৩. ততিযসিক্খাপদং

১১৯০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰা ভিক্খুনী অঞ্ঞতৰিস্সা ইত্থিযা কুলূপিকা হোতি. অথ খো সা ইত্থী তং ভিক্খুনিং এতদৱোচ – ‘‘হন্দায্যে, ইমং সঙ্ঘাণিং অমুকায নাম ইত্থিযা দেহী’’তি. অথ খো সা ভিক্খুনী – ‘‘সচাহং পত্তেন আদায গচ্ছামি ৱিস্সৰো মে ভৱিস্সতী’’তি পটিমুঞ্চিত্ৱা অগমাসি. তস্সা ৰথিকায সুত্তকে ছিন্নে ৱিপ্পকিৰিযিংসু. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো সঙ্ঘাণিং ধাৰেস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে. … তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনী সঙ্ঘাণিং ধাৰেস্সতী’’তি…পে… সচ্চং কিৰ, ভিক্খৱে, ভিক্খুনী সঙ্ঘাণিং ধাৰেতী’’তি [ধাৰেসীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনী সঙ্ঘাণিং ধাৰেস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১৯১. ‘‘যা পন ভিক্খুনী সঙ্ঘাণিং ধাৰেয্য, পাচিত্তিয’’ন্তি.

১১৯২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সঙ্ঘাণি নাম যা কাচি কটূপগা.

ধাৰেয্যাতি সকিম্পি ধাৰেতি, আপত্তি পাচিত্তিযস্স.

১১৯৩. অনাপত্তি আবাধপ্পচ্চযা, কটিসুত্তকং ধাৰেতি, উম্মত্তিকায, আদিকম্মিকাযাতি.

ততিযসিক্খাপদং নিট্ঠিতং.