৪. ছব্বস্সসিক্খাপদং

৫৫৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খূ অনুৱস্সং সন্থতং কাৰাপেন্তি. তে যাচনবহুলা ৱিঞ্ঞত্তিবহুলা ৱিহৰন্তি – ‘‘এড়কলোমানি দেথ. এড়কলোমেহি অত্থো’’তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা অনুৱস্সং সন্থতং কাৰাপেস্সন্তি, যাচনবহুলা ৱিঞ্ঞত্তিবহুলা ৱিহৰিস্সন্তি – ‘এড়কলোমানি দেথ, এড়কলোমেহি অত্থো’’’তি! অম্হাকং পন সকিং কতানি সন্থতানি পঞ্চপি ছপি ৱস্সানি হোন্তি, যেসং নো দাৰকা উহদন্তিপি উম্মিহন্তিপি উন্দূৰেহিপি খজ্জন্তি. ইমে পন সমণা সক্যপুত্তিযা অনুৱস্সং সন্থতং কাৰাপেন্তি, যাচনবহুলা ৱিঞ্ঞত্তিবহুলা ৱিহৰন্তি – ‘‘এড়কলোমানি দেথ, এড়কলোমেহি অত্থো’’তি!

অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খূ অনুৱস্সং সন্থতং কাৰাপেস্সন্তি, যাচনবহুলা ৱিঞ্ঞত্তিবহুলা ৱিহৰিস্সন্তি – ‘এড়কলোমানি দেথ, এড়কলোমেহি অত্থো’’’তি! অথ খো তে ভিক্খূ তে অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… সচ্চং কিৰ, ভিক্খৱে, ভিক্খূ অনুৱস্সং সন্থতং কাৰাপেন্তি, যাচনবহুলা ৱিঞ্ঞত্তিবহুলা ৱিহৰন্তি – ‘এড়কলোমানি দেথ, এড়কলোমেহি অত্থো’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তে, ভিক্খৱে, মোঘপুৰিসা অনুৱস্সং সন্থতং কাৰাপেস্সন্তি, যাচনবহুলা ৱিঞ্ঞত্তিবহুলা ৱিহৰিস্সন্তি – ‘এড়কলোমানি দেথ, এড়কলোমেহি অত্থো’তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৫৫৮. ‘‘নৱং পন ভিক্খুনা সন্থতং কাৰাপেত্ৱা ছব্বস্সানি ধাৰেতব্বং. ওৰেন চে ছন্নং ৱস্সানং তং সন্থতং ৱিস্সজ্জেত্ৱা ৱা অৱিস্সজ্জেত্ৱা ৱা অঞ্ঞং নৱং সন্থতং কাৰাপেয্য, নিস্সগ্গিযং পাচিত্তিয’’ন্তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

৫৫৯. তেন খো পন সমযেন অঞ্ঞতৰো ভিক্খু কোসম্বিযং গিলানো হোতি. ঞাতকা তস্স ভিক্খুনো সন্তিকে দূতং পাহেসুং – ‘‘আগচ্ছতু, ভদন্তো মযং উপট্ঠহিস্সামা’’তি. ভিক্খূপি এৱমাহংসু – ‘‘গচ্ছাৱুসো, ঞাতকা তং উপট্ঠহিস্সন্তী’’তি. সো এৱমাহ – ‘‘ভগৱতা, আৱুসো, সিক্খাপদং পঞ্ঞত্তং – ‘নৱং পন ভিক্খুনা সন্থতং কাৰাপেত্ৱা ছব্বস্সানি ধাৰেতব্ব’ন্তি. অহঞ্চম্হি গিলানো, ন সক্কোমি সন্থতং আদায পক্কমিতুং. ময্হঞ্চ ৱিনা সন্থতা ন ফাসু হোতি. নাহং গমিস্সামী’’তি. ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, গিলানস্স ভিক্খুনো সন্থতসম্মুতিং দাতুং. এৱঞ্চ পন, ভিক্খৱে, দাতব্বা. তেন গিলানেন ভিক্খুনা সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ৱুড্ঢানং ভিক্খূনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘অহং, ভন্তে, গিলানো. ন সক্কোমি সন্থতং আদায পক্কমিতুং. সোহং, ভন্তে, সঙ্ঘং সন্থতসম্মুতিং যাচামী’তি. দুতিযম্পি যাচিতব্বা. ততিযম্পি যাচিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

