৩. দ্ৱেভাগসিক্খাপদং

৫৫২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ – ‘‘ভগৱতা পটিক্খিত্তং সুদ্ধকাড়কানং এড়কলোমানং সন্থতং কাৰাপেতু’’ন্তি, তে থোকংযেৱ ওদাতং অন্তে আদিযিত্ৱা তথেৱ সুদ্ধকাড়কানং এড়কলোমানং সন্থতং কাৰাপেন্তি. যে তে ভিক্খূ অপ্পিচ্ছা… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ থোকংযেৱ ওদাতং অন্তে আদিযিত্ৱা তথেৱ সুদ্ধকাড়কানং এড়কলোমানং সন্থতং কাৰাপেস্সন্তী’’তি! অথ খো তে ভিক্খূ ছব্বগ্গিযে ভিক্খূ অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ তুম্হে, ভিক্খৱে, থোকংযেৱ ওদাতং অন্তে আদিযিত্ৱা তথেৱ সুদ্ধকাড়কানং এড়কলোমানং সন্থতং কাৰাপেথা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, থোকংযেৱ ওদাতং অন্তে আদিযিত্ৱা তথেৱ সুদ্ধকাড়কানং এড়কলোমানং সন্থতং কাৰাপেস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৫৫৩. ‘‘নৱং পন ভিক্খুনা সন্থতং কাৰযমানেন দ্ৱে ভাগা সুদ্ধকাড়কানং এড়কলোমানং আদাতব্বা ততিযং ওদাতানং চতুত্থং গোচৰিযানং. অনাদা চে ভিক্খু দ্ৱে ভাগে সুদ্ধকাড়কানং এড়কলোমানং ততিযং ওদাতানং চতুত্থং গোচৰিযানং নৱং সন্থতং কাৰাপেয্য, নিস্সগ্গিযং পাচিত্তিয’’ন্তি.

৫৫৪. নৱং নাম কৰণং উপাদায ৱুচ্চতি.

সন্থতং নাম সন্থৰিত্ৱা কতং হোতি অৱাযিমং.

কাৰযমানেনাতি কৰোন্তো ৱা কাৰাপেন্তো ৱা.

দ্ৱে ভাগা সুদ্ধকাড়কানং এড়কলোমানং আদাতব্বাতি ধাৰযিত্ৱা দ্ৱে তুলা আদাতব্বা.

ততিযং ওদাতানন্তি তুলং ওদাতানং.

চতুত্থং গোচৰিযানন্তি তুলং গোচৰিযানং.

অনাদা চে ভিক্খু দ্ৱে ভাগে সুদ্ধকাড়কানং এড়কলোমানং ততিযং ওদাতানং চতুত্থং গোচৰিযানন্তি. অনাদিযিত্ৱা দ্ৱে তুলে সুদ্ধকাড়কানং এড়কলোমানং তুলং ওদাতানং তুলং গোচৰিযানং নৱং সন্থতং কৰোতি ৱা কাৰাপেতি ৱা পযোগে দুক্কটং, পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা পুগ্গলস্স ৱা. এৱঞ্চ পন, ভিক্খৱে, নিস্সজ্জিতব্বং…পে… ইদং মে, ভন্তে, সন্থতং অনাদিযিত্ৱা দ্ৱে তুলে সুদ্ধকাড়কানং এড়কলোমানং তুলং ওদাতানং তুলং গোচৰিযানং কাৰাপিতং নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৫৫৫. অত্তনা ৱিপ্পকতং অত্তনা পৰিযোসাপেতি, নিস্সগ্গিযং পাচিত্তিযং. অত্তনা ৱিপ্পকতং পৰেহি পৰিযোসাপেতি, নিস্সগ্গিযং পাচিত্তিযং. পৰেহি ৱিপ্পকতং অত্তনা পৰিযোসাপেতি, নিস্সগ্গিযং পাচিত্তিযং. পৰেহি ৱিপ্পকতং পৰেহি পৰিযোসাপেতি, নিস্সগ্গিযং পাচিত্তিযং.

অঞ্ঞস্সত্থায কৰোতি ৱা কাৰাপেতি ৱা, আপত্তি দুক্কটস্স. অঞ্ঞেন কতং পটিলভিত্ৱা পৰিভুঞ্জতি, আপত্তি দুক্কটস্স.

৫৫৬. অনাপত্তি তুলং ওদাতানং তুলং গোচৰিযানং আদিযিত্ৱা কৰোতি, বহুতৰং ওদাতানং বহুতৰং গোচৰিযানং আদিযিত্ৱা কৰোতি, সুদ্ধং ওদাতানং সুদ্ধং গোচৰিযানং আদিযিত্ৱা কৰোতি, ৱিতানং ৱা ভূমত্থৰণং ৱা সাণিপাকাৰং ৱা ভিসিং ৱা বিব্বোহনং ৱা কৰোতি, উম্মত্তকস্স, আদিকম্মিকস্সাতি.

দ্ৱেভাগসিক্খাপদং নিট্ঠিতং ততিযং.