৱুসো’’তি, অদাসি. অথ খো সো পৰিব্বাজকো তং সঙ্ঘাটিং পাৰুপিত্ৱা পৰিব্বাজকাৰামং অগমাসি. পৰিব্বাজকা তং পৰিব্বাজকং এতদৱোচুং – ‘‘সুন্দৰা খো ত্যাযং, আৱুসো, সঙ্ঘাটি; কুতো তযা লদ্ধা’’তি? ‘‘তেন মে, আৱুসো, পটেন পৰিৱত্তিতা’’তি. ‘‘কতিহিপি ত্যাযং, আৱুসো, সঙ্ঘাটি ভৱিস্সতি, সোযেৱ তে পটো ৱৰো’’তি.

অথ খো সো পৰিব্বাজকো – ‘‘সচ্চং খো পৰিব্বাজকা আহংসু – ‘কতিহিপি ম্যাযং সঙ্ঘাটি ভৱিস্সতি! সোযেৱ মে পটো ৱৰো’’’তি যেনাযস্মা উপনন্দো সক্যপুত্তো তেনুপসঙ্কমি; উপসঙ্কমিত্ৱা আযস্মন্তং উপনন্দং সক্যপুত্তং এতদৱোচ – ‘‘হন্দ তে, আৱুসো, সঙ্ঘাটি [সঙ্ঘাটিং (স্যা. ক.)]; দেহি মে পট’’ন্তি. ‘‘ননু ত্ৱং, আৱুসো, মযা ৱুত্তো – ‘জানাহি, আৱুসো’তি! নাহ দস্সামী’’তি. অথ খো সো পৰিব্বাজকো উজ্ঝাযতি খিয্যতি ৱিপাচেতি – ‘‘গিহীপি নং গিহিস্স ৱিপ্পটিসাৰিস্স দেন্তি, কিং পন পব্বজিতো পব্বজিতস্স ন দস্সতী’’তি! অস্সোসুং খো ভিক্খূ তস্স পৰিব্বাজকস্স উজ্ঝাযন্তস্স খিয্যন্তস্স ৱিপাচেন্তস্স. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা উপনন্দো সক্যপুত্তো পৰিব্বাজকেন সদ্ধিং কযৱিক্কযং সমাপজ্জিস্সতী’’তি! অথ খো তে ভিক্খূ আযস্মন্তং উপনন্দং সক্যপুত্তং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ ত্ৱং, উপনন্দ, পৰিব্বাজকেন সদ্ধিং কযৱিক্কযং সমাপজ্জসী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, মোঘপুৰিস, পৰিব্বাজকেন সদ্ধিং কযৱিক্কযং সমাপজ্জিস্সসি! নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৫৯৪. ‘‘যো পন ভিক্খু নানপ্পকাৰকং কযৱিক্কযং সমাপজ্জেয্য, নিস্সগ্গিযং পাচিত্তিয’’ন্তি.

৫৯৫. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

নানপ্পকাৰকং নাম চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা, অন্তমসো চুণ্ণপিণ্ডোপি দন্তকট্ঠম্পি দসিকসুত্তম্পি.

কযৱিক্কযং সমাপজ্জেয্যাতি ইমিনা ইমং দেহি, ইমিনা ইমং আহৰ, ইমিনা ইমং পৰিৱত্তেহি, ইমিনা ইমং চেতাপেহীতি. অজ্ঝাচৰতি, আপত্তি দুক্কটস্স. যতো কযিতঞ্চ হোতি ৱিক্কযিতঞ্চ অত্তনো ভণ্ডং পৰহত্থগতং পৰভণ্ডং অত্তনো হত্থগতং, নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা পুগ্গলস্স ৱা. এৱঞ্চ পন, ভিক্খৱে, নিস্সজ্জিতব্বং…পে… অহং, ভন্তে, নানপ্পকাৰকং কযৱিক্কযং সমাপজ্জিং. ইদং মে নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৫৯৬. কযৱিক্কযে কযৱিক্কযসঞ্ঞী, নিস্সগ্গিযং পাচিত্তিযং. কযৱিক্কযে ৱেমতিকো, নিস্সগ্গিযং পাচিত্তিযং. কযৱিক্কযে নকযৱিক্কযসঞ্ঞী, নিস্সগ্গিযং পাচিত্তিযং.

নকযৱিক্কযে কযৱিক্কযসঞ্ঞী, আপত্তি দুক্কটস্স. নকযৱিক্কযে ৱেমতিকো, আপত্তি দুক্কটস্স. নকযৱিক্কযে নকযৱিক্কযসঞ্ঞী, অনাপত্তি.

৫৯৭. অনাপত্তি – অগ্ঘং পুচ্ছতি, কপ্পিযকাৰকস্স আচিক্খতি, ‘‘ইদং অম্হাকং অত্থি, অম্হাকঞ্চ ইমিনা চ ইমিনা চ অত্থো’’তি ভণতি, উম্মত্তকস্স, আদিকম্মিকস্সাতি.

কযৱিক্কযসিক্খাপদং নিট্ঠিতং দসমং.

কোসিযৱগ্গো দুতিযো.

তস্সুদ্দানং –

কোসিযা সুদ্ধদ্ৱেভাগা, ছব্বস্সানি নিসীদনং;

দ্ৱে চ লোমানি উগ্গণ্হে, উভো নানপ্পকাৰকাতি.