৬. এড়কলোমসিক্খাপদং

৫৭১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰস্স ভিক্খুনো কোসলেসু জনপদে সাৱত্থিং গচ্ছন্তস্স অন্তৰামগ্গে এড়কলোমানি উপ্পজ্জিংসু. অথ খো সো ভিক্খু তানি এড়কলোমানি উত্তৰাসঙ্গেন ভণ্ডিকং বন্ধিত্ৱা অগমাসি. মনুস্সা তং ভিক্খুং পস্সিত্ৱা উপ্পণ্ডেসুং – ‘‘কিত্তকেন তে, ভন্তে, কীতানি? কিত্তকো উদযো ভৱিস্সতী’’তি? সো ভিক্খু তেহি মনুস্সেহি উপ্পণ্ডিযমানো মঙ্কু অহোসি. অথ খো সো ভিক্খু সাৱত্থিং গন্ত্ৱা তানি এড়কলোমানি ঠিতকোৱ আসুম্ভি. ভিক্খূ তং ভিক্খুং এতদৱোচুং – ‘‘কিস্স ত্ৱং, আৱুসো, ইমানি এড়কলোমানি ঠিতকোৱ আসুম্ভসী’’তি? ‘‘তথা হি পনাহং, আৱুসো, ইমেসং এড়কলোমানং কাৰণা মনুস্সেহি উপ্পণ্ডিতো’’তি. ‘‘কীৱ দূৰতো পন ত্ৱং, আৱুসো, ইমানি এড়কলোমানি আহৰী’’তি? ‘‘অতিৰেকতিযোজনং, আৱুসো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খু অতিৰেকতিযোজনং এড়কলোমানি আহৰিস্সতী’’তি! অথ খো তে ভিক্খূ তং ভিক্খুং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… সচ্চং কিৰ ত্ৱং, ভিক্খু, অতিৰেকতিযোজনং এড়কলোমানি আহৰীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, মোঘপুৰিস, অতিৰেকতিযোজনং এড়কলোমানি আহৰিস্সসি! নেতং মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৫৭২. ‘‘ভিক্খুনো পনেৱ অদ্ধানমগ্গপ্পটিপন্নস্স এড়কলোমানি উপ্পজ্জয্যুং. আকঙ্খমানেন ভিক্খুনা পটিগ্গহেতব্বানি. পটিগ্গহেত্ৱা তিযোজনপৰমং সহত্থা হৰিতব্বানি [হাৰেতব্বানি (সী. স্যা. ক.)], অসন্তে হাৰকে. ততো চে উত্তৰি হৰেয্য, অসন্তেপি হাৰকে, নিস্সগ্গিযং পাচিত্তিয’’ন্তি.

৫৭৩. ভিক্খুনো পনেৱ অদ্ধানমগ্গপ্পটিপন্নস্সাতি পন্থং গচ্ছন্তস্স.

এড়কলোমানি উপ্পজ্জেয্যুন্তি উপ্পজ্জেয্যুং সঙ্ঘতো ৱা গণতো ৱা ঞাতিতো ৱা মিত্ততো ৱা পংসুকূলং ৱা অত্তনো ৱা ধনেন.

আকঙ্খমানেনাতি ইচ্ছমানেন পটিগ্গহেতব্বানি.

পটিগ্গহেত্ৱা তিযোজনপৰমং সহত্থা হৰিতব্বানীতি তিযোজনপৰমতা সহত্থা হৰিতব্বানি.

অসন্তে হাৰকেতি নাঞ্ঞো কোচি হাৰকো হোতি ইত্থী ৱা পুৰিসো ৱা গহট্ঠো ৱা পব্বজিতো ৱা.

ততো চে উত্তৰি হৰেয্য, অসন্তেপি হাৰকেতি পঠমং পাদং তিযোজনং অতিক্কামেতি, আপত্তি দুক্কটস্স. দুতিযং পাদং অতিক্কামেতি, নিস্সগ্গিযং পাচিত্তিযং [নিস্সগ্গিযানি হোন্তি (স্যা.)]. অন্তোতিযোজনে ঠিতো বহিতিযোজনং পাতেতি, নিস্সগ্গিযং পাচিত্তিযং [নিস্সগ্গিযানি হোন্তি (স্যা.)]. অঞ্ঞস্স যানে ৱা ভণ্ডে ৱা অজানন্তস্স পক্খিপিত্ৱা তিযোজনং অতিক্কামেতি, নিস্সগ্গিযানি হোন্তি. নিস্সজ্জিতব্বানি সঙ্ঘস্স ৱা গণস্স ৱা পুগ্গলস্স ৱা. এৱঞ্চ পন, ভিক্খৱে, নিস্সজ্জিতব্বানি…পে… ইমানি মে, ভন্তে, এড়কলোমানি তিযোজনং অতিক্কামিতানি নিস্সগ্গিযানি. ইমানাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৫৭৪. অতিৰেকতিযোজনে অতিৰেকসঞ্ঞী অতিক্কামেতি [তিযোজনং অতিক্কামেতি (স্যা.)], নিস্সগ্গিযং পাচিত্তিযং. অতিৰেকতিযোজনে ৱেমতিকো অতিক্কামেতি [তিযোজনং অতিক্কামেতি (স্যা.)], নিস্সগ্গিযং পাচিত্তিযং. অতিৰেকতিযোজনে ঊনকসঞ্ঞী অতিক্কামেতি [তিযোজনং অতিক্কামেতি (স্যা.)], নিস্সগ্গিযং পাচিত্তিযং.

ঊনকতিযোজনে অতিৰেকসঞ্ঞী, আপত্তি দুক্কটস্স. ঊনকতিযোজনে ৱেমতিকো, আপত্তি দুক্কটস্স. ঊনকতিযোজনে ঊনকসঞ্ঞী, অনাপত্তি.

৫৭৫. অনাপত্তি তিযোজনং হৰতি, ঊনকতিযোজনং হৰতি, তিযোজনং হৰতিপি, পচ্চাহৰতিপি, তিযোজনং ৱাসাধিপ্পাযো গন্ত্ৱা ততো পৰং হৰতি, অচ্ছিন্নং পটিলভিত্ৱা হৰতি, নিস্সট্ঠং পটিলভিত্ৱা হৰতি, অঞ্ঞং হৰাপেতি কতভণ্ডং, উম্মত্তকস্স, আদিকম্মিকস্সাতি.

এড়কলোমসিক্খাপদং নিট্ঠিতং ছট্ঠং.