৫৬০. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু গিলানো. ন সক্কোতি সন্থতং আদায পক্কমিতুং. সো সঙ্ঘং সন্থতসম্মুতিং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো সন্থতসম্মুতিং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু গিলানো. ন সক্কোতি সন্থতং আদায পক্কমিতুং. সো সঙ্ঘং সন্থতসম্মুতিং যাচতি. সঙ্ঘো ইত্থন্নামস্স ভিক্খুনো সন্থতসম্মুতিং দেতি. যস্সাযস্মতো খমতি ইত্থন্নামস্স ভিক্খুনো সন্থতসম্মুতিযা দানং, সো তুণ্হস্স; যস্স নক্খমতি, সো ভাসেয্য.

‘‘দিন্না সঙ্ঘেন ইত্থন্নামস্স ভিক্খুনো সন্থতসম্মুতি. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৫৬১. ‘‘নৱং পন ভিক্খুনা সন্থতং কাৰাপেত্ৱা ছব্বস্সানি ধাৰেতব্বং. ওৰেন চে ছন্নং ৱস্সানং তং সন্থতং ৱিস্সজ্জেত্ৱা ৱা অৱিস্সজ্জেত্ৱা ৱা অঞ্ঞং নৱং সন্থতং কাৰাপেয্য, অঞ্ঞত্ৰ ভিক্খুসম্মুতিযা, নিস্সগ্গিযং পাচিত্তিয’’ন্তি.

৫৬২. নৱং নাম কৰণং উপাদায ৱুচ্চতি.

সন্থতং নাম সন্থৰিত্ৱা কতং হোতি অৱাযিমং.

কাৰাপেত্ৱাতি কৰিত্ৱা ৱা কাৰাপেত্ৱা ৱা.

ছব্বস্সানি ধাৰেতব্বন্তি ছব্বস্সপৰমতা ধাৰেতব্বং.

ওৰেন চে ছন্নং ৱস্সানন্তি ঊনকছব্বস্সানি.

তং সন্থতং ৱিস্সজ্জেত্ৱাতি অঞ্ঞেসং দত্ৱা.

অৱিস্সজ্জেত্ৱাতি ন কস্সচি দত্ৱা.

অঞ্ঞত্ৰ ভিক্খুসম্মুতিযাতি ঠপেত্ৱা ভিক্খুসম্মুতিং অঞ্ঞং নৱং সন্থতং কৰোতি ৱা কাৰাপেতি ৱা, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা পুগ্গলস্স ৱা. এৱঞ্চ পন, ভিক্খৱে, নিস্সজ্জিতব্বং…পে… ইদং মে, ভন্তে, সন্থতং ঊনকছব্বস্সানি কাৰাপিতং, অঞ্ঞত্ৰ ভিক্খুসম্মুতিযা, নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৫৬৩. অত্তনা ৱিপ্পকতং অত্তনা পৰিযোসাপেতি, নিস্সগ্গিযং পাচিত্তিযং. অত্তনা ৱিপ্পকতং পৰেহি পৰিযোসাপেতি, নিস্সগ্গিযং পাচিত্তিযং. পৰেহি ৱিপ্পকতং অত্তনা পৰিযোসাপেতি, নিস্সগ্গিযং পাচিত্তিযং. পৰেহি ৱিপ্পকতং পৰেহি পৰিযোসাপেতি, নিস্সগ্গিযং পাচিত্তিযং.

৫৬৪. অনাপত্তি ছব্বস্সানি কৰোতি, অতিৰেকছব্বস্সানি কৰোতি, অঞ্ঞস্সত্থায কৰোতি ৱা কাৰাপেতি ৱা, অঞ্ঞেন কতং পটিলভিত্ৱা পৰিভুঞ্জতি, ৱিতানং ৱা ভূমত্থৰণং ৱা সাণিপাকাৰং ৱা ভিসিং ৱা বিব্বোহনং ৱা কৰোতি, ভিক্খুসম্মুতিযা, উম্মত্তকস্স, আদিকম্মিকস্সাতি.

ছব্বস্সসিক্খাপদং নিট্ঠিতং চতুত্থং.