৭. এড়কলোমধোৱাপনসিক্খাপদং

৫৭৬. তেন সমযেন বুদ্ধো ভগৱা সক্কেসু ৱিহৰতি কপিলৱত্থুস্মিং নিগ্ৰোধাৰামে. তেন খো পন সমযেন ছব্বগ্গিযা ভিক্খূ ভিক্খুনীহি এড়কলোমানি ধোৱাপেন্তিপি ৰজাপেন্তিপি ৱিজটাপেন্তিপি. ভিক্খুনিযো এড়কলোমানি ধোৱন্তিযো ৰজন্তিযো ৱিজটেন্তিযো ৰিঞ্চন্তি উদ্দেসং পৰিপুচ্ছং অধিসীলং অধিচিত্তং অধিপঞ্ঞং. অথ খো মহাপজাপতি গোতমী যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং অট্ঠাসি. একমন্তং ঠিতং খো মহাপজাপতিং গোতমিং ভগৱা এতদৱোচ – ‘‘কচ্চি, গোতমি, ভিক্খুনিযো অপ্পমত্তা আতাপিনিযো পহিতত্তা ৱিহৰন্তী’’তি? ‘‘কুতো, ভন্তে, ভিক্খুনীনং অপ্পমাদো! অয্যা ছব্বগ্গিযা ভিক্খুনীহি এড়কলোমানি ধোৱাপেন্তিপি ৰজাপেন্তিপি ৱিজটাপেন্তিপি. ভিক্খুনিযো এড়কলোমানি ধোৱন্তিযো ৰজন্তিযো ৱিজটেন্তিযো ৰিঞ্চন্তি উদ্দেসং পৰিপুচ্ছং অধিসীলং অধিচিত্তং অধিপঞ্ঞ’’ন্তি.

অথ খো ভগৱা মহাপজাপতিং গোতমিং ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো মহাপজাপতি গোতমী ভগৱতা ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা ভগৱন্তং অভিৱাদেত্ৱা পদক্খিণং কত্ৱা পক্কামি. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা ছব্বগ্গিযে ভিক্খূ পটিপুচ্ছি – ‘‘সচ্চং কিৰ তুম্হে, ভিক্খৱে, ভিক্খুনীহি এড়কলোমানি ধোৱাপেথপি ৰজাপেথপি ৱিজটাপেথপী’’তি? ‘‘সচ্চং, ভগৱা’’তি. ‘‘ঞাতিকাযো তুম্হাকং, ভিক্খৱে, অঞ্ঞাতিকাযো’’তি? ‘‘অঞ্ঞাতিকাযো, ভগৱা’’তি. ‘‘অঞ্ঞাতকা, মোঘপুৰিসা, অঞ্ঞাতিকানং ন জানন্তি পতিৰূপং ৱা অপ্পতিৰূপং ৱা পাসাদিকং ৱা অপাসাদিকং. তত্থ নাম তুম্হে, মোঘপুৰিসা, অঞ্ঞাতিকাহি ভিক্খুনীহি এড়কলোমানি ধোৱাপেস্সথপি ৰজাপেস্সথপি ৱিজটাপেস্সথপি! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৫৭৭. ‘‘যো পন ভিক্খু অঞ্ঞাতিকায ভিক্খুনিযা এড়কলোমানি ধোৱাপেয্য ৱা ৰজাপেয্য ৱা ৱিজটাপেয্য ৱা, নিস্সগ্গিযং পাচিত্তিয’’ন্তি.

৫৭৮. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

অঞ্ঞাতিকা নাম মাতিতো ৱা পিতিতো ৱা যাৱ সত্তমা পিতামহযুগা অসম্বদ্ধা.

ভিক্খুনী নাম উভতোসঙ্ঘে উপসম্পন্না.

ধোৱাতি আণাপেতি, আপত্তি দুক্কটস্স. ধোতানি নিস্সগ্গিযানি হোন্তি. ৰজাতি আণাপেতি, আপত্তি দুক্কটস্স. ৰত্তানি নিস্সগ্গিযানি হোন্তি. ৱিজটেহীতি আণাপেতি, আপত্তি দুক্কটস্স. ৱিজটিতানি নিস্সগ্গিযানি হোন্তি. নিস্সজ্জিতব্বানি সঙ্ঘস্স ৱা গণস্স ৱা পুগ্গলস্স ৱা. এৱঞ্চ পন, ভিক্খৱে, নিস্সজ্জিতব্বানি…পে… ইমানি মে, ভন্তে, এড়কলোমানি অঞ্ঞাতিকায ভিক্খুনিযা ধোৱাপিতানি নিস্সগ্গিযানি. ইমানাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৫৭৯. অঞ্ঞাতিকায অঞ্ঞাতিকসঞ্ঞী এড়কলোমানি ধোৱাপেতি, নিস্সগ্গিযং পাচিত্তিযং. অঞ্ঞাতিকায অঞ্ঞাতিকসঞ্ঞী এড়কলোমানি ধোৱাপেতি ৰজাপেতি, নিস্সগ্গিযেন আপত্তি দুক্কটস্স. অঞ্ঞাতিকায অঞ্ঞাতিকসঞ্ঞী এড়কলোমানি ধোৱাপেতি ৱিজটাপেতি, নিস্সগ্গিযেন আপত্তি দুক্কটস্স. অঞ্ঞাতিকায অঞ্ঞাতিকসঞ্ঞী এড়কলোমানি ধোৱাপেতি ৰজাপেতি ৱিজটাপেতি, নিস্সগ্গিযেন আপত্তি দ্ৱিন্নং দুক্কটানং.

অঞ্ঞাতিকায অঞ্ঞাতিকসঞ্ঞী এড়কলোমানি ৰজাপেতি, নিস্সগ্গিযং পাচিত্তিযং. অঞ্ঞাতিকায অঞ্ঞাতিকসঞ্ঞী এড়কলোমানি ৰজাপেতি ৱিজটাপেতি, নিস্সগ্গিযেন আপত্তি দুক্কটস্স. অঞ্ঞাতিকায অঞ্ঞাতিকসঞ্ঞী এড়কলোমানি ৰজাপেতি ধোৱাপেতি, নিস্সগ্গিযেন আপত্তি দুক্কটস্স. অঞ্ঞাতিকায অঞ্ঞাতিকসঞ্ঞী এড়কলোমানি ৰজাপেতি ৱিজটাপেতি ধোৱাপেতি, নিস্সগ্গিযেন আপত্তি দ্ৱিন্নং দুক্কটানং.

অঞ্ঞাতিকায অঞ্ঞাতিকসঞ্ঞী এড়কলোমানি ৱিজটাপেতি, নিস্সগ্গিযং পাচিত্তিযং. অঞ্ঞাতিকায অঞ্ঞাতিকসঞ্ঞী এড়কলোমানি ৱিজটাপেতি ধোৱাপেতি, নিস্সগ্গিযেন আপত্তি দুক্কটস্স. অঞ্ঞাতিকায অঞ্ঞাতিকসঞ্ঞী এড়কলোমানি ৱিজটাপেতি ৰজাপেতি, নিস্সগ্গিযেন আপত্তি দুক্কটস্স. অঞ্ঞাতিকায অঞ্ঞাতিকসঞ্ঞী এড়কলোমানি ৱিজটাপেতি ধোৱাপেতি ৰজাপেতি, নিস্সগ্গিযেন আপত্তি দ্ৱিন্নং দুক্কটানং.

৫৮০. অঞ্ঞাতিকায ৱেমতিকো…পে… অঞ্ঞাতিকায ঞাতিকসঞ্ঞী…পে… অঞ্ঞস্স এড়কলোমানি ধোৱাপেতি, আপত্তি দুক্কটস্স. একতো উপসম্পন্নায ধোৱাপেতি, আপত্তি দুক্কটস্স. ঞাতিকায অঞ্ঞাতিকসঞ্ঞী, আপত্তি দুক্কটস্স. ঞাতিকায ৱেমতিকো, আপত্তি দুক্কটস্স. ঞাতিকায ঞাতিকসঞ্ঞী, অনাপত্তি.

৫৮১. অনাপত্তি ঞাতিকায ধাৱন্তিযা অঞ্ঞাতিকা দুতিযা হোতি, অৱুত্তা ধোৱতি, অপৰিভুত্তং কতভণ্ডং ধোৱাপেতি, সিক্খমানায সামণেৰিযা উম্মত্তকস্স আদিকম্মিকস্সাতি.

এড়কলোমধোৱাপনসিক্খাপদং নিট্ঠিতং সত্তমং.